Bir neçə gün əvvəl respublikanın ümumtəhsil məktəblərində orta təhsilini başa vuran 91 188 nəfər şagird üçün "Son zəng" çalınıb. Bakı məktəblərinin isə XI siniflərini 23 505 nəfər şagird bitirərək məzun adını qazanıb.
Məzunlar arzularını, öz yoldaşları ilə bağlı düşüncələrini həmin gün ağ kağıza deyil, geyindikləri məzun köynəyinə yazırlar. Məzunların ağ məktəbli köynəklərinə yazılan arzular, sözlər isə müxtəlifdir. Bu il son zəngdə şagirdlərin köynəyinə kriminal aləmin atributlarından olan "Avara" sözü yazılıb. Bu isə cəmiyyətdə narazılığa səbəb olub. Maraqlıdır, "Oğru" aləminin atributlarının orta məktəbdə işlədilməsi nə dərəcədə düzgündür?
“Məktəbin ərazisində hər hansı təbliğat vasitəsi olaraq embelmdən, bu kimi reklam xarakterli məlumatlardan istifadə etmək yolverilməzdir”
Təhsil eksperti Kamran Əsədov qeyd etdi ki, son zəngdə 17 yaşlı şagirdin geyindiyi paltarın üstündə kriminal aləmin atributlarının olması təəssüf doğurur: “Məktəbin ərazisində hər hansı təbliğat vasitəsi olaraq embelmdən, bu kimi reklam xarakterli məlumatlardan istifadə etmək yolverilməzdir. Onlar başa düşməlidir ki, biz şagirdləri milli-vətənpərvərlik ruhunda böyüdürük. Onlara ilkin aşılanmalı olan bacarıqlar, təbii ki, daha çox milli dəyərlərimizin atributlarından istifadə etməkdir. Məsələn, Xarı bulbul, 44 günlük Vətən müharibəsində qəhrəmanlıq göstərən igidərimizin fotoları olmalıdır. Bunlar yoxdur, amma əvəzində "oğru" aləminin atributlarından istifadə edirlər. Deməli, onlar təbliğatını daha yaxşı qurub”.
Həmsöhbətimiz hesab edir ki, hadisənin baş verdiyi məktəbdə tarix, ədəbiyyat dərsləri keyfiyyətli keçirilməyib: “Belə aydın olur ki, biz həmin şagirdlərin şəxsiyyət kimi formalaşmasını öyrədə bilməmişik. Onlara qəhrəman kimi heç nə verə bilməmişik. Yekun nəticədə onlar bu kimi informasiyadan istifadə edirlər. Çox təəssüflər olsun ki, bu gün "oğru" aləminin resurslarından, emblemlərindən istifadə edən gənclərin sayı sürətlə çoxlamaqdadır və nəticədə son dövrlərdə yetkinlik yaşına çatmayan uşaqların iştirakı ilə törədilən cinayətlərin sayında artım müşahidə edilir”.
Günel CƏLİLOVA
