Bəzi informasiya resurslarında və sosial şəbəkələrdə Azərbaycanda bəzi orta məktəblərin 6 günlük tədris həftəsinə keçirilməsinin planlaşdırıldığı ilə bağlı məlumatlar yayılıb. Buna səbəb kimi məktəblərdə olan şagird sıxlığı göstərilir.
Hətta artıq bununla bağlı orta ümumtəhsil məktəblərinə təlimatlar verildiyi də qeyd olunur.
Məlumatı verən qaynaqların fikirlərinə görə, məktəblərdə şagird tutumundan çox sayda şagirdin təhsil alması bir növbəlilik sisteminin davam etdirilməsinə imkan vermir. Bu səbəbdən 6 günlük tədris həftəsinə keçidlə bağlı sistemin işə düşməsi üçün ciddi işlər gedir. Belə ki, növbəti tədris ilindən etibarən bütün siniflər üzrə dərs saatlarının sayı azaldılmaqla 6 günlük tədrisə başlanılacaq.
Belə bir addımın atılması mümkündürmü və bunun təhsilə nə kimi təsiri ola bilər?
Tarix elmləri doktoru, professor Məhərrəm Zülfüqarlı “Bakı-Xəbər”ə açıqlamasında bildirdi ki, bu çox yaralı yerimizdir: “Görünür, bu təşəbbüsdə olanlar Azərbaycan təhsilini təkmilləşdirmək əvəzinə, onu daha da çətinləşdirmək yolunu tutublar. Əksinə, 5 günlük tədrisi bir qədər sadələşdirmək lazımdır ki, uşaqların məktəbə marağı artsın. Şagirdi məktəbə bağlayan təşəbbüsləri dəstəkləmək lazımdır. Siz deyən məsələ isə şagirdi məktəbdən uzaqlaşdırır. Bunun üçün altetnativ variantlar mövcuddur. Büdcədən oğrulanan vəsaitlərin qarşısı alınmalıdır. Belə olan təqdirdə büdcədə daha çox vəsait olar. Bunun da nəticəsində təhsilə daha çox pul ayrılar. Onda məktəbdəki şagird sıxlığı da aradan qaldırılmış olar. Eyni zamanda, işsiz müəllimlərin də iş tapmaq problemi öz həllini tapar. Bu da Azərbaycanın gələcəyinə dəstək olar. Azərbaycan dövlətçiliyini ürəkdən istəyən insanlar yalnız bu cür düşünə bilərlər. 6 günlük tədrisə keçid təhsildə olan problemlərin bir az da artmasına gətirib çıxarar. Mənə belə gəlir ki, səlahiyyətli qurumlar mütləq mənada bunun qarşısını almalıdırlar. 5 günlük tədrisin saxlanması və bunun da sadələşməsinə keçmək lazımdır. Dünyanın inkişaf etmiş ölkələrinin praktikasına nəzər yetirmək lazımdır. Heç yerdə belə təcrübəyə rast gəlməzsiniz. Biz geriyə qayıtmamalıyıq, çalışıb irəli getməliyik”.
Məhəmmədəli QƏRİBLİ
