Ramiz Mehdiyevin dövründə olduğu kimi, bu gün də Azərbaycan Milli Elmlər Akademiyasının (AMEA) daxilində ciddi gərginlik müşahidə edilir. Gərginliyə səbəb olan amillərdən biri məhz akademiyanın elmi-tədqiqat institutlarının baş direktorlarının Rəyasət Heyətinin iclaslarına dəvət edilməməsidir. Bu da institutların baş direktorlarının ciddi narazılığına gətirib çıxarır. Hələ Mehdiyevin prezidentliyi dönəmində bəzi institut baş direktorları bu hala qarşı açıq etirazlarını bildirmişdilər. Lakin onların tələbləri heç cür yerinə yetirilmədi.
AMEA ictimaiyyəti güman edirdi ki, akademiya prezidentinin səlahiyyətləri akademik Arif Həşimova həvalə edildikdən sonra vəziyyət dəyişəcək. Amma dəyişmədi. Nəticədə son zamanlar AMEA-nın elmi-tədqiqat institutlarının baş direktorları tələb edirlər ki, Rəyasət Heyətinin iclaslarının məxfi keşirilməsinə son qoyulsun və orada onların iştirakı təmin edilsin. İnstitut direktorları deyirlər ki, akademiya qapalı qurum deyil ki, iclaslar qapalı keçirilsin. Onlar hesab edir ki, Rəyasət Heyətində iclas qapalı olmamalıdır, burada institut rəhbərlərinin iştirakı təmin edilməlidir. İnstitut baş ditrektorları şikayət edirlər ki, bir çox hallarda onların xəbərləri olmadan rəhbərlik etdikləri institutlar barədə ciddi qərarlar qəbul edilir.
Həbib Zərbəliyev: “...Onların rəhbərlərinin iclasa dəvət edilməməsi əcaibdir”
AMEA-nın Rəyasət Heyətinin iclaslarına institutların baş direktorları niyə buraxılmır?
Professor Həbib Zərbəliyev bizimlə söhbətində bildirdi ki, AMEA-nın Rəyasət Heyətinin prosedur qaydaları barədə elə də geniş bilgisi yoxdur: “Bu məsələ ilə o qədər tanışlığım yoxdur. Rəyasət Heyətinin iclaslarında, əlbəttə, onun üzvləri iştirak etməlidir. Amma instututlarla bağlı qərar çıxararkən onların rəhbərlərinin iclasa dəvət edilməməsi əcaibdir”.
Vasif Sadıqlı: “AMEA elmi qurumdur, məxfi idarə deyil ki...”
“Filoloji Araşdırmalar və Dil Monitorinqi Mərkəzi” İctimai Birliyinin sədri Vasif Sadıqlı da bizimlə söhbətində bildirdi ki, AMEA-nın Rəyasət Heyətinin iclaslarının qapalı keçirilməsi düzgün deyil. O, qeyd etdi ki, bu qurumun iclasları AMEA əməkdaşlarına və ictimaiyyət nümayəndələrinə açıq olmalıdır: “AMEA məxfi qurum deyil ki, Rəyasət Heyətinin iclaslarında institut direktorlarının iştirakı təmin edilməsin. Bütövlükdə, Rəyasət Heyətinin iclasları aşkarlıq şəraitində keçirilməlidir. Nəinki burada institutların baş direktorları, hətta “İctimai İştirakçılıq haqqında” Qanuna görə ictimaiyyət nümayəndələri iştirak edə bilərlər. Orada konfedensioal Bu qurum dövlətdən maliyələşirsə burada ictimai iştirakçılıq da təmin edilməlidir. Hesab edirəm ki, görünür bu iclasların gizlin keçirilməsinin səbəbləri var, problemlərin ictiailəşməsini istəmir. Burada müzakirə edilən məsələlərlə ictimaiyyət məlumatlandırılmalıdır. Aydın deyil ki, nəyə görə Rəyasət Heyətinin iclasları konfedensioal keçirilir, hansı səbəbdən ora institut rəhbərləri dəvət edilmir. Bu qurum büdcədən maliyələşən təşkilatdır və hər şeydən ictimaiyyət məlumatlı olmalıdır. AMEA elmi qurumdur, məxfi idarə deyil ki, onun iclasları qapalı keçirilsin və ora institut rəhbərləri dəvət edilməsin”-deyə V.Sadıqlı qeyd etdi.
İradə SARIYEVA
