Havalar istiləşdi və ictimai nəqliyyatda olan kondisioner problem, hər il yayda olduğu kimi, yenidən aktuallaşdı. Bu problem həm ictimai nəqliyyatdan istifadə edən sərnişinləri narahat edir, həm də avtobus sürücülərinin özlərini. Avtobuslarda nəfəs almaq olmur, günün pik saatlarında isə sərnişinlər tərləyərək getməyə məcbur olur.
Qeyd edək ki, paytaxdakı bəzi sərnişin avtobuslarında kondisoner sistemi olsa da, bəzi daşıyıcı şirkətlər hələ də köhnə model nəqliyyat vasitəsələri ilə vətəndaşlara xidmət göstərirlər. Sərnişinlər deyir ki, yayın gəlişi ilə belə avtobuslardan istifadə etmək müəyyən çətinliklər yaradır.
Qeyd edək ki, bu problem tək köhnə avtobuslarda deyil, eyni zamanda, yeni istifadəyə verilən “Baku Bus” daşıyıcılarında da müşahidə edilir. Halbuki, Bakı Nəqliyyat Agentliyi iyunun 1-dən kondisionerlərin işləyəcəyi ilə bağlı məlumat yaymışdı.
"BakuBus" - Qabil Babayev: “Təchizat zəncirinin pozulması səbəbindən ehtiyat hissələrinin çatışmazlığı mövcuddur”
Məsələ ilə bağlı Bakı Şəhər İcra Hakimiyyəti tabeliyində "BakuBus" MMC-nin mətbuat katibi Qabil Babayev bildirdi ki, təchizat zənciri pozulduğu üçün ehtiyat hissələrinin çatışmazlığı mövcuddur: “Hazırda cəmiyyətimiz tərəfindən müntəzəm marşrut xətlərində istifadə olunan avtobusların 90 faizində kondisionerlər standart olaraq çalışır. Hazırda, bir sıra sahələrdə olduğu kimi, təchizat zəncirinin pozulması səbəbindən ehtiyat hissələrinin çatışmazlığı mövcuddur. Lakin yaxın vaxtlarda respublikamıza ehtiyat hissələrinin gətirilməsi gözlənilir. Ehtiyat hissələri tədarük edildikdən sonra avtobuslarda işləməyən kondisionerlər də təmir olunacaq”.
Mais Ağayev: “Daşıyıcılar bu hala xüsusilə diqqətlə yanaşmalıdırlar, çünki burada söhbət sərnişinlərin yay mövsümündə daşınmasından gedir”
Bakı Nəqliyyat Agentliyinin mətbuat katibi Mais Ağayev bildirdi ki, belə tapşırıqlar daşıyıcı şirkətlərin qarşısına öhdəlik kimi qoyulur: “Tənzimləyici qurum olaraq BNA müntəzəm sərnişindaşıma fəaliyyəti göstərən şirkətlərə yay mövsümünə keçid, o cümlədən sərinləndirmə sisteminə işə salınması ilə bağlı müvafiq tapşırıq da verib. Bu tapşırığa uyğun olaraq da iyunun 1-dən avtobuslarda sərinləndirmə sistemləri işə salınıb. Bəzən bir xətt üzrə sərinləndirmə sistemləri işlək vəziyyətdə olmur. Daşıyıcılar bu hala xüsusilə diqqətlə yanaşmalıdırlar, çünki burada söz sərnişinlərin yay mövsümündə daşınmasından gedir. Bu cür çatışmazlıqlar qısa müddətdə aradan qalxmalıdır. Sərinləndirmə sistemi olmayan avtobusların əvəzləməsinə gəlincə isə, bu, mərhələli şəkildə aparılan prosesdir. Paytaxtda avtobus parkının yenilənməsi işləri gedir və bu işlər çərçivəsində son 6 ildə Bakı şəhərində istismarda olan avtobusların təxmini 50 faizi artıq yenilənib. Bu avtobuslarda da sərinləmə sistemi mövcuddur”.
Günel CƏLİLOVA
