Paytaxtdakı sığınacaqlardan birində uşaqlara əzab verilməsi barədə Sabunçu Rayon Prokurorluğunun məlumatı ölkədə böyük rezonans doğurub. Yayılan xəbərdə bildirilib ki, rayonun Bakıxanov qəsəbəsində yerləşən sığınacaqda 10.05.2022-ci il tarixdə müxtəlif dövlət orqanlarının iştirakı ilə keçirilən monitorinq zamanı uşaqların bədəni üzərində xəsarət izlərinin aşkar olunması faktı ilə bağlı Sabunçu Rayon Prokurorluğunda araşdırma aparılıb.
Aparılan araşdırmalarla qeyd edilən sığınacaqda 2022-ci ilin fevral ayının sonundan may ayının əvvəlinə qədər saxlanılan Cəmilə Məmmədovanın (ad, soyadı şərti) sığınacaqda qaldığı müddətdə müxtəlif psixi və fiziki zorakılığa məruz qaldığı, həmçinin onun sığınacaqdakı digər azyaşlılara da psixi və fiziki zorakılıq göstərilməsinə şahid olduğu müəyyən edilib.
O cümlədən, sığınacaqda saxlanılan digər iki nəfər azyaşlının bədəni üzərində orada saxlandıqları tarixlərə uyğun gələn xəsarət izləri aşkarlanıb. Prokurorluq rəsmi şəkildə sığınacağın adını açıqlamasa da, Report.az saytı həmin sığınacağın "Sevgi Evi" qadın və uşaq sığınacağı olduğu barədə məlumat yayıb.
“Sevgi Evi” - Uşaq və Qadın sığınacağı - Ağamirzə Bağırov: “Sığınacaqla bağlı səslənən iddialar əsassızdır”
Məsələ ilə bağlı “Sevgi Evi” - Uşaq və Qadın sığınacağının hüquqşünası Ağamirzə Bağırov bildirdi ki, sığınacaqla bağlı səslənən iddialar əsassızdır: “Prokurorluq orqanları belə qərarı heç vaxt ortaya atmaz. Ortada istintaqın qərarı yoxdur. Kim edib bunu, hansı məqsədlə edib, hüquqşünaslarımız yaxın vaxtda aydınlaşdıracaq. Rəsmi qurumlar həqiqətən də “Sevgi Evi”ndə monitorinq keçirib, amma burada zorakılıq halları aşkar edilməyib. Biz nə deyə bilərik ki? Gəlib baxıblar, monitorinq qrupu olub. Yeddi qurumun - təhsil, səhiyyə qurumlarından, Ailə, Qadın və Uşaq Komitəsindən, polis və s. orqanlarından komissiya gəlmişdi. Xırda çatışmazlıqlar var idi. Onlar hələlik bizdə nəyin çatışmadığı barədə öz tövsiyələrini verməyiblər. Nə zaman onlar bizə öz tövsiyyələrini versələr, biz də öz işimizi buna uyğun quracağıq. Bizdə döyülmə halı yoxdur. Nəzərə almaq lazımdır ki, bura gələnlərin hamısı ailə zorakılığının qurbanı olan uşaqlardır. Onlar onsuz da o xəsarətləri alıb, bura gəliblər. Atası, anası tərəfindən döyülən uşaqlardır. Müəyyən proqramlara çıxan uşaqları gecələmək üçün bura göndərirlər. Onların bədənində xəsarət ola bilər, ata-anaları tərəfindən işgəncəyə də məruz qalıblar. Bu onların bədənində ola bilər. Amma xəsarətin müəssisədə işləyən adamlar tərəfindən edilməsi mümkün deyil. Biz təmənnasız, dövlətdən yardım almadan fəaliyyət göstəririk. Bizim o qədər başımız işləmir ki, bu qədər yaxşılığın qabağında uşaqlara xəsarət yetirək? Bu nə məntiqsizlikdir? Biz hansı millətik ki, himayə etdiklərimizə işgəncə verək?”.
