İnternet resurslarının inkişafı, sosial şəbəkələrin genişlənməsi heç də həmişə insanların xeyrinə olmur. Çox təəssüflər olsun ki, bu platformalardan insanlıq əleyninə mənəvi hücumlar təşkil etmək üçün istifadə edən kiberşəbəkələr peyda olub. Son dövrlər sosial şəbəkələrdə saxta profillərdən şantaj edilənlərin sayı kifayət qədərdir. Artıq bu təhlükə o həddə çatıb ki, bu barədə Daxili İşlər Nazirliyindən ölkə vətəndaşlarına xəbərdarlıq edilib.
“Sosial şəbəkələrdə xaricdən idarə olunan feyk hesablar vasitəsilə şantaj halları var”. Bunu Daxili İşlər Nazilriyinin Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev deyib. O bildirib ki, bununla bağlı artıq bir neçə şəxs müraciət edib: “Sosial şəbəkə üzvlərini diqqətli olmağa, sosial şəbəkələrdə qeyri-etik, müzakirələrə səbəb olacaq münasibətlərdən, görüntülü kommunikasiyadan çəkinməyi tövsiyə edirik. Danışıq, foto və videogörüntülər qeydə alınmaqla, dostluq hesabında olan başqa şəxslərə göndərilməməsi üçün ilkin 500-1000 € tələb olunur”.
“DİN-in bu rəsmi çağırışına ciddi və həssaslıqla yanaşıb ehtiyatlı olmaq lazımdır”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev “Bakı-Xəbər”ə şərhində bildirdi ki, DİN-in xəbərdarlıq çağırışı birbaşa vətəndaşların təhlükəsizliyi ilə bağlıdır və hər bir vətəndaş bu məsələyə çox diqqətlə, həssaslıqla yanaşmalıdır. “Mən DİN-in Mətbuat Xidmətinin KİV və ictimaiyyətlə əlaqələr şöbəsinin rəisinin narahatlığında əsas görürəm, çox diqqətli olmaq gərəkdir. Düşünürəm ki, sosial şəbəkələrdə qeyri-etik ifadələr işlədənlər, qeyri-etik video görüntülər paylaşanlar, burada əxlaqa sığmayan əməllərlə məşğul olanlar çoxdur. Ümumiyyətlə, “Facebook” məkanı kifayət qədər bulanlıq bir məkandır və burada normal, sağlam bir mühit yaratmaq da çətindir. Burada ən əvvəl peşəkarlıq tələb olunur. Bu peşəkarlıq nə qədər gücülü, miqyaslı olarsa düşünürəm ki, kənardan da Azərbaycan “Facebook” məkanına belə xoşagəlməz görüntülər o qədər də daxil ola bilməz. Qeyd etdiyim ki, bura kifayət qədər bulanlıq bir məkandır və burada neqativlər də kifayət qədərdir. O da məlumdur ki, müəyyən kibercinayətkar qüvvələr də burada mövcuddur. O qüvvələrin məqsədi insanları şantaj yolu ilə ələ almaq və onlardan konkret məbləğdə vəsait qoparmaqdır. Vətəndaşlarımız tanımadıqları şəxslərdən gələn müraciətləri qəbul etməməlidirlər. Tanımadıqları adamlarla sosial şəbəkə üzərindən əlaqə qurmaq insanları təhlükəyə atır. Sosial şəbəkələrdən istifadə edən hər bir Azərbaycan vətəndaşı heç bir halda o qara qüvvələrin toruna düşməməlidir, sona qədər öz vətəninə sədaqət nümayiş etdirməlidirlər”.
Ş.Əliyev qeyd etdi ki, xaricdən idarə olunan feyk hesabları yaradan şəbəkənin hədəfi Azərbaycan dövləti və Azərbaycan vətəndaşıdır. Kənardan idarə olunan bu feyk profillərin toruna düşənlərin də olduğunu deyən Ş.Əliyevin sözlərinə görə, bu istiqamətdə hər kəs öz əlindən gələni etməlidir. Hər birimizin ictimai mühiti qorumalı olduğumuzu bildirən Ş. Əliyev qeyd edir ki, belə təhlükəli feyk profillərlə qarşılaşdıqda onları kütəvi şəkildə bloklamalıyıq:“O dərəcədə diqqətli olmalıyıq ki, bu cür feyk profillər qarşımıza çıxdıqda onları kütləvi olaraq bloklamalıyıq. Azərbaycan Respublikasının Cinayət Məcəlləsində kibercinayətkarlıqla bir fəsil var. Təxminən 5 il əvvələ qədər kibercinayət faktları o qədər də çox olmurdu. Amma son illərə diqqət yetirdikdə görürük ki, bu istiqamətdə saysız cinayət faktları üzə çıxarılıb, nə qədər cinayət məsuliyyətinə cəlb olunanlar var. Müvafiq dövlət qurumlarının fəaliyyət istiqamətindən kənarda belə halların baş verməsi çox çətin və risqlidir. DİN-in bu rəsmi çağırışına ciddi və həssaslıqla yanaşıb ehtiyatlı olmaq lazımdır. Ən əsası da cəmiyyətimizin sağlamlığı üçün addımlar atmalıyıq. Düşünürəm ki, kimsə belə hallarla rastlaşarsa müvafiq dövlət qurumlarına çəkinmədən məlumat verməlidir, anonim də olsun xəbər ötürməlidirlər. Bu bir növ vətəndaşların, sosial şəbəkə istifadəçilərinin dövlət qurumlarına bir dəstəyi olardı”.
İradə SARIYEVA
