“Narkomaniyaya yox deyək”, eləcə “Erkən nikahlar və onların fəsadları” mövzularında maarifləndirici seminar Astara şəhər 6 saylı tam orta məktəbində təşkil olunmuşdu. Astara Rayon Polis Şöbəsinin təşəbbüsü, Rayon İcra Hakimiyyətinin, Gənclər və İdman İdarəsinin, Rayon Mərkəzi Xəstəxanasının birgə təşkilatçılığı sayəsində baş tutan tədbirdə yuxarı sinif şagirdləri və müəllimlər iştirak edirdilər.
Astara Rayon Polis Şöbəsinin rəisi, polis polkovniki A. Cəfərov əsrin bəlası olan narkomaniyaya qarşı mübarizənin təşkili məqsədilə belə tədbirlərin vacibliyini qeyd etdi, əlaqədar təşkilatlara minnətdarlığını bildirib dedi:- Hər kəs gənc nəslin sağlam böyüməsinə, valideynlərinin etimadının qazanmasına, Vətənə layiq övlad kimi yetişməsinə səy göstərməlidir. Təəssüf ki, narkomaniyaya meyl edən gənclərə hələ də rast gəlinir. Məhz bu səbəbdən təhsil müəssisələrində, ayrı-ayrı kollektivlərdə izahat və maariflənmə işləri müntəzəm aparılmalı, hər bir şagird təhsilə və idmana diqqətli yanaşmalı, vətənpərvər olmalıdır.
Daha sonra çıxış edən Astara Rayon İcra Hakimiyyəti başçısının müavini, ictimai-siyasi və humanitar məsələlər şöbəsinin müdiri F. Sadıxova, Rayon Mərkəzi Xəstəxanası Publik -hüquqi Şəxsinin Baş direktoru O. Əmənullayev, Gənclər və İdman İdarəsinin rəisi vəzifəsini icra edən R.Şirinov, Polis Şöbəsinin Şəxsi heyətlə iş üzrə köməkçisi, polis kapitanı C. Abdulov və Astara şəhər 6 saylı tam orta məktəbin direktoru Ü. Bayramova keçirilən maarifləndirmə tədbirlərini yüksək qiymətləndirdilər , narkomaniyanın yaratdığı problemləri sadaladılar, gəncləri dəyərli tövsiyələrə əməl etməyi, narkomaniyaya düçar olmuş insanları doğru yola çəkməyə, onlara kömək etməyə çağırdılar.
Tədbir iştirakçıları narkotik maddələrin yaratdığı fəsadlar və dağıdıcı təsirləri barədə video-çarx baxdıqdan sonra mövzular ətrafında məktəbli gənclərin və gənc müəllimlərin sualları Astara Rayon Polis Şöbəsinin rəisi, polis polkovniki A. Cəfərov tərəfindən cavablandırıldı.
Zəfər ORUCOĞLU
Azərbaycan Jurnalistlər Birliyinin üzvü
