Postmüharibə dövründə əlil və şəhid ailələrinə dəstək 2.5 dəfə artıb…

Fatimə Hacıbəyli: “Şəhid ailələri, müharibə veteranlarına dövlətin maddi dəstəyi ilə yanaşı mənəvi dəstəyi də ən yüksək səviyyədədir”

img

Post-müharibə dövründə göstərilən sosial dəstək tədbirləri açıqlanıb. Post-müharibə dövründə 7 979 şəhid ailəsi üzvünə 15 943, 3 000 müharibə əlilinə 5 900, 81 856 müharibə veteranına 81 856 sosial ödəniş həyata keçirilib.

Həmin dövrdə mənzil və avtomobil təminatı ilə bağlı 11,7 min nəfərə 3 714 xidmət göstərilib, 3500 mənzil şəhid ailələri, müharibə əlilləri və həssas təbəqədən olan digər şəxslərə verilib. Bundan əlavə 214 avtomobil müharibə əlillərinə verilib. Məşğulluq tədbirləri ilə bağlı 12,1 min nəfərə 12,1 min xidmət göstərilib, 7,8 min nəfər özünüməşğulluq proqramına cəlb olunub. Məşğulluq marafonu çərçivəsində 643 işəgötürənin təqdim etdiyi vakansiyalar üzrə 2 366 şəxs işlə təmin olunub.

Qeyd edək ki, şəhid ailələri və xəsarət alan hərbçilər üzrə Vahid Əlaqələndirmə Mərkəzlərində 41 min nəfərin xidmətlə təmin olunduğu göstərilib. Həmin Mərkəz Azərbaycan Respublikası Prezidentinin 25.06.21 Fərmanı ilə yaradılıb. Mərkəzə 6 qurum və 33 YİH orqanı üzrə 26 xidmət daxildir.

Ümumiyyətlə, son 4 ildə şəhid ailələri, müharibə əlillərinə təqaüd və müavinətlər orta hesabla 2,5 dəfə, orta aylıq pensiya 70%, yaşa görə orta aylıq pensiya 75% artıb.

  • “Həssas təbəqəyə göstərilən diqqət bununla da yekunlaşmır, onların sosial vəziyyəti daim nəzarətdə saxlanılır”

Şəhid ailələri və müharibə iştirakçılarına göstərilən dövlət dəstəyi barədə fikir bildirən “Vəfa” Sosial Problemlərə Dəstək İctimai Birliyinin rəhbəri Fatimə Hacıbəyli qeyd etdi ki, şəhid ailələri, müharibə veteranlarına dövlətin maddi dəstəyi ilə yanaşı mənəvi dəstəyi də ən yüksək səviyyədədir: “Dünyada gedən iqtisadi proseslərdən asılı olmayaraq hər il bu işlər həyata keçirilir. Birinci Qarabağ müharibəsi şəhidlərinin ailələri və qazilərinə 850, İkinci Qarabağ müharibəsinin qaziləri və şəhid ailələrinə isə 800-ə yaxın mənzil verilib. Bu proses bu gün də davam edir. Ümumilikdə isə bu günə qədər bu kateqoriyadan olan 10 minə yaxın insan mənzillərlə təmin edilib. Həssas təbəqəyə göstərilən diqqət bununla da yekunlaşmır. Onların sosial vəziyyəti daim nəzarətdə saxlanılır. Nəzərdə tutulmuş müavinətlərin məbləği müntəzəm olaraq artırılır. Bu kateqoriyadan olan insanları, xüsusilə İkinci Qarabağ müharibəsindən sonra işlə təmin etmək üçün Əmək və Əhalinin Sosial Müdafiəsi Nazirliyinə cənab prezident tərəfindən təlimat verilib. Onların müalicəsi ən yüksək səviyyədə həyata keçirilir. Müharibə zamanı əlini, qolunu, ayağını itirmiş qazilərə ən müasir protezlər təqdim edilir".

Birlik sədri xüsusi olaraq qeyd etdi ki, şəhid ailələri, müharibə veteranlarına dövlətin maddi dəstəyi ilə yanaşı mənəvi dəstəyi də hər kəsə bəllidir: “Həm cənab prezident İlham Əliyev, həm də birinci vitse prezident Mehriban xanim Əliyeva tez tez şəhid ailələri, müharibə işirakçıları, müharibə əlilləri ilə görüşür, onların problemləri ilə maraqlanır”.

Günel CƏLİLOVA

Peşə etikası

Son xəbərlər