Bildiyiniz kimi, artıq bir neçə həftədir ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi “QHT-dövlət əməkdaşlığında yeni çağırışlar: ictimai nəzarət mexanizmlərinin gücləndirilməsi” adlı respublika zona konfranslarının təşkilini davam etdirir. Regionun müxtəlif bölgələrində fəaliyyət göstərən QHT-lər və ictimai şuraların fəaliyyətinin təkmilləşməsinə böyük təkan verən bu konfransın məqsədi birgə fəaliyyətin təşkil edilməsi və bölgələrdə vətəndaşların qərarların qəbulu prosesində iştirakçılığının təşviq edilməsidir. Bir il bundan öncə yaranan Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının əsasında yaranan “Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi” qısa müddət ərzində o qədər böyük uğurlara imza atıb ki, bu da vətəndaş cəmiyyəti tərəfindən böyük heyranlıqla, fəxarətlə qarşılanıbdır. Bu zona toplantıları da, Agentliyin növbəti böyük uğurlarından biridir. Təşkil olunan bu toplantıları ona görə böyük uğur hesab etmək olar ki, həftənin beş günü Agentliyin rəhbər heyəti və əməkdaşları müxtəlif bölgələrdə konfranslar təşkil edir, bölgələrdəki QHT-ləri ziyarət edirlər. İsti yay günlərində paytaxtdan saatlarla bölgələrə yol gəlmək, davamlı olaraq fasiləsiz böyük konfranslar təşkil etmək hər kəs bilir ki, olduqca çətin işdir və hər dövlət qurumunun da bacaracağı bir iş deyil. Agentliyin dövlət və cəmiyyət həyatında qeyri-hökumət təşkilatlarının rolunun artırılması, fəaliyyətinin yeni dövrün çağırışlarına uyğun təşkili, bu sahədə həyata keçirilən dövlət dəstəyinin təşkilati-hüquqi əsaslarının və mexanizmlərinin təkmilləşdirilməsi istiqamətində gördüyü bütün işlər təqdirəlayiqdir. QHT-dövlət əməkdaşlığında yeni çağırışlar məqsədilə təşkil olunan zona konfransı 26 may tarixində Gəncə şəhərində də baş tutdu. Gəncə şəhəri Heydər Əliyev Mərkəzində təşkil edilən konfransda çıxış edən Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev ölkəmizdə qeyri-hökumət təşkilatlarının bir neçə mərhələdə inkişaf yolu keçdiyindən, QHT-dövlət münasibətləri sahəsində müsbət nümunələrin formalaşmasından, QHT-lərə maliyyə, metodiki, konsultativ, təşkilati dəstəyin göstərilməsindən, QHT-dövlət münasibətlərində yeni mərhələnin başlamasından danışdı. Vüsal Quliyev QHT-lərin dövlət qurumları ilə birgə ictimai əhəmiyyət kəsb edən bir çox sahələrdə yüksək təşəbbüskarlıq nümayiş etdirmələrini, nəticəyönümlü layihə və proqramlar həyata keçirmələrini, məişət zorakılığı, ailə dəyərlərinin qorunması və digər istiqamətlərdə səmərəli layihələrin reallaşdırlmasının vacibliyini də diqqətə çatdırdı. Konfransda çıxış edən Azərbaycan Respublikasının QHT-lərinə Dövlət Dəstəyi Agentliyinin icraçı direktoru Aygün Əliyeva konfransın proqramı, məqsədi haqqında konfrans iştirakçılarını geniş məlumatlandıraraq keçirilən bu konfransların region QHT-lərinin və ictimai şuraların birgə fəaliyyətində dönüş yaradacağını qeyd etdi. Aygün Əliyeva yeddi iqtisadi rayonu əhatə edəcək bu konfrans QHT-lərin fəaliyyətinə öz müsbət təsirini göstərəcəyini də xüsusilə vurğuladı. Konfransdan sonra Agentliyin rəhbər heyəti və əməkdaşları Gəncə şəhərində fəaliyyət göstərən bir neçə təşkilatı eləcə də “Kimsəsiz Uşaqların Sosial Müdafiəsi” İctimai Birliyini ziyarət etdilər, QHT sədrlərinin təklif və problemlərini dinlədilər.
Agentlik yarandığı 1 il müddətində vətəndaş cəmiyyətinin həyatında yeni mərhələnin başlanğıcı olub və bir çox ilklərə imza atıb. “QHT ziyarətləri” layihəsi çərçivəsində bölgələrdə QHT-ləri ziyarət də bu ilklərə daxildir. Bu gün əminliklə deyə bilərik ki, QHT Agentliyi QHT sektorunun inkişafına mühüm töhfələr verir, vətəndaş cəmiyyətinin inkişafını birmənalı dəstəkləyir. Ölkəmizdə ictimai əhəmiyyət kəsb edən bütün məsələlərdə QHT-lərin əsas tərəfdaş olması dövlət siyasətimizin təntənəsidir. Vətəndaş cəmiyyətinin inkişaf etdirilməsi üçün prezident İlham Əliyevin səyləri, sərəncamları artıq öz səmərəsini verməkdədir və bu gün QHT-ləri dövlətin əsas partnyoru hesab etmək olar. Lamiyə İSAZADƏ “Kimsəsiz Uşaqların Sosial Müdafiəsi” İctimai Birliyinin sədri.