Kəmalə Ağazadə: “Uşaqlara şiddət göstərdiyi müəyyən edilən sığınacaq əməkdaşlarına ciddi cəza verilməlidir, çünki onlar…”
"Azərbaycan Uşaqları" İctimai Birliyinin sədri Kəmalə Ağazadənin sözlərinə görə, xoşagəlməz halların qarşısını almaq üçün ilk növbədə sığınacaqlarda fəaliyyət göstərən hər bir şəxs öz peşəsi üzrə yerli və dünya təcrübəsini mənimsəməlidir. Sığınacaqlar isə akkreditasiyadan keçməlidir: “İlk öncə onu deyim ki, sığınacaq ayrıca qurum kimi fəaliyyət göstərmir. Sığınacaq qeyri hökumət təşkilatının tərkibində olan xidmət sektoru kimi formalaşır. Burada çalışan hər bir kadr da həm ölkə təcrübəsini, həm dünya standartlarını, həm də uşaq hüquqlarını bilməlidir. Ondan sonra belə mərkəzlərin fəaliyyəti tam formalaşmış olur. Əmək və Əhalinin Sosial Müdafiə Nazirliyi yanında Məişət Zorakılığı Qurbanları ilə Reabilitasiya işi aparmaqla bağlı akkreditasiyadan keçmək mütləqdir. Ümumiyyətlə Azərbaycanda çox az sığınacaq var. Bildiyim qədərilə akkreditasiyadan keçmiş 3 sığınacaq Bakıda, biri isə Gəncə şəhərində fəaliyyət göstərir. Digərlərinin isə akkreditasiyası ilə bağlı məlumatım yoxdur. Ötən il, hər bir sığınacağın fəaliyyətinin araşdırılması ilə əlaqədar monitorinq qrupları yaradıldı. Komissiyanın tərkibinə aidiyyatı qurumların, nazirlik və komitə nümayəndələri qatılmışdı. Onlar bizim sığınacaqda da oldular, bütün prosesi izlədilər”.
Birlik sədri hesab edir ki, uşaqlara şiddət göstərdiyi müəyyən edilən sığınacaq əməkdaşlarına ciddi cəza verilməlidir, çünki onlar həm də dövləti təmsil edirlər: “Sevgi uşaq evində nə olub-olmadığını dəqiq deyə bilmərəm. Fikrimcə, hüquq-mühafizə orqanları hadisəni tam dəqiqliyi ilə araşdıracaqlar. Bugün uşaqların istismar edilməsində valideynləri ağır formada cəzalandırır və valideyn hüquqlarının məhdudlaşdırılması məsələsini qaldırılırsa, deməli, təşkilatlara daha ciddi yanaşmalıdırlar. Çünki burada söhbət uşağın qəyyumundan və valideynindən getmir, eyni zamanda dövlətdən gedir. Qanun qarşısında hər kəs cavab verməlidir.
Məlumat üçün qeyd edim ki, Azərbaycan Uşaqlar Birliyi – Uşaq Sığınacağında işləyən hamı il boyu müvafiq təlimlərdə iştirak edir və hər ay psixoloji yoxlanışdan keçir ki işini daha uğurlu həyata keçirə bilsin. Bizdə, sığınacaqda gecə-gündüz nəzarət sistemi mövcuddur. Bundan başqa, kadrlarımız beynəlxalq təlimlər görmüş peşəkar şəxslərdir. Əməkdaşlarımız il ərzində azı 4-5 dəfə peşə bacarıqlarının artırılması üçün təlimlərdə iştirak edirlər. Əlavə olaraq, hər ay sığınacağın bütün əməkdaşları, içi mən qarışıq, psixoloji testlərdən keçirilir. Çünki bizdəki uşaqlar ağır problemlər yaşayıblar. İstər-istəməz biz də bu çətinlikləri görüb evimizə apara, evin dərdlərini də bura gətirə bilərik. Nəticə etibarıyla xoşagəlməz hallar yarana bilər”.
Günel CƏLİLOVA
