AMEA-nın Neft-Kimya Prosesləri İnstitutunun baş direktoru, akademik Vaqif Abbasov akademiyanın Rəyasət Heyətinin xüsusi iclasında bir sıra narazılığını dilə gətirib. “Mənə qara yaxmayın, yoxsa özümü öldürərəm” deyən akademik Abbasov bir sıra mətləblərə toxunub, bildirib ki, AMEA-nın rəhbərliyi ilə görüşə bilmir.
“AMEA rəhbərliyi ilə görüşə bilmirəm. Necə olur ki, Hüquq şöbəsinin müdiri geniş ictimaiyyətə açıqlama verərək Vaqif Abbasova cinayət işi açıldığını deyir və bundan AMEA prezidentinin xəbəri olmur?”
O bildirib ki, rəhbərlik etdiyi institutun 552 əməkdaşı var və 11 ildə quruma 48 milyon pul ayrılıb: “Onun 36 milyonu əməkhaqqıdır. Bu pulun 4-5 milyonunu yemək olar, ay akademiklər. Rəyasət Heyətində qərar çıxarılsın və yoxlamaların nəticələri ortaya qoyulsun”.
V.Abbasov söyləyib ki, guya üç il əvvəl başqa bir institut üçün cihaz alınıb və Neft-Kimya Prosesləri İnstitutuna təqdim olunub: “2017, 2018 və 2019-cu illərdə Neft-Kimya Prosesləri institutuna bir dənə də unikal cihaz alınmayıb. Mən institut üçün lazım olmayan cihazı inventar kimi qəbul edib saxlaya bilmərəm. AMEA tarixində ədalətsizliklərə görə özünü öldürən bir şəxs olub. O, Heydər Hüseynovdur, mən də ikincisi olaram. Mənə qara yaxmayın! İnstitutla düşmən olmayın…”
V.Abbasovu AMEA-da kimlər və niyə şantaj edir?
Ekspertlərin sözlərinə görə, AMEA daxilində Abbasovun da adı maliyyə yeyintilərində hallanır və barəsində xoşagəlməz fikirlər mövcuddur.
“Həmin dövrdə akademiyada kifayət qədər yeyinti hallarına yol verildiyi barədə məlumatlar var”
Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə şərhində bildirdi ki, akademik Abbasovun çıxışı ilə tanışdır, amma onun niyə belə açıqlama verdiyinin səbəbini bilmir: “Vaqif Abbasovun məlum fikirləri ilə tanışam. Doğrusu, işin içində olmadığım üçün bilmirəm ki, orada nələr baş verir, Vaqif Abbasova qarşı hansı iddialar səsləndirilir, bu iddialar nəyə əsaslanır, onların arxasında hansısa faktlar varmı, yoxdurmu? Əlbəttə, bunlardan məlumatsızam, bu barədə danışmağım düzgün olmazdı. Amma Vaqif Abbasovu uzun illərdir tanıyıram, zamanında akademiyada labaratoriya müdiri olandan onunla münasibətimiz, salam-kalamımız var. İndi də bir birimizi görəndə çox xoş və səmimi münasibətlərimizi ifadə edirik. Mən onu çox yaxşı elm təşkilatçısı kimi tanıyıram. Kifayət qədər də ciddi adamdır, ciddi alimdir. Bu baxımdan da, əlbəttə, tanıdığım bir şəxsin bu cür açıqlama ilə çıxış etməsi mənim üçün də xeyli maraq doğurur. Eyni zamanda fikrimcə, “məni intihara təhrik etməyin, özümü öldürərəm” kimi ifadələri o yaşda, həm kifayət qədər həyat təcrübəsi, həm alim və elm təşkilatçısı cəmiyyətə yaxşı tanış olan bir adamın dilindən eşitmək heç də xoş deyil. Doğrusu, yenə də qeyd etmək istəyirəm ki, bunun arxasında nə durduğu bilinmir, məlum deyil. Hesab edirəm ki, bu yaşda olan tanınmış alimin belə bir fikirlər səsləndirməsinin səbəbləri mütləq şəkildə aidiyyatı qurumlar tərəfindən araşdırılacaq və buna qiymət veriləcək. Vaqif Abbasov sıradan bir adam deyil, akademikdir, akademiyanın ən böyük elmi-tədqiqat institutlarından birinin rəhbəridir, cəmiyyətdə tanınmış bir şəxsdir, ictimai nüfuzu var. Amma onu kimlərin şantaj etdiyini, onun kiminlə ədavəti olduğunu deyə bilmərəm, bu aydın deyil...”
V.Abbasovun konkret olaraq ittiham olunduğu hadisəyə gəlincə, İ.Orucov bildirdi ki, bu, Akif Əlizadənin akademiyaya prezidentliyi dövrünə təsadüf edir. “Həmin dövrdə akademiyada kifayət qədər yeyinti hallarına yol verildiyi barədə məlumatlar var. Hətta xatırlayırsınızsa, akademiyanın Mərkəzi Elmi Kitabxanasında hansı qanunsuzluqlar baş verdi. Düzdür, o, Akif Əlizadənin rəhbərliyinin sonuna, Ramiz Mehdiyevin isə prezidentliyinin əvvəlinə təsadüf edir. O vaxt da belə hallar vardı. Guya ki, kitabxanaya kompüterlər alınmışdı və qiymətlər çox şişirdilmişdi. Orada gənc bir xanım direktor vardı, çox ləyaqətli bir insandır. O dövrdə kitabxananın direktoru olan Sevil xanıma sənədlərə qol çəkdirmək istəmişdilər, amma o bundan imtina etmişdi, nəticədə vəzifəsindən azad edildi, ona qarşı təqiblər başladı. Xatırlayıram, Sevil xanım o vaxtı məhkəməyə müraciət etdi, məhkəməni uddu. Akademiyada əslində bu kimi hallar olub. Yenə də qeyd etmək istəyirəm ki, onlar Akif Əlizadənin zamanında başlayıb, Ramiz Mehdiyevin dönəmində davam edib. Akademiyaya ayrılan vəsaitə göz dikmək, təbii ki, akademiklərə yaraşmayan haldır. Bu məsələlər 2013-cü ildən sonra akademiyada səsləndirilib. Bilmirəm, burada söhbət hansı cihazlardan gedir. İstisna etmirəm ki, Akif Əlizadənin dövründə belə cihazların alınması ilə bağlı maxinasiyalara yol verilib. Bu böyük bir araşdırma tələb edən işdir, inanıram ki, aidiyyəti qurumlar bunu araşdırıb hüquqi qiymət verəcəklər. Təbii, günahkarlar cəzalandırılacaq. Amma bu işdə görünən hal odur ki, Vaqif Abbasovun intututuna guya hansısa cihaz verilib, əslində isə verilməyib və indi ondan nələrsə tələb edilir. Bütün bunlar araşdırılmalıdır. Bütövlükdə, akademiyanın 2013-cü ildən sonrakı fəliyyəti təftiş olunmalıdır, araşdırılmalıdır, bütün məsələlərə hüquqi qiymət verilməlidir” - deyə İ.Orucov vurğuladı.
İradə SARIYEVA
