Məlum olduğu kimi, iyunun 3-də 2022-2023-cü tədris ili üçün keçiriləcək dövlət ümumi təhsil müəssisələrinə müəllimlərin işə qəbulu üzrə müsabiqənin elektron sənəd qəbulu mərhələsinə başlanılır. Sənəd qəbulu ayın 10-dək davam edəcək.
Təhsil İnstitutunun İnsan Resursları Mərkəzinin direktoru Nurlan İsmayılbəyli "Təhsil masası”nda bildirib ki, Müəllimlərin İşə Qəbulu (MİQ) üzrə müsabiqəsinin test mərhələsinin iyulun əvvəlində keçirilməsi nəzərdə tutulur.
Nurlan İsmayılbəyli deyib ki, builki müsabiqəyə təxminən səkkiz minə yaxın vakant yer çıxarılacaq.
Qeyd edək ki, hər il təxminən 50-60 min namizəd müəllimlərin işə qəbulu imtahanında iştirak edir. Ancaq vacant yerlərin sayı 8-9 mindir.
Şübhələr var ki, vakant yerlərin sayı süni şəkildə gizlədilir. Ekspertlər hesab edir ki, vakant yerlərin sayının gizlədilməsinə səbəb bu sahədə güclü rəqabətin yaranmasıdır.
“Vakansiya yerlərinin gizlədilməsinin qarşısının alınması istiqamətində ölkədəki bütün məktəblərdə monitorinqlər keçirilməlidir”
Təhsil eksperti Elçin Əfəndi bildirdi ki, hər il müəllimlərin işə qəbul imtahanında müəyyən problemlər yaranır. Bunlardan ən başlıcası isə vakansiya yerlərinin gizlədilməsidir: "İmtahanda təxminən 50-60 min müəllim iştirak edir. Vakant yerlər isə 8-9 min olur. Təəssüf ki, vakant yerlər direktorlar, yaxud da müvafiq aidiyyəti şəxslər tərəfindən gizlədilir. Həmçinin direktorlar vakant yerləri rüşvət müqabilində kiməsə satırlar”.
Ekspertin sözlərinə görə, hazırda Azərbaycanda ümumilikdə 4400 orta məktəb fəaliyyət göstərir. Müəllim heyətinin sayı isə 160 minə yaxındır.
E.Əfəndi hesab edir ki, vakansiya yerlərinin gizlədilməsinin qarşısının alınması istiqamətində ölkədəki bütün məktəblərdə monitorinqlər keçirilməlidir: “Monitorinq aparılsa, vakant yerlərin gizlədilməsi faktının qarşısını almaq mümkün ola bilər. Həmçinin qarşıda ibtidai sinif müəllimlərinin sertfikasiya imtahanlarının keçirilməsi məsələsi var. İlk olaraq ibtidai sinif üzrə başlanacaq, tədricən digər fənn müəllimlərini əhatə edəcək. Bu sertifikasiyanın keçirilməsi gizlədilən vakant yerlərin üzə çıxarılması ilə nəticələnəcək. Serifikasiya nəticəsində vakant yerlərin sayı artacaq. Növbəti illərdə 15-16 min vakant yerin çıxarılması gözlənilir”.
Günel CƏLİLOVA
