İyunun 12-də DİM tərəfindən doktorantura və dissertantura səviyyəsində xarici dildən qəbul imtahanı və fəlsəfə doktoru imtahanları keçirilib. İmtahan Bakı və Naxçıvan şəhərlərdə keçirilib.
Ancaq imtahan iştirakçıları imtahanın gedişatı ilə bağlı narazı qalıblar. Iyunun 13-də doktoranturaya sənəd verən namizədlər imtahan prosesindən narazıdırlar. Buna görə də onlar Dövlət İmtahan Mərkəzinin (DİM) qarşısına toplaşıblar.
Imtahan iştirakçıları qeyd edir ki, imtahan zamanı istifadə olunan dinləmə mətnlərinin səsləndirmə qurğusundakı ardıcıllığı və onlara cavab vermək üçün kitabçada dinləmə mətnləri üzrə sualların ardıcıllığı üzrə texniki nasazlıq baş verib. Bu da onların nəticəsinə təsir edib.
Dövlət İmtahan Mərkəzi: “Baş verən uyğunsuzluqla əlaqədar bütün imtahan iştirakçılarından üzr istəyirik”
Baş verən hadisə ilə bağlı Dövlət İmtahan Mərkəzindən bildirildi ki, 12 iyun 2022-ci il tarixində doktorantura və dissertantura səviyyəsində xarici dildən qəbul imtahanı və fəlsəfə doktoru imtahanları keçirilib: “Bu imtahanlarda iştirakçıların dinləyib-anlama bacarıqları da yoxlanılır. Təəssüf ki, iyunun 12-də keçirilən imtahanda istifadə olunan dinləmə mətnlərinin (monoloq və dialoq) səsləndirmə qurğusundakı ardıcıllığı (əvvəl monoloq, sonra dialoq) və onlara cavab vermək üçün kitabçada olan dinləmə mətnləri (əvvəl dialoq, sonra monoloq) üzrə sualların ardıcıllığı dəyişik verilib. Qeyd olunan hal aşkar olunduqdan sonra bu uyğunsuzluq haqqında imtahan iştirakçılarına məlumat verilib və dinləmə mətnləri yenidən səsləndirilərək onlara kitabçada olan uyğun sualların (monoloq üzrə 6-10, dialoq üzrə 1-5) hansılarına bu mətn əsasında cavab vermək lazım olduğu bir daha izah olunub, həmçinin müəyyən vaxt itkisinə yol verildiyi üçün imtahanın müddəti əlavə olaraq 30 dəqiqə artırılıb. Yəni bu uyğunsuzluğun yaratdığı anlaşılmazlığı yerində aradan qaldırmaq mümkün olub. Bununla belə, baş verən uyğunsuzluqla əlaqədar bütün imtahan iştirakçılarından üzr istəyirik. Baş vermiş halla əlaqədar dinləmə mətnlərinin cavablandırılmasında çətinlik çəkdiklərini iddia edən iştirakçıların müraciəti əsasında Dövlət İmtahan Mərkəzi tərəfindən onların bu imtahandakı yalnız dinləmə bloku üzrə nəticələri ləğv edilərək həmin blok üzrə yenidən imtahan təşkil olunacaq. Bu imtahandan toplanılan bal dinləmə bloku üzrə yekun imtahan nəticəsi kimi əsas götürüləcək”.
Elçin Əfəndi: “Texniki problem ucbatından yaranan vəziyyətə görə DİM-in güzəşt etməsi təqdirəlayiq haldır”
Təhsil eksperti Elçin Əfəndi qeyd etdi ki, imtahanda texniki problemin yaşanmaması arzuolunandır: “Bu problemlər imtahan verənlərin vaxt itkisinə və psixoloji olaraq çaşqınlıq yaşamasına səbəb olub. İtirilmiş dəqiqələrə görə kompensasiya olsa da, ümumilikdə, imtahan verənlərdə çaşqınlığın yaşanması imtahan motivasiyanın aşağı düşməsinə yol açıb. Bu məsələ ilə bağlı onlarla müraciət daxil olub. Həmin şəxslər nəticələrin hansı kriteriyalara görə hesablanacağını öyrənmək istəyirlər. Texniki problem ucbatından yaranan vəziyyətə görə DİM-in güzəşt etməsi təqdirəlayiq haldır. Onu da qeyd edim ki, bu cür problemin yaşanmasında idarəetmə səviyyəsinin aşağı olduğunu demək düzgün olmaz. DİM hər il imtahanlar keçirir, eyni zamanda, keçirdiyi imtahanlarda kifayət qədər namizədlər iştirak edir”.
Günel CƏLİLOVA
