Dağların döşünə sığınmış Lerik şəhərindəki ulu öndər Heydər Əliyevin adını daşıyan meydan. Burada özgə bir büsat qurulmuşdu. Lerik Rayon İcra Hakimiyyəti, Lənkəran Regional Mədəniyyət İdarəsi və Lerik Rayon Mədəniyyət Mərkəzinin təşkilatçılığı ilə Uzunömürlülərin II yaradıcılıq festivalı keçirilirdi. Festivala gələnlər birinci onun sərgi hissəsinə baş çəkdilər. Uzunömürlülərin və yaradıcı insanların rəsm əsərlərdən ibarət dekorativ tətbiqi sənət nümunələri, qədim məişət əşyaları, xalçaçılıq sənəti və lerikli uzunömürlülərin şəkillərdən ibarət stendlə tanış oldular. Sonra Rayon İcra Hakimiyyəti başçısının səlahiyyətlərini icra edən Cəlil Baxşıyev, Milli Məclisin deputatı İqbal Məmmədov, Lənkəran Regional Mədəniyyət İdarəsinin rəisi Şahin Şahbazov meydanın bir hissəsində çay sürfəsi ətrafında bardaş quran uzunömürlüləri şirin-şirin söhbət tutdular, onlara hədiyyələr verdilər.
Festivalda rayon icra hakimiyyəti başçısının səlahiyyətlərini icra edən Cəlil Baxşıyev tədbir iştirakçılarının, uzunömürlülərin qarşısında söz alıb 28 may Müstəqillik Günü və Uzunömürlülər bayramı münasibətilə hamını təbrik edib dedi: - Dağlar diyarımız Azərbaycanın ən səfalı guşəsi sayılır. Təbiətin bütün əsrarəngiz gözəlliyi burada vardır. Odur ki, Lerikə gələn onun məftunu olur. Nadir ağacları, saf suyu, zümrüd meşələri, tarixi abidələri ilə tanınan Lerik rayonu həm də dünyada uzunömürlülər diyarıdır. Azərbaycanın ən uzunömürlü sakini, dünya rekordlar kitabına daxil edilən Şirəli Müslümov rayonumuzun Barzavu kəndində 168 il yaşamışdır. Eləcə Pirasora kəndində Mahmud Eyvazov 150 il, Tikəband kəndində Məcid Ağayev 147, Cəngəmiran kəndində Qızıl nənə Quliyeva 134 il ömür sürmüşlər. Bu gün isə 80-90 yaşdan yuxarı yüzlərlə sakinimiz vardır. Dünyada yeganə “Uzunömürlülər” muzeyi məhz Lerikdə yerləşir. Dövlət başçımız İlham Əliyevin 2010-cu il iyunun 25-də rayonumuza səfəri zamanı bu muzeydə olması, açılışını etməsi onun yaşlı nəslə göstərdiyi qayğı və diqqətin nümunəsidir.
Natiq çıxışının sonunda bildirdi: - Ötən festivaldan sonra ölkəmizin həyatında mühüm dəyişikliklər olmuşdur. 44 günlük Vətən müharibəsində Müzəffər Ali Baş Komandan, Prezident cənab İlham Əliyevin rəhbərliyi altında 30 ilə yaxın mənfur yağı tapdağında qalan Qarabağımız azad edildi.
Bəli, xalqımız zəngin maddi və mənəvi sərvətlərə malikdir. Belə möhtəşəm tədbirin təşkilində zəhməti olan hər bir kəsə minnətdaram, milli-mənəvi irsimizin qorunub təbliğ edilməsi sahəsində hamıya uğurlar arzulayıram.
Milli Məclisin deputatı İqbal Məmmədovun, Lənkəran Regional Mədəniyyət İdarəsi rəisi Şahin Şahbazovun, “Uzunömürlülər” muzeyinin direktoru Dilara Fətullayevanın çıxışları da maraqla dinlənildi. Onlar bir daha vurğuladılar ki, Saf təbiəti, halal insanları olan dağlar diyarı Lerik nəinki, respublikamızda, həmçinin dünyada uzunömürlülərin yaşadığı ərazi kimi tanınır .
Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev, Milli Məclisin deputatı İqbal Məmmədov, Lənkəran Regional Mədəniyyət İdarəsinin rəisi Şahin Şahbazov, rayonun hüquq-mühafizə orqanlarının, əlaqədar təşkilatların rəhbər işçiləri, ictimaiyyət nümayəndələri və uzunömürlülərin qatıldığı festivalın bədi hissəsində 85 yaşlı aşıq Məhəmmədi Cəbiyevin, rayonun özfəaliyyət dərnəklərin, folklor kollektivlərin, musiqiçilərin ifasında el mahnıları, nəğmələr qəlbləri oxşadı.
Zəfər ORUCOĞLU Azərbaycan Jurnalistlər Birliyinin üzvü
