Hamilə qadınlar üçün vacib olan ”İmmunoRho 1500” preparatının saxta versiyası satılır. Səhiyyə Nazirliyində qeydiyyatdan keçməyən, İrandan naməlum mənbələrdən alınıb qaçaqmalçılıq yolu ilə ölkəyə gətirilib, hətta bəzi həkimlər vasitəsilə satılan bu iynə həm hamilə, həm bətndəki körpənin həyatı üçün ciddi təhlükə yaradır.
Məlumatlara görə, artıq bir neçə qadın saxta preparatın qurbanı olub.
“Özəl klinikalarda bəzi həkimlər ona müraciət etmiş pasiyentləri aptekə deyil, öz köməkçilərinə yönləndirib preparatın onlardan alınmasına məcbur edirlər, bununla da…”
Mövzu ilə bağlı fikir bildirən həkim ekspert Pərvanə Mustafayeva qeyd etdi ki, hamilə xanımlar preparatı seçərkən maksimum diqqətli olmalıdırlar: “Hazırda pərakəndə və topdansatışda Azərbaycan Respublikası üçün idxalı qeyri-qanuni, rəsmi sertifikatı olmayan İrandan qaçaqmalçılıq yolu ilə gətirilən İmmunoRHo 1500 BV hazır şpris №1 dərman preparatı var. Qanunsuz yolla idxal edilən İmmunoRHo qanuni yolla idxal olunan İmmunoRHo-dan zərərlidir. Qutu və buraxılış formasında heç bir fərq yoxdur, eynidir. Adi vətandaşlar əsli ilə fərqləndirə bilməz. Məlumat üçün qeyd edim ki, İmmunoRHO insan qanından alınan məhsuldur. Saxlanması xüsusi standarta uyğun temperaturda 2-8 C-də aparılmalıdır. Əks halda parçalanır, keyfiyyət və eyniliyini itirir. Keyfiyyət və eyniliyini itirmiş İmmunoRHo-nun hamilələrdə istifadəsi ana və döldə bir sıra ağır mənfi hallara səbəb ola bilər. Bu dərmanın saxta versiyası ana ilə yanaşı dölə də təsir edir. Hemolitik xəstəlik, anemiya, hidrops, ağır sarılıq, beyin zədələnməsi, beyində geridönməyən dəyikliklər yenidoğulmuşun ölümünə belə səbəb ola bilər”.
Həmsöhbətimiz onu da əlavə etdi ki, həmin preparatı qaçaqmalçılıq yolu ilə ölkəyə gətirənlər sosial şəbəkələrdə onun açıq reklamını təşkil edir və satışını həyata keçirirlər. Xüsusilə özəl klinikalarda bəzi həkimlər ona müraciət etmiş pasiyentləri aptekə deyil, öz köməkçilərinə yönləndirib preparatın onlardan alınmasına məcbur edirlər. Bununla da onlar insan həyatı ilə riskq etdiklərinin fərqində deyillər.
Günel CƏLİLOVA
