Dünyanın bir çox ölkəsində, xüsusilə də Qərbdə geniş təbliğ edilən homoseksualizmin, təəssüf ki, ölkəmizdə yayılmasına şərait yaradanlar var.
Belə ki, paytaxtın bir çox oyuncaq dükanlarında və ya sosial şəbəkələr vasitəsilə onlayn satışla eyni ilə LGBT (lezbiyan, gey, biseksual və transgender) bayrağının rənglərinin əks olunduğu oyuncaqların satışı sürətlə artmaqdadır. “Popit” adlandırılan oyuncaq növlərində isə rəng seçimi sanki məqsədli şəkildə edilib. Oyuncaqdakı rənglərdən xəbərsiz olan valideynlər kortəbii şəkildə həmin oyuncaqları bu gün də almaqdadırlar. Bəzi valideynlər isə bu səbəbdən dövlət tərəfindən həmin oyuncağın alınmasını və ölkəyə gətirilməsinin qadağan edilməsinin tərəfdarıdır.
Valideynlər iddia edirlər ki, bu oyuncaqlar vasitəsilə uşaqlarda homoseksuallığa xüsusi maraq oyana bilər. İddialarda rənglərin uşaq psixologiyasında xüsusi yerinin olduğu səbəb gətirilir və bununla azyaşlıların kiçik yaşlarından eynicinslilərə “məhəbbət” oyadıldığı bildirilir.
Aytəkin Kamranqızı: “Bu oyuncaqlar uşaqların şüuraltına hesablanmış bir addımdır”
Sosioloq Aytəkin Kamranqızı bildirdi ki, bu oyuncaqlar uşaqların şüuraltına hesablanmış bir addımdır.
Onun sözlərinə görə, əgər şirkətlər bu cür oyuncaq istehsal edirdilərsə, onu tamamilə fərqli rənglərdə edə bilərdilər: "Bu oyuncaqlara diqqət yetirdikdə onun rəngləri eyni olmaqla yanaşı, hətta LGBT bayrağının sıralaması da eynilə həmin bayrağı əks etdirir. Bu oyuncaqda mən hər hansı fiziki, zehni inkişaf yaradan nəsə görmürəm. Sadəcə kiçik qabarcıqlardı, barmaqlar vasitəsilə oynadılır. Yəni uşaq psixologiyasına müsbət təsir edə biləcək bir oyuncaq deyil. Biz adətən oyuncaqları ona görə seçirik ki, uşaqlarımızın inkişafına müsbət təsir eləsin və onun xəyal dünyasını genişləndirsin, həmçinin əqli və fiziki inkişafına müsbət dəyişiklik göstərsin. Xatırlayırsınızsa, bir vaxtlar stres çarxı deyilən bir oyuncaq dəbə minmişdi. Yəni hara baxırdın uşaqlar əllərində onu fırladır. İndi də bu “Pop İt” deyilən oyuncaqlar uşaqlar arasında geniş yayılıb. Təbii ki, bu, işbazların oyunlarından biridir. Amma bu və ya digər formada onlar bizim şüuraltımıza təsir edərək psixologiyamızı korlamağa, düşüncə tərzimizi dəyişməyə çalışırlar. Düzdür, bəziləri deyə bilər ki, “Pop İt” uşaqlar üçün normal oyuncaqdır. Bu düzdür. Amma rənglər, çox təəssüf ki, uşaqlarımızın yaddaşına yazılır. Təbii ki, onlar nə vaxtsa LGBT bayrağı ilə rastlaşanda bunu tamamilə normal, sıradan bir vəziyyət kimi qəbul edəcəklər. Yəni qlobal güclər insanların psixologiyasını bu cür sadə və rahat formada dəyişə bilirlər. Bilirisiniz ki, bizim yaş qrupumuzda olan insanların bu mövzuda psixologiyasına təsir etmək çətindir. Ancaq övladlarımız üzərində bunu etmək çox rahat və asandır. Ümumiyyətlə, qlobal güclərin uşaqlara təsir imkanları boldur. Çox təəssüflər olsun ki, bu günləri onlar texnologiya və bu cür oyuncaqlarla uşaqların psixologiyalarına təsir etmək imkanlarına sahibdir. Bu baxımdan gərək hamımız diqqətli olaq. Övladlarımıza nəyi aldığımızı, nəyi aldırmaq istədiyimizin fərqində olaq. Diqqətli olan valideyn üçün təhlükə minimuma enir. Diqqəti olmayan valideynlər və ya LGBT bayrağı barədə təsəvvürü olmayanlar, LGBT-nin hansı kateqoriyaya aid insanlar ətrafında cəmləndiyini bilməyənlər üçün, təbii ki, bu, təhlükədir. Bu təhlükə hələ də davam edir”.
Könül İsmayılova: “Bu cür rəngli oyuncaqların uşaqların tərbiyəsində, formalaşmasında cinsi oriyentasiya ilə bağlı fikirlərinin dəyişdirilməsində xüsusi rolu var”
Psixoloq Könül İsmayılova bildirdi ki, üzərində hansısa təşkilatın bayrağı olan geyimin, oyuncağın satılması düzgün deyil: “Bu cür oyuncaq uşaq psixologiyasına, onun mənəviyyatına mənfi təsir edəcək. O oyuncaqdan istifadə edən uşaq onun üzərində olan rənglərin, görünüşün nə anlama gəldiyini bilməyəcək. Ancaq oyuncağın üzərində olan rənglər harmoniyasının nə demək olduğunu bilən şəxs bu haqda uşağa məlumat verəndə o zaman uşağın psixologiyası pozulacaq”.
Həmsöhbətimiz hesab edir ki, geyimləri, oyuncaqları ölkəyə gətirən sahibkarlar diqqətli olmalıdırlar: “Nəzərə almaq lazımdır ki, köynəklərin, oyuncaqların, çantaların üzərində olan hər hansı bir işarə insanların şüurunda özünə yer edir, adiləşir, doğmalaşır. Bu cür rəngli oyuncaqların uşaqların tərbiyəsində, formalaşmasında cinsi oriyentasiya ilə bağlı fikirlərinin dəyişdirilməsində xüsusi rolu var”.
Günel CƏLİLOVA
