İndiki zamanda bəşəriyyəti daha çox narahat edən narkomaniyanın fəsadları bizim respublikamızdan da yan ötmür. Bu insan həyatını məhvə doğru sürükləyən bəladan qurtulmaq üçün ən əsası gənclər arasında maarifləndirici tədbirlərin aparılması olduqca vacibdir. Astara rayon, Səncərədi kənd tam orta məktəbində təşkil olunan “Narkomaniyaya yox deyək” mövzusunda seminar məhz bu məqsəddən irəli gəlirdi. Tədbirin təşkilatçıları Astara Rayon Polis Şöbəsi, Rayon İcra Hakimiyyəti, Rayon Gənclər və İdman İdarəsi, Rayon Mərkəzi Xəstəxanası idi. Tədbirdə adı çəkilən məktəbin yuxarı sinif şagirdləri və müəllim kollektivi iştirak edirdi.
Əsrin bəlası olan narkomaniyaya qarşı aparılan belə mübarizə tədbirlərin əhəmiyyətindən danışan Astara Rayon Polis Şöbəsinin rəisi, polis polkovniki Azər Cəfərov onu da əlavə etdi ki, hər kəs gənc nəslin sağlam böyüməsinə, valideynlərinin etimadının doğrulmasına, Vətənə layiq övlad kimi yetişməsinə çalışmalıdır. Acınacaqlı haldır ki, narkomaniyaya meyl edən gənclərə hələ də rast gəlinir. Məhz bu səbəbdən təhsil müəssisələrində, ayrı-ayrı kollektivlərdə izahat işləri müntəzəm aparılmalı, hər bir şagird təhsilə və idmana diqqətli yanaşmalı, vətənpərvər böyüməlidir.
Başqa çıxışçılar - Astara Rayon İcra Hakimiyyəti başçısının müavini, ictimai- siyasi və humanitar məsələlər şöbəsinin müdiri F.Sadıxova, Mərkəzi Xəstəxanası Publik- Hüquqi Şəxsinin Baş direktoru O. Əmənullayev, Rayon Gənclər və İdman İdarəsinin rəisi vəzifəsini icra edən R. Şirinov tədbirin məqsədinin Azərbaycan Respublikası Prezidentinin 09 avqust 2005-ci il tarixli fərmanı əsasında təsdiq edilmiş “Narkotik vasitələrin, psixotrop maddələrin və onların prekusorlarının qanunsuz dövriyyəsi haqqında” Azərbaycan Respublikası Qanunun, Azərbaycan Respublikası Prezidentinin 22 iyul 2019-cü il tarixli fərmanı ilə təsdiq edilmiş “Narkotik vasitələrin, psixotrop maddələrin və onların prekusorlarının qanunsuz dövriyyəsi və narkomanlığın yayılması ilə mübarizə üzrə Proqramı(2019-2024-ci illər)”nın, 2015-2025-ci illərdə Azərbaycan gənclərinin İnkişaf Strategiyası” nın müvafiq maddələrinin yerinə yetirilməsi, sağlam həyat tərzinin təbliği və tərənnüm edilməsi olduğunu bildirdilər, keçirilən tədbirlərə yüksək qiymət verdilər, narkomaniyanın yaratdığı problemləri sadaladılar, gənclərə dəyərli tövsiyələrə əməl etməyi, narkomaniyaya düçar olmuş insanları doğru yola çəkməyə, onlara kömək etməyə çağırdılar. Narkotik vasitələrin qanunsuz dövriyyəsinə qarşı hüquq-mühafizə orqanlarının keçirdikləri əməliyyat-axtarış, əməliyyat-istintaq tədbirləri ilə yanaşı, gələcəyimiz olan yeniyetmə və gənclərlə maarifləndirici görüşlərin müntəzəm təşkilini, onlara narkomaniya bəlası haqqında dolğun məlumatların verilməsini dövrün vacib məsələsi saydılar.
Sonra narkotikin insan həyatını zəhərə döndərən təsirləri barədə video-çarx izlənildi və mövzu ətrafında məktəbli gənclərin, müəllimlərin sualları oldu. Suallara Astara Rayon Polis Şöbəsinin rəisi, polis polkovniki A.Cəfərov tərəfindən faktlar əsasında cavablar verildi.
Zəfər ORUCOĞLU
Azərbaycan Jurnalistlər Birliyinin üzvü
