Vəkil Kamran Məhərrəmova Bakı Nəqliyyat Agentliyinin (BNA) kamerası vasitəsilə dayanma-durma qaydalarını pozduğuna görə cərimə yazılıb.
Bu barədə büronun müdiri Sübhan Əliyev bildirib. O deyib ki, vəkil məhkəməyə müraciət edərək, kamera ilə xətanı aşkar edib və cərimə edilmənin qanunsuz olduğunu sübut edib. Bundan sonra məhkəmə cəriməni ləğv edib. Vəkil bildirib ki, bu işlə bağlı məhkəməyə müraciət etməkdə məqsəd 20 manatın ləğvi yox, BNA tərəfindən kamera vasitəsilə cərimənin yazılmasının qanunsuz olduğunu sübut etməkdir.
Çox maraqlı bir hal ortaya çıxır. Uzun müddətdir ki, BNA bu üsulla sürücüləri cərimə edir. İndi isə məlum olur ki, kamera vasitəsilə dayanma-durma qaydalarının pozulmasına görə cərimənin yazılması qanunsuzdur. Ancaq BNA rəhbərliyi öz işindədir. Bəs illər uzunu vətəndaşlara yazılan bu qanunsuz cərimələrə görə hüquqi məsuliyyəti kim daşıyacaq?
Bu yöndə apardığımız araşdırmalardan görünür ki, BNA-nın bu üsullarla yazdığı cərimələr hətta yuxarı məhkəmə instansiyaları tərəfindən də qanunsuz hesab edilib.
Hazırda da Bakı Nəqliyyat Agentliyinin kameraları tərəfindən cərimələnən sürücülər kütləvi şəkildə narazılıq edir. Bu il mayın 5-də Bakı Apellyasiya Məhkəməsinin hakimi Faiq Qasımov BNA-nın kamera ilə çəkdiyi cərimələrə xitam verilməsi barədə qərar çıxarıb.
İnzibati Xətalar Məcəlləsinin 122.1-ci maddəsi bu məcəllənin digər maddələri üzrə inzibati xəta hadisələrinin aşkar edilməsini qadağan etmir və məhdudlaşdırmır, sadəcə müvafiq maddələr üzrə icraatın aparılması qaydasını müəyyənləşdirir. Foto və video qeydiyyat funksiyalarına malik xüsusi texniki vasitələrin köməyi ilə nəinki 122.1-ci maddədə göstərilən İXM-in xüsusi hissəsinin maddələri üzrə, hətta digər maddələr üzrə də inzibati xəta hadisələri aşkar edilərək inzibati iş üzrə icraata başlanıla bilər. Azərbaycan Prezidentinin 6 iyul 2018-ci il tarixli 181 nömrəli Fərmanı əsasında BNA-ya parklanma yerlərində, habelə dayanma və durmanın qadağan edildiyi yerlərdə inzibati xəta törədilməsinə görə protokolların tərtib edilməsi məqsədilə foto və ya video qeydiyyat funksiyalarına malik xüsusi texniki vasitələrin quraşdırılmasının təmin edilməsi tapşırıldığına görə sürücü barəsində yazılmış cərimə qanunidir.
Sürücülər tərəfindən törədilməsi ehtimal edilən, İXM-in 346.1-ci maddəsi ilə əhatə olunan əməl foto və ya video qeydiyyat funksiyalarına malik xüsusi texniki vasitələrin köməyi ilə (bort kompüter) aparılmalıdır.
Bunun əksi olan halda, sürücünün əməlində törədilməsi ehtimal edilən inzibati xəta üzrə icraat inzibati xətalar qanunvericiliyində nəzərdə tutulmuş qaydada həyata keçirilmədiyindən onun həmin maddə ilə təqsirli bilinib tənbeh edilməsi yolverilməzdir.
İXM-in 8-ci maddəsinə görə, inzibati məsuliyyətə cəlb olunmuş şəxs öz təqsirsizliyini sübut etməyə borclu deyil. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll olunmalıdır.
Dayanma-durma qaydasının digər hallarının pozulmasına görə sürücülərin kamera vasitəsilə cərimə edilməsi məsələsi hazırda Milli Məclisdə müzkirəyə çıxarılıb. Əgər qüvvədə olan İnzibati Xətalar Məcəlləsi dayanma-durma qaydasının bütün hallarının pozulmasına görə kamera vasitəsilə cərimə yazılmasına icazə verirsə, bu məsələnin Milli Məclisə müzakirəyə çıxarılması nəyə görə lazımdır? Əgər qanun kamera ilə cərilənməyə icazə verirsə, bəs Dövlət Yol Polisi dayanma-durmaya görə sürücüləri niyə kamera ilə cərimələmir? Dövlət Yol Polisi tətəfinfən belə cərimələrin edilməsinə ümumiyyətlə rast gəlinmir.
Qanun layihəsinin Parlamentin qəbulundan və Prezidentin təsdiqindən sonra dayanma-durmaya görə kamera vasitəsilə cərimə yazılması qanuni sayıla bilər. Hazırda qüvvədə olan İnzibati Xətalar Məcəlləsinin tələblərinə görə, dayanma-durma qaydasını pozan sürücüləri yalnız planşet vasitəsilə cərimələmək olar.
Əminik ki, bütün bunları BNA rəhbərliyi bizdən yaxşı bilir. Ancaq bilə-bilə də qanunsuz üsullarla cərimə yığımını davam edir. Təbiidir ki, buna görə də, onlarla bağlı hüquqi məsuliyyət nəzərdə tutulur.
Məhəmmədəli QƏRİBLİ
