Uşaqlıqda biz hamımız belə bir düşüncədə idik ki, müəllim çörək yemir. Bəlkə də çox işlənmiş ifadədir, çox işlənmiş ifadə olsa da, belə bəzi müəllimlərin davranışlarını görəndə istər-istəməz bu fikir yadımıza düşür. Çünki o dövrdə müəllimlərimizin oturuşu, durşu, rəftarı, örtülü davranışları onlar haqda tamam başqa fikir yaradırdı, bu gün isə bəzi müəllimlərin timsalında bunu görə bilmirik.
Bu gün biz tamam başqa bir mənzərə ilə qarşılaşırıq. Xüsusən də son illər cəmiyyətimizdə “kreativ” müəllimlərin sayının artması qəribə halların ortaya çıxmasına səbəb olur. Zaman-zaman sosial şəbəkələrdə müəllimlərlə bağlı videolar yayılıb, bir rüşvət tələb edib, biri rəqs edib, biri də dava-dalaş. Son yayılan video haqda isə çoxlarınız xəbərdarsınız. Müəllimə əyləncə yerlərindən birində, yaxud restoranda rəqs edir, göbək atır, həmkarı da onun sinəsinə pul qoyur. Bu video ciddi tənqidlərə məruz qalıb, ona baxan hər kəs müəllimələri qınayır. Hər bir kəsin əylənmək haqqı var, amma ictimailəşdirmədən. Əksər mütəxəssislər, sosial şəbəkə istifadəçiləri onların müəllim adına yaraşmayan hərəkətlərə yol verdiyini qeyd edir. Rəqs edən qadın müəllimələrdən birinin rəqsi də, onun sinəsinə pul qoyanın hərəkəti də yaxşı qarşılanmır. Məclisdə iştirak edən digər iştirakçılar tərəfindən bu rəqsin videoya çəkilib sosial şəbəkələrdə paylaşılması da qəbuledilməzdir. Onu da bildirək ki, millət vəkili Etibar Əliyevin fikrincə, onların müəllim adına yaraşmayan hərəkətlərə yol verməsi bağışlanmazdır.
Elşən Qafarov: “Bu videonu yayan insanın onu hansı məqsədlə yaymasından asılı olmayaraq müəllim nüfuzuna xələl gətirmək istəyi olub”
Tanınmış təhsil eksperti Elşən Qafarov bizimlə söhbətində bildirdi ki, müəllimələrlə bağlı yayılan videoya qərəzli yanaşılır. “Yayılmış videoya gəlincə deyim ki, videonun çəkildiyi yer məktəb deyil. Video 8 mart Beynəlxalq Qadınlar Günü münasibəti ilə keçirilən məclisdə çəkilib, müəllimələr şənlənirlər. Müəllim də insandır, onun da əylənmək haqqı var. Təəssüflər olsun ki, onların arasında kimsə götürüb videonu çəkib, necəsə bu video yayılıb. Orada olan müəllimlər daha yaxşı bilərlər ki, o video hansı yolla sosial şəbəkəyə düşüb. Gördüyünüz kimi bura məktəb deyil, qapalı bir məkandır, burada olanlar da yalnız qadınlardır. İnsanlar deyib-gülüb bir-biriləri ilə zarafatlaşıblar, amma çox təəssüflər olun ki, bu video yayımlanıb. Burada qeyri-adi heç nə yoxdur. Cəmiyyət olaraq bu məsələləri çox müzakirə etməklə bilmirəm nəyə nail olacağıq. O videonu yayanlara ayıb olsun. Videoda görüntüsü yayılan müəllimlərin yoldaşları, övladları, şagirdləri var. Müəllimə qarşı bu qədər acımasız yanaşma olmamalıdır. Müəllimi istənilən halda nüfuzdan salmağa çalışırıqsa biz özümüzə, gələcəyimizə, ailəmizdə böyüyən övladlarımıza çox böyük haqsızlıq edirik. Düşünürəm ki, bu videonu yayan insanın onu hansı məqsədlə yaymasından asılı olmayaraq müəllim nüfuzuna xələl gətirmək istəyi olub”.
Samir Adıgözəlli: “Müəllim adına yaraşmayan hərəkətlərə yol verilməsi düzgün deyil”
İSBAM sədri Samir Adıgözəlli isə bizimlə söhbətində baş verənlərdən təəssüfləndiyini bildirir: “Müəllim adına yaraşmayan hərəkətlərə yol verilməsi düzgün deyil. Bu hərəkəti edən əsl müəllim ola bilməz. Biz müəllimi böyük dəyər, müqəddəs, valideyn səviyyəsində görmüşük. Baş verənlər həm təhsil sistemindəki, həm də cəmiyyətdəki aşınmanın nəticəsidir. Bizim cəmiyyət mənəvi eroziyaya məruz qalıb. Müəllimlik elə bir sənətdir ki, o bütün sənətlərdən, peşələrdən çox-çox üstündür. Bu çox həssas yanaşma tələb edən məsələdir. Müəllim elə davranış göstərməlidir ki, hər kəs ondan nümunə götürsün. O hər bir xüsusiyyəti ilə nümunə olmalıdır. Müəllim hər yerdə özünə fikir verməlidir ki, hanısa bir davranışında səhvə yol verməsin”.
İradə SARIYEVA
