“Naxçıvana təyyarəyə bilet tapılmır. Onlarla adam zəng edib köməklik istəyir. Əməlli-başlı dərəbəylikdir. Biriləri kimsənin rəyini soruşmadan bilet qiymətini qaldırır, biriləri təyyarə sayını qəsdən artırmır ki, Türkiyəyə biletlərin bahalığına görə Naxçıvan üzərindən gedilməsin, nəticədə isə yoxsul Naxçıvan camaatı zülm çəkir”.
Bu sözləri deputat Fazil Mustafa öz Facebook hesabında yazıb. O iddia edib ki, satılan biletlər isə gizli şəkildə turizm şirkətlərinə ötürülənlərdir: “Üstəlik, əldə etdiyim məlumata görə, bu biletlər gizli şəkildə məlum turizm şırkətlərinə satılır. Nə veclərinə, əhali əziyyət çəksin, turizm şirkətləri qazansın. Günlərlə kassa qarşısında növbəyə durub 20 gün sonraya belə bilet tapa bilməyən insanların halına acıyan bir səlahiyyətli şəxs varmı?”
Qeyd edək ki, bir müddət əvvəl Naxçıvan-Bakı reysi üzrə biletin qiyməti 10 manat bahalaşaraq 60 manat olub.
Bildirək ki, Naxçıvana bilet satışında problemin yaranması həmin bölgədən olan insanların narazılığına səbəb olur. Bilet tapa bilməyən vətəndaşlar qeyd edir ki, Naxçıvana getmək üçün bilet tapılmır: “Biletlər onlayn satılır, sistemə baxanda biletin olmadığı görünür, AVİAKASSA-nın qarşısında son günlər çoxlu sayda adam bilet almaq üçün növbə gözləyir. Insanlar çarəsiz vəziyyətdə qalıb”.
“Biletlər turizm şirkətlərinə baha qiymətə satıldığı üçün bu gün kassalarda bilet tapılmır”
Sosial sahə üzrə ekspert İlqar Hüseynli “Bakı-Xəbər”ə açıqlamasında qeyd etdi ki, AzAL özünü “qoçu” şirkət kimi aparır: “Dünya ölkələri ilə müqayisədə ən bahalı aviabilet məhz ölkəmizdədir. Pandemiya dövründə dövlət büdcəsindən bu şirkətə 80 milyon kompensasiya ödənildi. Ümumiyyətlə, hər il AzAL-a müəyyən məbləğdə maliyyə ayrılır. Aviabiletlərin qiyməti çox bahadır, keyfiyyət isə aşağıdır”.
Həmsöhbətimizin sözlərinə görə, qiymətin qalxması bir yana, naxçıvanlılar öz evlərinə getməyə bilet tapa bilmir: “Bu vəziyyət onu deyir ki, AzAL öz işini lazımi səviyyədə icra edə bilmir. Biletlərin tapılmamasının səbəbi onların turizm şirkətlərinə satılmasıdır. Məlumdur ki, Naxçıvana tur səfərlər təşkil olunur. Biletlər turizm şirkətlərinə baha qiymətə satıldığı üçün bu gün kassalarda bilet tapılmır”.
Ekspert hesab edir ki, AzAL-la bağlı baş verən xoşagəlməz olaylara son qoyulması üçün dövlət tərəfindən reaksiya verilməlidir.
Günel CƏLİLOVA
