Dövlət Məşğulluq Agentliyinin sədri Mustafa Abbasbəyli Vətən müharibəsi qazilərinin məşqulluğunun təmin edilməsi, onlara göstərilən sosial dəstəklə bağlı keçirdiyi mətbuat konfransında bildirib ki, dörd min şəhid ailəsi üzvü və Vətən müharibəsi qazisi təklif olunan işdən imtina edib.
Sədr qeyd edib ki, 805 nəfər ictimai işlərə cəlb olunub: “Bugünə qədər 1 000-dən artıq şəhid ailəsi üzvü və Vətən müharibəsi qazisi işlə təmin olunub. 4000-ə yaxın şəxs müxtəlif səbəblərdən onlara təklif olunan işlərdən imtina edib. 1 500-dən artıq şəxs müasir peşələr üzrə prosesə cəlb olunub. İlin sonuna qədər bu sayı 4000, gələn il üçün 7 000-ə, sonrakı il üçün 10 000-ə çatdırmağı hədəfləyirik. Son üç ildə 1026 peşə kvalifikasiya standartları hazırlanıb. İlin sonuna 1500-ə yaxın standartın yekunlaşdırılması nəzərdə tutulub”.
Dörd min şəhid ailəsi üzvü və Vətən müharibəsi qazisi onlara təklif olunan işdən nələri səbəb gətirib imtina edirlər? Təklif olunan iş yeri xoşlarına gəlməyib, yoxsa maaş onları qane etməyib?
“Burada söhbət heç bir məşğulluq dəstəyi istəməyən adamlardan gedir”
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyinin Strateji Kommunikasiya Departamentinin müdiri Mayis Musayev “Bakı-Xəbər”ə açıqlamasında bildirdi ki, sözügedən şəxslər işə ehtiyac duymayanlardır. M.Musayev qeyd etdi ki, onların bir qisminin iş yerləri var, çalışırlar, Bir qisminin isə maddi durumları yaxşı olduğu üçün işdən imtina ediblər. “İmtinanın səbəbi müxtəlifdir. Onların arasında işi, məşğuluğu var deyə işləmək istəməyənlər də, ailəsinin maddi vəziyyəti yaxşı olduğu üçün imtina edənlər də olub”.
“Ola bilərmi ki, onlar arasında təklif olunan işin xarakteri onlara uyğun gəlmədiyi üçün imtina edənlər də olsun?” – sualımıza cavabında M.Musayev bildirdi ki, belə olsarsa bu tam imtina sayılmır: “Biz əlimizdə olan vakansiyalardan təklif edirik, bu onların xoşuna gəlmirsə, başqa bir uyğun iş istəyirsə tam imtina etmiş sayılmır. Burada söhbət heç bir məşğulluq dəstəyi istəməyən adamlardan gedir. Bunlar işə ehtiyacı olmayan, özünün dolanışığı olan, ehtiyacsız insanlardır. Eləsi də olub ki, mən işləmək istəmirəm, ehtiyacım yoxdur deyib”.
“Maraqlıdır, onlara hansı sahələr üzrə işlər təklif olunub?” M.Musayev qeyd etdi ki, təmsil etdiyi qurumda üç istiqamət üzrə iş təklifləri olur: “Birinci istiqamət mövcud vakansiya bankında olan, bizə verilmiş vakansiya ilə bağlı təkliflər olur. Adamın ixtisasına, sənət təcrübəsinə uyğun olaraq o vakansiyalardan təklif olunur. Orada vətəndaşı qane edəcək bir vakansiya olmadığı təqdirdə ona özünüməşğulluq proqramı təklif olunur. Özünüməşğulluq proqramında da 40-a yaxın istiqamıt var. O istiqamətdə də qoşula bilərlər. Bu ümumi hamıya aiddir. Onu da qeyd edim ki, vətəndaşa peşə hazırlığı təklif edirik. Yəni bəlkə indiyə qədər işlədiyi sahə, təcrübəsi və sair bu gün əmək bazarında iş tapmağa ona uyğun gəlmir. Bu halda vətəndaş istəyərsə biz onu peşə hazırlığına cəlb edirik və ona uyğun məşğulluğuna dəstək verə bilirik”.
İradə SARIYEVA
