Yeni doğulan uşağa müavinət 100 manat artdı...

Aytəkin Kamranqızı: “Yeni dünyaya gələn uşaq üçün müavinətin artması yenidoğulanların sağlamlığı baxımından vacib addımdır”

img

Xəbər verildiyi kimi, Azərbaycanda yeni doğulan uşağa görə birdəfəlik müavinət 200 manatdan 300 manata çatdırılır. Bu, 50 faiz artım deməkdir. Qeyd edək ki, Milli Məclis qanuna dəyişiklik layihəsini müzakirəyə çıxaracaq.

Yeni dünyaya gələn uşaqlara görə nəzərdə tutulan müavinətin 200 manatdan 300 manata çatdırılması həmin ailənin sosial durumunun yaxşılaşmasına səbəb olacaq.

  • “Yeni doğulan uşağa görə birdəfəlik müavinətin 200 manatdan 300 manata çatdırılması uşaq sahibi olan ailənin maddi vəziyyətinə müsbət təsir edəcək”

Sosioloq Aytəkin Kamranqızı bildirdi ki, hər il əhali sayında artımı müşahidə edilir, amma ailələrdə ümumi olaraq uşaqların sayı azalır. Bu, keçən əsrin 90-cı illərindən sonra tendensiya halına çevrilib: “Cəmiyyətdə işləyən xanımların sayının daha da artması, erkən nikahların azalması, boşanmaların çoxalması ailələrdə uşaq sayının azalmasına gətirib çıxarır. Ailədə uşaq sayı o vaxt çox olur ki, ailədəki tərəflər özünü zəmanətli hiss edirlər. Və yaxud ailədaxilində münasibət yaxşı olarsa, konfliktlər olmazsa, uşaq dünyaya gətirmək prosesinə müsbət təsir göstərir. Hamiləlikdən sonra müavinətlərin verilməsi, bu gün bu istiqamətdə təşviqat işlərinin aparılması, stimullaşdırıcı tədbirlərin görülməsi və ailə planlanması, uşaq dünyaya gəlməsi ilə konfliktlərin idarə edilməsi ilə bağlı konsepsiyanın hazırlanması ailədaxili münasibətlərin sağlamlaşdırılmasına, ailədə uşaq sayının normallaşmasına və eyni zamanda uşaqların sağlam bir mühitdə böyüməsinə müsbət təsir göstərə bilər”.

Həmsöhbətimiz onu da əlavə etdi ki, dövlət tərəfindən atılan bu addım cəmiyyətin həssas təbəqəsinə aid olan uşaqları əhatə etməsi səbəbindən olduqca müsbətdir: “Yeni dünyaya gələn uşaq üçün müavinətin artması yenidoğulanların sağlamlığı baxımından da vacib addımdır. Məlumdur ki, yeni doğulan uşağın xərci çox olur. Körpənin sağlamlığı üçün həkim müayinəsi, pampers, qida və digər tələblər xərc tələb edir. Bu səbəbdən də yeni doğulan uşağa görə birdəfəlik müavinətin 200 manatdan 300 manata çatdırılması uşaq sahibi olan ailənin maddi vəziyyətinə müsbət təsir edəcək”.

Günel CƏLİLOVA

Peşə etikası

Son xəbərlər