Bakı Ağır Cinayətlər Məhkəməsində MİDA-nın sosial binalarında 1 mənzili bir neçə nəfərə satmaqda təqsirləndirilən "KAT" Holdinqin rəhbəri Elçin Ələkbərovun cinayət işi üzrə məhkəmə prosesi davam etdirilib. Hakim Faiq Qəniyevin sədrliyi ilə keçirilən prosesdə ifadə verən zərərçəkmiş Qətibə Kərimova bildirib ki, 2018-ci ilin iyun ayında "KAT" Holdinqdən kreditlə mənzil götürüb:
"Razılığa əsasən, mənzil dekabr ayında təhvil verilməli idi. Təhvil verilmədi. Gah dedilər yanvarda, gah da mart ayında təhvil veriləcək. Verilmədi. Hər ay vaxtında kredit borcunu ödəsəm də, mənzili mənə təhvil vermədilər. Hər ay 1000 manat ödəniş etməli olduğum halda, 3-4 min manat ödəmişəm. Hazırda 17 min manat borcum var. Evi bizə heç kim təhvil vermədiyi üçün məcbur olaraq mənzilə köçmüşəm. Razılığa əsasən, mənzil tam təmirli halda mənə təhvil verilməli idi. Amma mənzildə heç bir təmir aparılmayıb. Suvaqlı mənzilə köçmüşəm, özüm təmir etdirmişəm”.
Şahid Tural Əhmədli də bildirib ki, adıçəkilən binadan mənzil alıb: "MİDA-nın sosial binalarından atam mənim üçün mənzil almışdı. Mənzillə bağlı atam birbaşa Elçin Ələkbərovla danışıb müqavilə bağlayıb. Kvadratmetri 1000 manata razılıq əldə olunub, 64,6 kvadratmetr sahəsi olan mənzilə görə 64 min 600 manat pul ödəmişik. Evi nağd pula almışıq. Pulun bir qismini, 30 min manatını notarial qaydada, qalan məbləği isə əlbəəl vermişik. Amma bizə evi təhvil vermədilər. Məlum oldu ki, mənzil bir neçə nəfərə satılıb. Biz məcburiyyət qarşısında mənzili təmirsiz alıb öz pulumuzla təmir etdirdik. Hazırda mənzildə yaşayıram, amma mənə dəymiş ziyan ödənilməyib".
Bu məsələdə diqqətimizi MİDA-nin tikinti sifarişini həyata keçirən “KAT” adlı holdinq çəkdi. Qeyd edək ki, bu adda şirkətun adı 15 il bundan əvvəl mediada deputatlara tikilən bina ilə bağlı qalmaqalda hallanıb. Araşdırmamız nəticəsində məlum oldu ki, vaxtilə KAT LTD kimi vətəndaşların başına oyun açan şirkət yalnız adındakı bəzi detalları dəyişib, özünü holdinq etməklə fırıldaqlarını davam etdirib.
2000-2005-ci illərdə II çağırış Milli Məclisin üzvü olmuş bir qrup keçmiş deputatın dövlətdən mənzil almaq problemi uzun müddət həll edilmədi.
KAT LTD şirkətinin eks-deputatlar üçün inşa etdiyi bina 2005-ci ildə dövlət ehtiyacları üçün Fövqəladə Hallar Nazirliyinə (FHN) veriləndən sonra isə problem bir qədər də dərinləşdi.
Problemlə bağlı sabiq deputat, Azərbaycan Kommunist Partiyasının sədri Rauf Qurbanovun vaxtilə mediaya verdiyi açıqlamalara rast gəldik. Keçmiş deputatın sözlərinə görə, II çağırış Milli Məclisdə deputat olmuş şəxslər KAT LTD şirkəti ilə müqavilə bağlayıb, öz vəsaitləri hesabına mənzilləri əldə etməli idilər: “Lakin KAT LTD-nin tikdiyi bina dövlət ehtiyacları üçün Fövqəladə Hallar Nazirliyinə verildi. Mən və ev verilməsi nəzərdə tutulan sabiq deputatlar öz şəxsi vəsaitləri hesabına həmin mənzilləri almaq üçün vəsait ödəmişik. Lakin evin verilməsi məsələsi yubadıldı”.
Rauf Qurbanov deyib ki, sabiq deputatlar üçün Xətai rayonu ərazisində, AMAY ticarət mərkəzinin yaxınlığında yeni yaşayış binası inşa olunur.
Qeyd edək ki, həmin vaxt KAT LTD şirkətinin tikdiyi bina FHN-ə veriləndən sonra Nazirlər Kabineti deputatlar üçün başqa binanın inşası yönündə müvafiq qərar verib. KAT LTD şirkətinə tikintinin aparılması üçün o zamankı bazar qiymətlərinə uyğun böyük bir məbləğ də ödənilib. Eyni zamanda, müəyyən torpaq sahəsi ayrılıb. Buna baxmayaraq, şirkət heç bir addım atmayıb.
O zaman bir qrup deputata başqa yerlərdən mənzil verildi, ancaq digər qrup uzun müddət mənzil ala bilməyib. Sonra mənzil ala bilməyən deputatlar KAT LTD şirkətindən kompensasiya tələb etsələr də, heç nə alınmayıb.
Çox maraqlıdır ki, ölkədə kifayət qədər rezonans doğurmuş bu mənzil fldağından sonra MİDA özünə biznes tərəfdaşı kimi reputasiyası zədəli olan belə bir şirkəti seçib. Bundan doğan nəticə də göz qabağındadır. Bir zamanlar deputatları aıdadan şirkət, ində də sadə vətəndaşları rəzil vəziyyətə salıb.
Məhəmmədəli QƏRİBLİ
