Sosial şəbəkələrdə uşaq bağçalarının birində azyaşlıya qarşı zorakılığı əks etdirən görüntü paylaşılıb. Həmin görüntüdə bağça əməkdaşının azyaşlının saçından tutaraq silkələməsi əks olunub. Videogörüntü sosial platformada sərt tənqidə səbəb olub.
Azyaşlıya qarşı zorakılığı əks etdirən uşaq bağçasının adı məlum olub. Araşdırma zamanı üzə çıxıb ki, Şamaxı şəhər 3 saylı uşaq bağçasının aşpazının ad günü münasibətilə təşkil olunan mərasimdə tort kəsilərkən uşağın saçından dartması barədə videogörüntülər yayılıb.
Araşdırmalar zamanı məlum ki, bağçanın aşpazı Balkiyeva Sevinc Balağa qızı 2017-ci il təvəllüdlü qızın saçından tutaraq dartıb. Bu isə bağçada azyaşlıya qarşı zorakılıq kimi qiymətləndirilib.
Qeyd edək ki, Azərbaycan Prezidenti İlham Əliyev dövlət məktəbəqədər təhsil sistemində idarəetmənin təkmilləşdirilməsi haqqında sərəncam imzalayıb. Sərəncamla yerli icra hakimiyyəti orqanlarının (Bakı şəhəri üzrə Bakı Şəhər İcra Hakimiyyətinin, Gəncə şəhəri üzrə Gəncə Şəhər İcra Hakimiyyətinin) tabeliyində olan dövlət məktəbəqədər təhsil müəssisələri (uşaq evləri istisna olmaqla) Təhsil Nazirliyinin tabeliyinə verilib.
Dağlıq Şirvan Regional Təhsil İdarəsi Şamaxıda uşaq bağçasında azyaşlıya zorakılıq göstərilməsi məsələsinə münasibət bildirib. Belə ki, idarənin İctimaiyyətlə əlaqələr üzrə məsul şəxsi Anar Osmanov məsələ ilə bağlı APA-ya açıqlamasında deyib ki, hadisə iyunun 2-də baş verib: “Bağça rəhbərliyi məsələ ilə bağlı tədbir görüb. Aşpaz Sevinc Balkiyeva barəsində intizam tənbeh tədbiri görülüb”.
Hadisədə adı hallanan bağçanın aşpazı Balkiyeva Sevinc Balağa qızı bildirdi ki, məlum olaya çox peşmandır: “İstəməzdim bu hadisə olsun. Bilməyərəkdən uşağın saçını dartdım. Baş vermis hadisəyə görə uşağın valideynlərindən üzr istədim, sizin qəzet vasitəsilə də bir daha onlardan üzr istəyirəm”.
Nizami Hüseynov: “Insan əsəbi ola bilər, ancaq bunun acığını 3 yaşlı uşaqdan çıxmaq nə deməkdir?”
Təhsil eksperti Nizami Hüseynov qeyd etdi ki, körpələrə qarşı bu münasibət insanlığa sığmayan hərəkətdir: “Bu vəhşilikdir. Uşağa əl qaldırmaq, onun saçını yolmaq düzgün deyil. Tərbiyəçi, aşbaz və ya bağçada çalışan istənilən şəxs onlara əmanət edilən körpələrə qarşı sərt davranmamalıdır. Insan əsəbi ola bilər, ancaq bunun acığını 3 yaşlı uşaqdan çıxmaq nə deməkdir?”
Günel CƏLİLOVA
