Bu günlərdə bir qrup "Sovetski" sakini Nazirlər Kabineti qarşısında etiraz aksiyası keçirib. 2018-2019-cu illərdə evləri sökülən sakinlər bildirir ki, hələ də mənzillə təmin edilməyiblər. Etirazçıların əsas şikayəti onlara verilən məbləğin az olması və qurumların müraciətlərə biganə yanaşmasıdır.
Aksiya iştirakçısı Sərvinaz Mirzəyeva qeyd edir ki, 2018-ci il dekabrın 25-də yaşadığı ev buldozer vasitəsilə sökülüb. Onun sözlərinə görə, artıq neçə ildir ki, qohum, dost-tanış qapısında qalıb: “Ev sökülən ərəfədə kirayə pulunun veriləcəyi ilə bağlı vəd verilsə də, buna əməl edilmir. Ilk aylar kirayə pulu verildi, ancaq sonradan həmin yardım dayandı. Bilmirik kirayə pulunu verək, yoxsa yaşayışımızı həll edək”.
Sakinlər onu da bildirir ki, sökülən evin dəyərində kompensasiya verilməlidir. Bazar qiymətinə görə vəsait verilmir. İnsanlara qəpik-quruş verilir. Bununla ev almaq mümkün deyil. Elə insanlar var ki, hələ də kirayədə yaşayır.
Onu da bildirək ki, bir müddət əvvəl hökumət Bakı şəhəri, Yasamal rayonunda yerləşən keçmiş “Sovetski” adlanan ərazidən müxtəlif illərdə köçürülmüş vətəndaşların onlara verilmiş kompensasiyanın həcmindən narazı qalmasına münasibət bildirdi. Nazirlər Kabinetinin 2021-ci il üçün hesabatında qeyd edilirdi ki, Bakı şəhəri, Yasamal rayonunun keçmiş “Sovetski” adlanan ərazisindən köçürülmüş bəzi vətəndaşlara verilən kompensasiyanın məbləğindən narazı qalmaları barədə məsələyə dəfələrlə baxılıb: “Belə ki, Nazirlər Kabinetinin “Torpağın alınmasını zəruri edən dövlət ehtiyacının və həmin torpağı alan orqanın müəyyən edilməsi barədə” 2018-ci il 16 fevral tarixli 51 nömrəli və “Bakı şəhərinin Yasamal rayonu ərazisində vətəndaşlara məxsus yaşayış və qeyri-yaşayış obyektlərinin bir qisminin dövlət ehtiyacları üçün alınması haqqında” 2018-ci il 29 dekabr tarixli 572 nömrəli qərarı ilə Bakı şəhərinin Baş Planına uyğun olaraq dövlət əhəmiyyətli kommunikasiya xətlərinin çəkilməsi məqsədi ilə Yasamal rayonu keçmiş “Sovetski” adlandırılan ərazisində yerləşən yaşayış və qeyri-yaşayış obyektlərinin dövlət ehtiyacları üçün satın alınması işləri aparılır. Bu qərarların icrasının təmin edilməsi məqsədilə dövlət ehtiyacları üçün satın alınması işləri aparılır”.
“Vətəndaşlar zamanında kompensasiya ilə razılaşmayıb etiraz etsəydilər, bu daha doğru olardı”
Sosial sahə üzrə ekspert Elxan Əliyev qeyd etdi ki, mülkiyyət hüquqları əlahiddə hüquqdur və məsələ vətəndaşın razılığı əsasında həll olunmalıdır: “Mülkiyyətçi həmişə haqlıdır. Çünki mülkiyyət hüquqları əlahiddə hüquqlardır. Bu mənada hesab edirəm ki, hər hansı mülkiyyətçi əgər ona verilən kompensasiyadan narazı qalırsa, bu, danışıqlar yolu ilə həll olunmalıdır”.
Ekspert onu da əlavə etdi ki, vətəndaşlar zamanında kompensasiya ilə razılaşmayıb etiraz etsəydilər, bu daha doğru olardı: “Ancaq öncədən kompensasiya almış şəxslərin indi gəlib narazılıq etməsi artıq məsələyə bir qədər fərqli yanaşma tələb edir. Bu vəsaiti almadan nə isə demək, etiraz etmək lazım idi. Vətəndaşların bir hissəsi kompensasiyanı alıb, həmin vəsaiti başqa ehtiyaclarına sərf ediblər, indi yenidən narazılıq edirlər. Bunu da hansısa formada həll etmək lazım idi. Vətəndaş məbləğdən narazı idisə, kompensasiya almamışdan əvvəl bunu müzakirə etməli idi, artıq ödəniş həyata keçirilib, vəsait alınıb. Bu yanaşma doğru deyil”.
Günel CƏLİLOVA
