Bakıxanov məktəblərində 1-ci siniflərə şagird qəbulunda problemlər yenidən baş qaldırıb…

img

Birinci sinfə şagird qəbulu üzrə məktəb seçimi zamanı yerlərin dolması bəzi valideynlərin narazılığına səbəb olub. Onlar məktəb seçimi zamanı yerlərin dərhal dolmasından şikayətlənirlər. Sosial platformada da çoxlu sayda belə narazılıqlara rast gəlmək mümkündür.

Qeyd edək ki, 2022-2023-cü tədris ili üzrə ümumi təhsil müəssisələrinin birinci siniflərinə şagird qəbuluna mayın 4-dən start verilib. Qəbul prosesi  www.mektebeqebul.edu.az elektron portalı vasitəsilə aparılır və qeydiyyat sentyabrın 14-də başa çatacaq. Ancaq paytaxtda övladı birinci sinfə gedəcək valideynlər məktəb seçimi etməkdə çətinliklə üzləşir. Valideynlər qeyd edir ki, övladını məktəbə yazdıra bilmir, onlara “yer yoxdur” cavabı verilir. Bu halla daha çox Sabunçu rayonu, Bakıxanov qəsəbəsində yaşayan sakinlər üzləşir. Valideynlər qeyd edir ki, hər il iyun ayında birinci sinfə başlayacaq uşaqlar üçün məktəb və müəllim seçimi olur. Məktəbəqədər hazırlığa gedənlər avtomatik olaraq bu seçimi etmiş olurlar. Çünki həmin şagirdlər bir il əvvəldən həmin hazırlıq qrupuna gedib deyə avtomatik həmin sinfə düşür. Məktəbəqədər hazırlığa getməyən uşaqlara isə imtina gəlir: “Hansı məktəbi yoxlayırsan, deyir ki, sənə bu məktəbdə yer yoxdur, siniflər doludur və s. Nə qədər uşaq var ki, qapımızın ağzındakı məktəbi seçə bilmirlər. Səbəb olaraq övladımın ərazi üzrə həmin məktəbə düşməməsi göstərilir. Maraqlıdır ki, eyni binada yaşayan bəzi valideynlər övladını bina ilə üzbəüz yerləşən məktəbə yazdıra bilir, amma mən yox. Deyirlər sizin övladınız filan məktəbə düşür. Sistemə girib baxanda görürsən ki, həmin məktəbdə də yer yoxdur. Uşaqlarımız havada qalıb”.

  • Kamran Əsədov: “Problem yerli icra hakimiyyəti orqanlarındakı məktəblərin mikroərazi xəritəsinin düzgün seçilməməsindədir”

Təhsil eksperti Kamran Əsədov bildirdi ki, hazırda məktəb seçimi üçün çoxsaylı valideynlər müraciət edir: “Məktəblərdə vakant yer olmadığı üçün Təhsil Nazirliyi ilk növbədə həmin məktəbin yerləşdiyi ərazidəki uşaqlar qəbul olsun deyə yerli icra hakimiyyəti orqanları tərəfindən verilmiş xəritəyə uyğun olaraq seçim edir. Burada problem yerli icra hakimiyyəti orqanlarındakı məktəblərin mikroərazi xəritəsinin düzgün seçilməməsindədir. Ola bilsin ki, bu zaman hansısa küçələrin adı tam olaraq həmin siyahıya əlavə edilməyib.

Bu gün məktəb seçimi problemini, xüsusən Bakının Xətai, Nəsimi, Nərimanov, Yasamal və Sabunçu rayonları ərazisindəki məktəblərdə görürük. Ona görə də bu problemlə üzləşənlər Təhsil Nazirliyinə fərdi qaydada müraciət edə və ya yerli icra hakimiyyəti orqanından arayış ala bilərlər ki, həqiqətən də məktəbin məsafəsi bu qədərdir və övladının qəbul edilməsi mümkündür”.

  • Nadir İsrafilov: “Hamı istəyir ki, uşağı elit məktəblərdə təhsil alsın, amma hazırki sistemlə bu mümkün deyil”

Təhsil üzrə ekspert Nadir İsrafilov bildirdi ki, birinci sinfə qəbulun mərkəzləşmiş şəkildə aparılmasından sonra qəbul qaydaları dəyişib. Onun sözlərinə görə, əvvəllər müəllimlər keçmiş JEK işçiləri ilə birgə qapı-qapı düşüb birinci sinfə gedəcək şagirləri qeydiyyata alırdılarsa, hazırda mərkəzləşmiş sistem vasitəsilə qəbul elektron formada aparılır: "Keçmiş təhsil nazirlərindən birinin dövründə əmr verildi ki, məktəb və müəllim seçməkdə valideyn müstəqildir. Həmin vaxt əksər valideynlər uşağının ən yaxşı məktəbdə oxuması üçün onu yaşadığı ərazidən kənardakı təhsil müəssisələrinə göndərdi. Bu gün Bakı məktəblərinin bəzilərində buna görə süni sıxlıq yaranıb. Hamı istəyir ki, uşağı elit məktəblərdə təhsil alsın. Amma hazırki sistemlə bu mümkün deyil. Çünki, birinci sinfə şagird qəbulu əsasən ərazi üzrə aparılır. Valideynlər isə çalışır ki, uşağı hansı məktəb yaxşıdırsa, ora qəbul etdirsin. Bu zaman istədiyi məktəbdə yerlər dolanda narazı qalır. Birinci sinfə qəbul elektronlaşdırılsa da, bəzən Bakının mərkəzində yerləşən məktəblərə kənardan şagird qəbulu aparılır. Həmin ərazidə yaşayan uşaq isə yerlər dolduğundan kənarda qalır. Bakının mərkəzində yerləşən məktəblərdə yer olmadığından əlavə korpus inşa etmək mümkün olmur”.

Günel CƏLİLOVA

Peşə etikası

Son xəbərlər