Paytaxt Bakıda inşa edilmiş yeni çoxmərtəbəli yaşayış binalarının əksəriyyətində mənzillər dövlət qeydiyyatına götürülməyib. Bu səbəbdən də vətəndaşlar böyük vəsait hesabına aldıqları evin mülkiyyət hüququnu əldə edə bilmirlər.
Yeni tikililərdən mənzil alan vətəndaşların çıxarış ala bilməməsinin səbəbi mənzil-tikinti kooperativlərinin (MTK) lazım olan sənədlərinin qaydasında olmaması ilə bağlıdır. Təbii ki, bu vəziyyətdən əziyyət çəkən həmin binalardan mənzil alan vətəndaşlardır. Belə bir problemlə Bakı şəhəri, Nəsimi rayonu Qulu Quliyev küçəsi "Star-M" Mənzil Tikinti Kooperativində yaşayan sakinlər əziyyət çəkir. Sakinlərin dediyinə görə, 14 ildir ki, öz mənzillərinə mülkiyyət hüququ verən dövlət sənədini (Çıxarış) ala bilmirlər.
Sakinlər bildirir ki, dəfələrlə "Star-M" MTK şirkətinə müraciət edilib, lakin heç bir nəticəsi olmayıb. Bununla yanaşı, İqtisadiyyat Nazirliyinə, o cümlədən müvafiq qurumlara sakinlər tərəfindən göndərilən çoxsaylı şikayət məktublarının da heç bir nəticəsi olmayıb.
Sakinlər bildirir ki, ölkə başçısı İlham Əliyevin 19.02.2019 tarixində "Bir sıra çoxmərtəbəli binaların ilin sonuna kimi istismara verilməsinin sadələşdirilməsinə dair" imzaladığı Fərmana baxmayaraq "Star-M" MTK şirkətinin rəhbərliyi və müvafiq qurumlar məsələyə laqeyd yanaşır və məsuliyyətdən boyun qaçırırlar. Sakinlər bildirir ki, 14 ildir yaşadıqları ərazidə qeydiyyata düşə bilmirlər, bu da onlara bir sıra çətinliklər yaradır.
“Ev almaq istəyən vətəndaş çıxarış almaqla bağlı gələcəkdə problem yaşamaq istəmirsə, MTK-nın sənədləri ilə maraqlansın”
Hüquqşunas Hüseyn Axundov qeyd etdi ki, yeni tikilinin dövlət qeydiyyatına alınmamasının səbəbi tələb olunan çeşidli sənədlərlə bağlıdır: “Əsas problemlərdən biri ilkin qeydiyyat sənədlərinin, tikinti üçün alınan icazə və sərəncamların qaydasında olmaması, tikintinin aparıldığı torpaq sahəsinin sənədlərindəki problemlərdir. Məsələn, icarə, istifadə hüququ ilə götürülmüş torpaq sahəsində tikinti aparılıb. Yaxud tikinti şirkəti 12 mərtəbəli binanın tikintisi üçün sərəncam alıb, ancaq tikdiyi bina 16-18 mərtəbədir. Yaxud 1 bloklu bina 2 blokluya çevrilib. Tikintiyə icazə alınıb, ancaq inşaat pasportu yoxdur. 130-a yaxın sənəd tələb olunur. 2-3-ü olmadıqda problemlər yaranır. Vətəndaş müqavilə imzalayanda MTK-nın təsis sənədlərinə, torpaq sahəsinə dair sərəncam və digər sənədlərə diqqət etməlidir. MMC-dirsə, tikilən binanın, ən azından, torpaq sahəsinin ilkin çıxarışı mövcud olmalıdır. Təsdiqlənmiş eskiz və işçi layihələr olmalıdır. Müvafiq qurumların tikinti ilə bağlı razılaşdırılmış rəyi olmalıdır. İnşaat pasportu, tikintiyə icazəsi olmalıdır”.
Ekspertin sözlərinə görə, hansısa şirkət tikinti işinə başlayırsa, bütün sənədlərə sahib olmalıdır. Bu sənədlər tam olmadıqda belə problemlər yaranır. Mənzilin mülkiyyət haqqında sənədinin verilməsi üçün binanın istismara qəbul aktının olması vacibdir. Ev almaq istəyən vətəndaş Çıxarış almaqla bağlı gələcəkdə problem yaşamaq istəmirsə, MTK-nın sənədləri ilə maraqlansın.
Günel CƏLİLOVA
