Azərbaycanda ali təhsil müəssisələrinin sonuncu kurs tələbələri dövlət imtahanın ləğv edilməsini istəyir. Tələbələr bununla bağlı sosial şəbəkələrdə kampaniya başladıblar. Onlar qeyd edir ki, ilk dəfə Ümumi Orta Müvəffəqiyyət Göstəricisinə (ÜOMG) görə diplom alan tələbələrdə sadəcə bir semestr distant olmuşdu və həmin semestr də praktika üçün ayrılmış semestr idi.
Ondan sonrakı ilin sonuncu kurs tələbələri ÜOMG-a görə diplom alıblar. Hazırda ali təhsil müəssisələrinin sonuncu kurs tələbələri bildirir ki, dərsləri 3 semestr distant, bir semestr hibrid formada keçmələrinə baxmayaraq, onlar dövlət imtahanına girəcəklər.
Maraqlıdır, ali təhsil müəssisələrində hələ də dərslərin tam əyani formaya keçməməsinə baxmayaraq, bu il sonuncu kurs tələbələrinin diplom imtahanı niyə ləğv edilmir?
“Diplom işində və yaxud da dövlət imtahanında hər hansı bir kəsirin çıxması növbəti təhsil pilləsində təhsilin davamlılığına maneçilik törədə bilər”
Təhsil eksperti Elçin Əfəndi bildirdi ki, dövlət imtahanı tələbəyə əlavə yükdən başqa bir şey deyil: “Nəzərə alsaq ki, tələbələr bu illər ərzində distant təhsildən faydalanıblar, bu səbəbdən dövlət imtahanını vermək düzgün yanaşma deyil. Bu vəziyyətdə qiymətlərin ümumi ortalama ilə hesablanması məqsədəuyğundur. Tələbələrin distant təhsil səbəbindən dərslərini yaxşı mənimsəməməsi və sonunda dövlət imtahanı verməsi ancaq kəsirlə nəticələnə bilər. Dövlət İmtahanı yalnız tələbələrin kəsilməsinə şərait yaradır. Hətta oğlan tələbələrin dövlət imtahanından kəsilməsi onlara hərbi xidmət dövrünü bir il deyil, 18 ay çəkməyə başa gəlir. Baxmayaraq ki, onlar dörd il universtitet oxuyublar. Bundan başqa magistraturaya, müəllimlərin işə qəbul imtahanına hazırlaşan tələbələr də var. Onlar bu zaman hansı imtahana hazırlaşacaqlarını bilmirlər. Tələbələr dövlət imtahanına, magistraturaya, yoxsa müəllimlərin işə qəbuluna hazırlaşsın? Düşünürəm ki, tələbələri incitmədən bunlar nəzərə alınmalıdır”.
Ekspert onu da əlavə etdi ki, 50-dən çox ali təhsil müəssisəsində təxminən 50 minə yaxın buraxılış kursunda təhsil alan şəxs var və onlar dövlət imtahanı ilə sınağa çəkilsə, onların içərisindən bəzi hissə müəyyən faiz göstəricisi ilə kəsiləcək: “Yəni bu kəsilmək kimə sərf edir? Əlbəttə universitetlərə sərf edir. Əslində isə bu heç doğru yanaşma deyil. Yəni ona görə dövlət imtahanını keçirməyin tərəfdarıdırlar. Amma düşünürəm ki, bunu etmək tələbələrin təhsilinin davamlılığına maneçilik törətməkdir. Çünki elə tələbələr var ki, magistratura üzrə imtahan verirlər və artıq may ayının 29-da ikinci şans imtahanı verəcəklər".
Günel CƏLİLOVA
