Bakıda keçirilən “TEKNOFEST Azərbaycan” festivalı başa çatsa da, onun nəticələri hələ də müzakirə edilir. Bildiyimiz kimi, bu festivalda ölkəmizin bir sıra qurumları, ali təhsil müəssisələri ilə yanaşı Azərbaycanın baş elmi mərkəzi sayılan Milli Elmlər Akademiyası da (AMEA) xüsusi pavilyonla iştirak edib.
Lakin çox təəssüf ki, ölkəmizin baş elm ocağı “TEKNOFEST Azərbaycan”da heç bir uğur qazana bilməyib. Bunu biz demirik, AMEA rəhbərliyinin özü etiraf edir. Belə ki, AMEA Rəyasət Heyətinin xüsusi iclasında vitse-prezident, AMEA-nın “Teknofest” festivalında iştirakı üzrə İşçi qrupunun sədri, akademik Rasim Əliquliyev diqqətçəkən açıqlama verib: “Akademiyanın güclü potensialı olub, yarandığı gündən elmin bütün istiqamətərində böyük naliyyətlər əldə edib. Amma “Teknofest”də hiss etdim ki, Elmlər Akademiyası olaraq müəyyən qədər nüfuzumuzu itirmişik. Bu məsələdə aktiv olmalıyıq”.
AMEA-nın “Teknofest”də yer tutmamasının səbəbi bu qurumun nüfuzunu itirməsi ilə bağlıdır?
Tanınmış təhsil eksperti Elçin Əfəndi baş verənlərdən təəssüfləndiyini qeyd edərək bildirir ki, AMEA son illər elmi uğurlara imza atmayıb: “Son dövrlər AMEA-nın təkcə mən deyil, bütün elmi ictimaiyyət hər hansı bir elmi nailiyyətlərinin şahidi olmayıb. AMEA alimlərin bir mərkəzdə formalaşdığı bir qurumdur. Burada müvafiq uğurlu elmi nəticələr olmalıdır. Biz istər texnoloji, istər bioloji, istərsə də elmin başqa sahələrində yüksək nəticələr qazanmalıyıq, yenilik etməliyik, kəşflərimiz olmalıdır. Yaratmalıyıq. Amma açığını desəm, son dövrlər AMEA-nı yalnız orfoqrafiya lüğətində hansısa bir sözün düzgün, yaxud səhv yazılması ilə bağlı xatırlayıram. Ortada heç bir elmi nailiyyət yoxdur. Yaxud onun prezidentləti ilə bağlı gündəmdə olan məsələlər haqda, AMEA-da kim kimə söz atdı, kim kimə cavab qaytardı motivində fikirlər eşidirik”.
E.Əfəndinin sözlərinə görə, AMEA-da elmin inkişafına əhəmiyyət verilmir və bu qurumda ciddi islahatlar aparılmalıdır. “Təəssüflər olsun ki, “Teknofest”də AMEA heç bir yer tutmayıb, nə isə təqdim edib yer qazanmayıb. Təsəvvür edin ki, AMEA yox, ölkəmizdə hansısa bir özəl universitet müvafiq texnoloji nəticə təqdim etməklə uğur əldə edib. Bu da onu deməyə əsas verir ki, bəli, AMEA-da problemlər var, o problemlərin aradan qaldırılması üçün isə orada islahatlara ehtiyac var” - deyə E.Əfəndi vurğuladı.
İradə SARIYEVA
