Azərbaycan MDB ölkələri arasında taksi xidmətinin yüksək tariflərinə görə ikinci yerdə qərarlaşıb. Ölkədə bir kilometr məsafənin gediş haqqı orta hesabla sərnişinə 1 manata başa gəlir. "Numbeo" qlobal bazasının hesabatına görə, Birlik məkanında ən bahalı taksi xidməti Türkmənistandadır. Orada bir kilometr gediş haqqı 1,46 manat təşkil edir.
MDB ölkələrində ən ucuz taksi Belarusdadır. Bu ölkədə xidmətin orta qiyməti 1 km üçün 0,25 manat, Qırğızıstanda 0,32 manat, Özbəkistanda isə 0,34 manatdır. Sonrakı yeri Moldova tutur. Burada 1 km məsafəni 36 qəpiklə getmək olar. Ermənistanda isə eyni məsafəyə görə cəmi 39 qəpik ödəmək lazım gəlir.
“Tıxac zamanı müəyyən olunandan daha çox yanacaq sərf olunur ki, bu da öz təsirini qiymətdə göstərir”
Taksi xidmətinin nə səbəbdən baha olması barədə fikir bildirən sosial sahə üzrə ekspert Elxan Əliyev qeyd etdi ki, ölkəmizdə taksi xidməti qiymətlərinin qonşu ölkələrlə müqayisədə baha olması yanacağın qiymətinin bir qədər baha olması ilə bağlıdır: "Taksi sürücüləri ilə aparılan söhbətlər zamanı onlar bildirir ki, tıxaclarda qalarkən yanacaq sərfiyyatı daha çox gedir. Tıxac zamanı müəyyən olunandan daha çox yanacaq sərf olunur ki, bu da öz təsirini qiymətdə göstərir. Ona görə də, ola bilsin tıxac məsələsi ilə bağlı olaraq, ölkəmizdə qonşu dövlətlərlə müqayisədə taksi xidməti də bahadır. Burada bir nüans da var. Azərbaycanda qiymətin formalaşma amilləri mövcuddur. Qiymət bir neçə səbəbdən formalaşır. Düşünürəm ki, bu sektorda fəaliyyət göstərən şirkətlər arasında qeyri-rəsmi sövdələşmənin olması da, nəticə etibarilə taksi xidməti qiymətləri arasında fərqin hiss olunmamasına gətirib çıxarır. Bir müddət əvvəl bəzi şirkətlər daha ucuz qiymət təklif edirdi və insanlar da onlara zəng etməklə taksi sifarişinə daha çox üstünlük verirdi. Amma artıq zənglərlə işləyən şirkətlər də qiymət həddi müəyyənləşdirdi və bu hədd digərləri ilə, demək olar ki, eynidir. Belədə Bakıda 12-15 km məsafəni qət etmək üçün 7-8 manat, müxtəlif saatlarda isə hətta 10 manat alırlar. Taksi fəaliyyəti ilə məşğul olan əksər şirkətlər də bu həddi gözləyir. Ciddi azad rəqabət olarsa, həmin sahədə daha ucuz qiymətlərin olmasına rast gələ bilərik. Hərçənd, indi də bəzi şirkətlər bonus kampaniyaları keçirir və bu zaman hardasa 20-30 faizlik endirimlər müşahidə olunur. Lakin bu hal böyük məsafəyə sərf olunan məbləğlərdə hissi olunur. İnsanlar özləri də bu kimi bonus kampaniyalarından geniş yararlanmır.İstənilən halda, düşünürəm ki, taksi xidməti növü qiymətə təsir edəcək səviyyədə yüksək deyil. Burada hansısa optimal qiymət olmalıdır. Optimal qiymət də Bakı küçələrinin yüklənməsi intensivliyinə, təyinat ünvanına çatdırılmasına ölçülməlidir. Bu mənada da hazırki qiymət haqları yüksəkdir. Bakıdan Gəncəyə 4 saatlıq yolla, Bakının bir rayonundan digərinə taksi ilə getməyə eyni vəsait tutulması, təbii ki, qiymətin yüksək olmasından xəbər verir. Bu disbalans da aradan qaldırılmalı, həmin qiymətlər yenidən nəzərdən keçirilməlidir"
Günel CƏLİLOVA
