Dağlar diyarı Lerik rayonun Küsəkəran kəndində dünyaya göz açmış Baləmir Şirməmməd oğlu Məmmədov müqəddəs, şərəfli bir yolda - Vətən, torpaq uğrunda şəhid olub. O, Birinci Qarabağ müharibəsində erməni dığalarına qarşı son nəfəsinə qədər qəhrəmancasına döyüşüb. Şərəfli ölümü ilə millətinə başucalığı gətirən Baləmir öz elində hər an ehtiramla yad olunur, Vətənə, torpağa sevgi nümunəsi olaraq örnək göstərilir. Həm də bu Vətən sevdalısının xatirəsinə doğma Küsəkəran kəndinin ən yaraşıqlı guşəsində bulaq kompleksi inşa edilib. İndi yurdun and yerinə çevrilən, igidliyin, hünərin zirvəsi kimi görünən kompleksin açılış mərasiminə demək olar ki, rayonun əksər yerindən adam gəlmişdi.
Azərbaycan Respublikasının Dövlət Himnin sədaları altında mərasim başlandı. Vətəni canından əziz tutub yolundan keçən qəhrəmanların xatirəsi bir dəqiqə sükutla anıldı. Şəhid qardaşı Alməmməd Məmmədovun iştirakı ilə bulaq kompleksinin üzərindən örtük götürüldü, ətrafına gül-çiçək dəstələri qoyuldu. Mərasimdə aparıcı Hüsaməddin Abbasov ziyarətçilərə şəhidin dəyərli ömür yolundan ətraflı məlumat verib və çıxışlar başlandı.
Rayon icra hakimiyyəti başçısının səlahiyyətlərini icra edən C. Baxşıyev şəhid ailələrini, kənd sakinlərini salamladı, bulağın tikintisində dəstək göstərən, eləcə zəhməti olan hər kəsə minnətdarlığını bildirib dedi:- Artıq əzəli, əbədi yurd yerimiz Qarabağda Azərbaycan bayrağı dalğalanır. Dövlət başçımız, Silahlı Qüvvələrin Ali Baş Komandanı cənab İlham Əliyevin rəhbərliyi altında müzəffər Ordumuz 30 illik həsrətə 44 gündə son qoydu. Qalib tərəf kimi tarixə düşən ordumuzun şücaəti hesabına Birinci Qarabağ müharibəsində şəhid olmuş Vətən övladların də qisası alındı. Həm Birinci Qarabağ, həm də Vətən müharibəsində Lerik rayonundan olan qəhrəman oğullarımız hərbi əməliyyatlarda misilsiz rəşadət göstəriblər. Azərbaycanın müqəddəsliyini hər şeydən üstün tutan, onun yolunda şəhid olan Baləmir kimi igidlərin adı heç vaxt xalqın yaddaşından silinməz. Onların səpdiyi qəhrəmanlıq toxumu minlərlə ürəkdə cücərməklə həmişə Vətənə şərəf gətirər.
Mərasimdə Səfərbərlik və Hərbi Xidmətə Çağırış üzrə Dövlət Xidmətinin Lerik rayon Şöbəsinin rəisi A. Həsənov, kənd ağsaqqalı G. İsiyev və şəhidin adını daşıyan Küsəkəran kənd ümumi orta məktəbinin direktoru A. Yəhyayev çıxışlarında ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarını xalq qəlbində yaşatmaqla həmişə onlarla qürur duyduğunu vurğuladılar. Şəhidin qardaşı Alməmməd Məmmədov, əmisi oğlu Akif Ağayev çıxış edərək şəhid ailələrinə göstərilən diqqət və qayğıya görə ölkə başçısına minnətdarlıq etdilər.
Məktəblilərin ifasında səslənən Vətəni, qəhrəmanlığı vəsf edən şerlər dalğa-dalğa ətrafı aldı. Şəhidlik zirvəsindən gələcəyə boylanan, mənən diri Baləmir Məmmədova ərməğan üçün...
Zəfər ORUCOĞLU
Azərbaycan Jurnalistlər Birliyinin üzvü
