Qlobal iqlim dəyişikliyinin təsiri ilə Azərbaycanda içməli su qıtlığı yaşanmaqdadır. Ölkədə həm suvarma, həm də içməli su ilə təminat baxımından problemlər yaranıb. Xüsusilə son illərdə müşahidə olunan quraqlıq məhdud olan su ehtiyatlarının daha da azalmasına səbəb olub.
Ölkə rəhbərliyi səviyyəsində bu məsələlərə ciddi diqqət yetirilir. Buna baxmayaraq, bəzi bölgələrdə hələ də suvarma problemi yaşanır. Belə məkanlardan biri də Şəmkirin Yeni yol kəndidir. Məlumat üçün qeyd edək ki, təxminən 1 il əvvəl Prezident İlham Əliyev “Şəmkir və Tovuz rayonlarında əkin sahələrinin suvarma suyu ilə təminatının yaxşılaşdırılmasına və əhalinin içməli suya tələbatının ödənilməsinə dair əlavə tədbirlər haqqında” sərəncam imzalayıb. Sərəncama görə, Şəmkir və Tovuz rayonlarının 17 yaşayış məntəqəsində (ümumilikdə 105 min 153 nəfər əhalini əhatə edir) bu məqsədlə 20 ədəd subartezian quyusu layihələndirilməli və qazılmalıdır. Hətta bununla bağlı maliyyə vəsaiti də ayrılıb. Buna görə 1,4 milyon manat, hər quyuya görə 70 min manat ayrılıb. Bu quyuların 10-u Şəmkirin payına düşüb. Ancaq aylardır ki, məsələn, Şəmkir rayonunun Yeni yol kəndində artezian quyusunun qazıldığı, lakin istifadəyə verilmədiyi bildirilir. Sakinlər deyir ki, quyulardakı işlər yarımçıq qalıb.
Şəmkir RİH: “Hazırda həmin kənddə və daha bir neçəsində suvarma probleminin aradan qaldırılması üçün Meliorasiya və Su Təsərrüfatı ASC-nin sifarişilə artezian quyuları qazılır”
Məsələ ilə bağlı Şəmkir Rayon İcra Hakimiyyətindən bildirildi ki, Yeni yol kəndinin sakinləri susuzluqla bağlı bir neçə dəfə quruma kütləvi müraciət ediblər. Hazırda həmin kənddə və daha bir neçəsində suvarma probleminin aradan qaldırılması üçün Meliorasiya və Su Təsərrüfatı ASC-nin sifarişilə artezian quyuları qazılır. Rayonun Düyərli kəndində 2, Yeni həyat kəndində 1, Zəyəm qəsəbəsində 2, Sarıtəpə kəndində 1, Yeni yol kəndində 1 atrezian quyusunun qazılaraq istfadəyə verilməs prosesi yekunlaşmaq üzrədir: “Yaxın vaxtlarda Könüllü, İrmaşlı, Zəyəmcırdaxan kəndlərində də eyni işlər görüləcək. Hər kənddə 1 artezian quyusu qazılacaq. Quyuların qazılmasında podratçı şirkət olaraq “North West” MMC iştirak edir”.
Flora Hacıyeva: “Su resursları ekoloji tarazlığa, kənd təsərrüfatının inkişafına çox böyük təsir göstərir”
Ekoloq Flora Hacıyeva bildirdi ki, su resursları ekoloji tarazlığa, kənd təsərrüfatının inkişafına çox böyük təsir göstərir. Biz kənd təsərrüfatımızı intensiv yollarla inkişaf etdirməliyik və buna nail olmaq üçün kifayət qədər su mənbələrimiz olmalıdır və bu var: “Unutmaq lazım deyil ki, ölkə əhalisinin suya olan tələbatının ödənilməsi hər zaman ölkə rəhbərliyinin diqqət mərkəzində olub. Bu məsələyə xüsusi həssaslıqla yanaşır”.
Günel CƏLİLOVA
