Bir müddət əvvəl Dini Qurumlarla İş üzrə Dövlət Komitəsi rəsmən bəyan etdi ki, diplomu olmayan ruhanilər məscidlərdən uzaqlaşdırılacaq. Dövlət Komitəsinin bu bəyanatı məscidlərdə diplomsuz işləyən ruhanilərin bir çoxunu narahat edib və onlar kütləvi şəkildə saxta diplom almağa başlayıblar.
“Milli Məclis tərəfindən “Dini etiqad azadlığı haqqında” qanunda müvafiq dəyişikliklərin edilməsi ilə bağlı müzakirələr başlayan kimi əksəriyyəti dini təhsillə əlaqədar olan bir sıra neqativ xəbərlər yayılıb. Müəyyən olub ki, bəzi “işbazlar” vəziyyətdən istifadə edərək dini təhsili olmayan din xadimlərini, habelə din xadimi olmaq istəyən belə şəxsləri diplomla “təmin etməyə” çalışıblar”.
Bunu mətbuata açıqlamasında Dini Qurumlarla İş üzrə Dövlət Komitəsinin Dini qurumlarla iş üzrə şöbəsinin müdiri Cahandar Əlifzadə deyib.
“Dövlət Komitəsinə daxil olan məlumatlara görə, “işbazlar” artıq bəzi din xadimlərini “tələyə” salmağa müyəssər olub, onları köhnə tarixlə vaxtilə ölkəmizdə fəaliyyət göstərmiş mədrəsələrin diplomları ilə “təmin” ediblər. Halbuki, həmin din xadimlərinin bəziləri müxtəlif vaxtlarda Dövlət Komitəsinə təqdim etdikləri sənədlərdə hansısa dini təhsil müəssisələrini bitirmədiklərini, dini biliklərə ruhanilər vasitəsilə yiyələndiklərini bildiriblər. Din xadimlərini, həmçinin din xadimi olmaq istəyənləri diqqətli olmağa, belə şəxslərin qurbanına çevirilməməyə çağırırıq”, - Komitə rəsmisi vurğulayıb.
Bu proses necə baş verir ki, onlara saxta diplom verilir? Bu saxta diplomları kimlər, hansı şəbəkələr verir ki, bu kütləvi xarakter alıb? İşbazlar nəyə güvənib savadsız ruhaniləri diplomla təmin ediblər? Belə çıxır ki, bu aləmdə də işbaz şəbəkə var.
“Fikirləşiblər ki, din xadimlərdirlər və məsuliyyətdən yayıncaqlar, onları məsuliyyətə cəlb edən olmayacaq”
Tanınmış ilahiyyatçı Tural İrfan “Bakı-Xəbər”ə açıqlamasında bildirdi ki, Dini Komitənin bu məsələni açıqlaması yaxşı haldır, amma daha düzgünü o işbazların adlarının ictimaiyyətə açıqlanmasıdır, bunu açıqlasaydılar gözəl olardı: “Saxta diplom verənlərin özləri elə həmin mədrəsələrin özləridir və bu mədrəsələr birbaşa QMİ-yə bağlıdır. Yəni orada başqa bir dəllalın adı ola bilməz. Əgər mədrəsə öz möhürü ilə təsdiqləyib o saxta diplomu vermirsə heç dəllal, heç bir işbaz öz tərəfindən saxta diplom düzəldib kiməsə verə bilməz. Həmin işbazlar birbaşa QMİ-nin yüksək vəzifəli şəxsləridir. Çünki indiyə qədər onlar elə işlərlə məşğul olublar, var-dövlət, pul yığıblar. Dini idarə olduğuna və din dövlətdən ayrı olduğuna görə dövlət həmişə bu quruma hörmət qoyub. Bundan da sui-istifadə edib indiyə qədər dövlət məsuliyyətlərindən yayıblar. Son dövrlərə qədər QMİ və onun nəzdində olan bütün idarələr nə kommunal ödənişlər edib, nə də dövlətə vergi verib. Orada işçilərin əmək kitabçalarını saxta yazıblar. Bunu özləri ediblər və bu barədə əlimdə faktlar da var. Bunlar dövlətə külli miqdarda ziyan vurublar. Yəni camaatdan yığılan nəzirlər bir yana qalsın, dövlət də hər il ora pul ayırıb, amma onlar talançılığa yol veriblər. Fikirləşiblər ki, din xadimlərdirlər və məsuliyyətdən yayıncaqlar, onları məsuliyyətə cəlb edən olmayacaq. Fakt budur ki, indiyə qədər törətdikləri qanunsuzluqlara görə neçə dövlət məmuru məsuliyyətinə cəlb edilib. QMİ-nin minlərlə əməkdaşı var və onların heç biri hələ işlərində yol verdikləri nöqsanlara görə məsuliyyətə cəlb olunmayıblar. Bu məsələlər əsas verir ki, onlar özləri bu gün həmin saxta diplomları yazıb verirlər. Məsələ burasındadır ki, həqiqi, qanuni oxumuş, savadlı, milli təfəkkürlü adamlar kənarda qalıblar. Ad da çəkə bilərəm. Zaqatalada Əliabad İslam Mədrəsəsi var. 1998-1999-cu ildən fəaliyyət göstərir. Orada vaxtilə oxumuş, milli vətənpərvər ruhda olan şəxslərin bu gün diplomlarını vermirlər. Sadəcə arayış verirlər. Amma indi kimin ki adamı var, əvvəldən məscidlərdə işləyib, bu gün diploma ehtiyacı var, onların adlarını yazıb, hətta müəyyən məbləğ qarşılığında həmin şəxslərə diplomların verilməsi təşkil olunur. Bunu da həyata keçirən QMİ-də oturan, işləyən və həmin mədrəslələri kurasiya edən şəxsdir”.
T.İrfan hesab edir ki, QMİ-nin ziyanvuran şəbəkəsi hələ uzun illər Dövlət Komitəsinə açıq və gizli şəkildə belə problem yaradacaq. Bu təşkilatın həmişə din məsələsini öz monopolyasında saxlamaq istədiyini deyən T.İrfanın bildirdiyinə görə, buna da bir biznes kimi yanaşıblar. “Bir məsələdən ehtiyat edirəm ki, o şəbəkənin qol-qanadı başqa yerlərə, iri məmurlara, başqa dövlətlərə uzanır, oralara bağlıdır. Onlar lazım gəlsə xaricdən də, başqa yerdən də diplom alacaqlar. Gərək Dövlət Komitəsi bu məsələdə qərəzsiz tərəfsiz yanaşsın. Mən onlara inanıram, çox şey gözləyirəm. Amma QMİ-dən Dövlət Komitəsi ehtiyat edir. Baxmayaraq bu dövlət qurumudur, amma çəkinə-çəkinə addım atırlar, yenə də özlərini onlardan asılı vəziyyətdə göstərirlər. Dövlət nə qədər onlara səlahiyyət versə də, onlar yenə də özlərini onlardan asılı kimi göstərirlər”. T.İrfanın fikrincə, dövlətin səlahiyyətli qurumu olan Dini Komitə daha prinsipial işləyəcək və bu şəbəkə ilə mübarizədə davamlı olacaq.
İradə SARIYEVA
