Formula-1 yarışları ilə bağlı bəzi küçələrin bağlanması səbəbindən aidiyyəti qurumlar ictimai nəqliyyatdan istifadəni tövsiyə edirlər. Ancaq son iki gündə ictimai nəqliyyatda daha ciddi problemlər özünü göstərir: marşrutlar bəzi hallarda 40-50 dəqiqə gecikir, bu müddətdən sonra isə bir neçə eyni nömrəli marşrut ardıcıl gəlir və yenidən böyük bir fasilə yaranır.
Vaxtaşırı olaraq intervalın pozulması və ictimai nəqliyyatın qeyri-stabil fəaliyyətinin insanlara yaşatdığı gərginliklə bağlı açıqlama verən Bakı Nəqliyyat Agentliyinin mətbuat katibi Mais Ağayev deyib ki, avtobusların gecikməsi bir çox küçə və prospektdə avtobus zolaqlarının olmaması ilə bağlıdır.
M.Ağayev ayrıca avtobus zolağı olmadığı müddətdə bu çətinliyin davam edəcəyini qeyd edib:
“Biz başqa küçələrə də zolağın çəkilməsi təklifini vermişik, lakin hələ də reallaşmayıb. Məsələn, Bayraq meydanından Azneft istiqamətinə gedən marşrut avtobusları maneə olmadan hərəkət etsə, bu həm də digər prospektlərin nəqliyyat yükünü azaldar. Həmçinin insanlar görsə ki, ictimai nəqliyyatla getmək daha rahatdır, artıq onlar nə şəxsi avtomobil, nə də taksi xidmətindən istifadə edəcəklər, bu isə yolların yükünün azalmasına səbəb olacaq”.
BNA rəsmisinin ictimai nəqliyyatın rahat işini təşkil etməmiş camaata çağırış etməsinə necə yanaşmaq olar?
Beynəlxalq idarəetmə üzrə ekspert Asif İbrahimov “Bakı-Xəbər”ə bildirdi ki,
bu gün avtobus zolaqlarını müzakirə edəndə hərə öz arqumentini gətiror: “ İlk növbədə BNA etiraz edir ki, bəs “bizim küçələrdə onsuz da yer yoxdur!”, “tıxaclardan onsuz da tərpənmək olmur, siz ne edirsiniz?!”. Tıxaclarla yeganə mübarizə yolu həmin tıxacların tərkib hissəsi olan maşınların sayını küçələrdə azaltmaqdır. Əgər 80 avtomobili bir avtobus və yaxud 300 avtomobili 1 müasir tramvay ilə əvəz etsək, yollarımız xeyli boşalacaq. Tıxacla mübarizədə bundan effektiv nə ola bilər ki? Amma biz görürük ki, əlaqədar qurumlar bunu təşkil etməmiş zolaq qadağasından danışırıar. Elə prospekt və küçələr var ki, orada nəinki avtobuslar üçün xüsusi zolaq yaratmaq, hətta əlavə yol çəkməyə ehtiyac var. Məsələn, hansısa yol iki zolaqdan ibarətdir və həmin zolağın birini avtobus üçün ayırsalar, orada nəqliyyat axınının qarşısını almaq mümkün olmayacaq. Məsələn, Heydər Əliyev və Babək prospektində avtobus zolağı salmaq normaldır. Eyni zamanda Lökbatan dairəsindən Azneft meydanına qədər avtobus zolağı yaradıla bilər. Azneft meydanını keçəndən sonra Neftçilər prospekti başlayır, orada isə zolaq yaratmaq mümkün deyil. Rəşid Behbudov küçəsində daim sıxlıq var. Çünki qarşıda Bakıxanov küçəsi ilə kəsişir. Bakıxanov küçəsində də həmişə nəqliyyatın hərəkətinə üstünlük verilir deyə, R.Behbudov küçəsindən gələn sürücülər gözləmək məcburiyyətində qalır. Biz görürük ki, bir çox küçələrdə zolağın yaradılması effekt vermir. Onda həmin zolağı dərhal ləğv etmək lazımdır.
Hər bir halda dərindən təhlillər aparılmalı, mütəxəssis rəyi öyrənilməli və ictimai rəy nəzərə alınmalıdır. Bu məsələyə birmənalı yanaşmaq olmaz. Əvvəl şəraiti yaradıb, sonra tələb etmək lazımdır”.
Məhəmmədəli QƏRİBLİ
