Təhsil Nazirliyinin həyata keçirdiyi funksiyalar artırılıb. Bu, Prezident İlham Əliyevin imzaladığı fərmanla “Azərbaycan Respublikasının Təhsil Nazirliyi haqqında Əsasnamə”də edilən dəyişiklikdə əksini tapıb. Fərmana əsasən, Təhsil Nazirliyi təhsilverənlərin etik davranış və müəllimlərin işə qəbulu və yerdəyişməsi qaydalarını təsdiq edəcək.
Maraqlıdır, yeni fərmanla Təhsil Nazirliyi hansı səlahiyyətləri əldə edib və təhsilin keyfiyyətinə necə təsir edəcək?
“Əsasnamədə qeyd edilən nüanslar düzgün şəkildə icra olunarsa, bu, keyfiyyətə də müsbət təsir edər”
Tarix elmləri doktoru, professor Məhərrəm Zülfüqarlı “Bakı-Xəbər”ə açıqlamasında bildirdi ki, təhsildə yaşanan problemlərin həll olunması ilə bağlı Azərbaycan Respublikasının Təhsil Nazirliyi haqqında Əsasnamə”də qeyd edilən nüanslar düzgün şəkildə icra olunarsa, bu, keyfiyyətə də müsbət təsir edər: “Məlum sərəncamı icra etmək üçün Təhsil Nazirliyində çalışan şəxslər ekspertləri dəvət edib, bu sahədə yaşanan problemləri həll etmək üçün birgə rəy hazırlamalıdır. Əsas keyfiyyətə diqqət etmək lazımdır”.
Həmsöhbətimiz onu da əlavə etdi ki, təhsil sahəsində istənilən islahatı keçirmək üçün ilk növbədə müəllimin sosial problemini həll etmək lazımdır: “Prezidentin məlum fərmanında gözəl fikirlər var. Fərmanın icrası ilə məşğul olan şəxslər bu sahənin mütəxəssisi olmalıdır. Ümumiyyətlə, təhsilin keyfiyyətini artırmaq üçün köklü islahat aparmaq lazımdır”.
Ekspertin sözlərinə görə, müəllimlərin etik davranış qaydaları sonuncu dəfə 2014-cü ildə qəbul edilib: “Nazirlik müəllimlərin davranışı, geyimi, cəmiyyətdəki mövqeyilə bağlı müəyyən dəyişiklik etmək istəyəndə bununla bağlı sorğunu Nazirlər Kabinetinə göndərir. Nazirlər Kabineti də qanundursa, onu Milli Məclisə göndərir, qərardırsa, özü 6-7 aydan 1 ilə qədər müddətdə cavab verir. Nəticədə prosesin uzanması ilə çeviklik aradan qaldırılır. Müəllimlərin işə qəbulu üçün imtahanların keçirilməsilə bağlı da hər il Nazirlər Kabinetinin qərarı olmalıdır. Təhsil Nazirliyi isə qaydalarda mütəmadi olaraq dəyişiklik, yenilik etmək istəyir. Prezidentin fərmanından sonra isə bu tip vacib məqamlarda qərar qəbul etmək birbaşa nazirliyin öz səlahiyyətində olacaq”.
Günel CƏLİLOVA
