Prezident İlham Əliyevin respublikanın bütün şəhər və rayonlarında yolların çəkilməsi və təmirinə çox böyük diqqət yetirdiyi, buna dair çoxsaylı sərəncamlar verdiyi məlumdur. Prezidentin imzaladığı belə sərəncamlardan birində deyilir: “Doqquz min nəfər əhalinin yaşadığı 28 yaşayış məntəqəsini birləşdirən Piran- Hamarat -Vıjaker avtomobil yolunun tikintisi məqsədilə Azərbaycan Respublikasının 2018-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş 11,3 (on bir milyon üç yüz min)manat Azərbaycan Avtomobil Yolları Dövlət Agentliyinə ayrılsın”.
Təəssüf ki, ayrılan vəsaitin heç yarısı da adıçəkilən yola sərf olunmayıb. Əvvəla yolun Hamarat - Vıjaker hissəsində daşda-daş üstə qoyulmayıb. Bu təqribən 6 kilometr məsafəni birləşdirir. Dünya standartlarına uyğun tikilmiş yolun Piran- Hamarata hissəsində dörd il müddətində o qədər cala-çuxurlar yaranıb ki, saymaqla qurtarmaz. Nəqliyyatın hərəkəti üçün ciddi təhlükə yaradan sürüşmələr, mövcud qüsurların sayı hər gün də artır. Sözün qısası, yolun hal-hazırki vəziyyət günün tələbləri səviyyəsində deyil. Haramzadələr dövlətin əhalinin rahatlığının təmini üçün ayırdığı pulu mənimsəməkdən ötrü yolu keyfiyyətsiz tikiblər.
Piran-Hamarat – Vıjaker yolu əsasan dağlıq ərazilərdən keçir. Bu relyefə uyğun sünni qurğular tikilməyib. Yolda istinad divarları yoxdur, nəticədə bir balaca yağış yağanda dağlardan iri qaya parçaları, palçıq kütləsi buraya tökülür. Həm də sudan mühafizə tədbirləri yarımçıq görülüb, yolda sürüşmələr ara vermir. Hətta çox yerdə su keçən borular belə qoyulmayıb. İqtisadiyyatın şah damarını kəsməklə bərabər, həm də işlərin çoxu yarımçıq görülüb. Odur ki, indi Piran-Hamarat –Vıjaker yolunun təmirinə ciddi ehtiyac var.
Zəfər ORUCOĞLU Azərbaycan Jurnalistlər Birliyinin üzvü
