Azərbaycandan Həcc ziyarəti üçün kvota və qiymət müəyyənləşib. Qafqaz Müsəlmanları İdarəsinin (QMİ) Xarici Əlaqələr şöbəsinin müdiri Vüsal Cahangiri media nümayəndələrinə açıqlamasında bildirib ki, bu il Azərbaycana Həcc ziyarəti üçün 680 nəfərlik kvota ayrılıb.
Onun sözlərinə görə, Həcc ziyarətinin qiyməti 9106 manat (təxminən 5350 ABŞ dolları) müəyyən olunub. Həcc ziyarəti üçün açıqlanan məbləğ birmənalı qarşılanmayıb. Ziyarətin bahalaşması sosial platformada da geniş müzakirələrə səbəb olub.
Qeyd edək ki, 2020-2021-ci illərdə Azərbaycandan pandemiya ilə əlaqədar Həcc ziyarətinə gedən olmayıb. 2019-cu ildə isə Azərbaycandan Həcc ziyarətinin qiyməti 4 285 ABŞ dolları təşkil edib.
Məlumat üçün bildirək ki, son bir neçə ildir, Azərbaycandan Həccə ziyarət yalnız Qafqaz Müsəlmanları İdarəsi tərəfindən təşkil olunur.
QMİ-nin sədr müavini Salman Musayev ARB 24-ə açıqlamasında deyib ki, Bakıdan gediş-gəliş üçün zəvvarlara çəkilən bütün xərclər 5350 ABŞ dollarına daxildir: “Səudiyyə Ərəbistanının qəbul etdiyi qərarlar əsasında qiymətlər xeyli artıb. Hətta zəvvarların sağlamlıq məsələlərinin qorunması da ödənişə daxildir. Əvvəlki illərdə bunların hamısı ödənişsiz idi. Amma bu il bu xərclər də ziyarət səfərinin qiymətinin üzərinə gəlib”.
Qeyd edək ki, Həcc ziyarəti üçün qiymətin yüksəlməsi ziyarətə getmək istəyənlərin narazılığına səbəb olub.
“Həccə getmək istəyən şəxsin 10 min manat pul xərcləməyə imkanı çatırsa, sosial durumu yaxşı olmayan ailələrə kömək etsin”
Ilahiyyatçı Cəmşid Əliyev qeyd etdi ki, bu il Həccin qiyməti çox bahadır. Həcc bir ibadət formasıdır: “Həcc vacib buyrulan ziyarətdir. Kimin maddi imkanı varsa, canı sağlamdırsa ömründə bir dəfə Həcci ziyarət etməlidir kimi fikirlər yersizdir. Ziyarətə sərf olunan pul daha faydalı məqsədlər üçün də xərclənə bilər: “Gedənlərin bəziləri fikirləşir ki, il ərzində bu qədər günah edib rüşvət yemişəm, 5-6 min dollardan keçib yenidən öz işimə davam edim. Bəzi yazıqlar da qəpik-qəpik topladıqları pulu sərf edirlər. Quranda deyilir ki, Həcc ziyarətinə gücü çatanlar getsinlər. Gücün çatırsa get. Yoxsa qəpik-qəpik yığ ki, Həccə gedəcəm? Oranı görəndə nə olur?”.
Ilahiyyatçının sözlərinə görə, günlərlə oteldə qalıb, turist kimi gedib-gələnlər başlayırlar ki, Hacı oldum. Peyğəmbər ömür boyu orada yaşayıb, bircə dəfə Həccə gedib: “Bizimkilər dəfələrlə ziyarətə getməklə sanki peyğəmbərdən üstün olduqlarını göstərməyə çalışırlar. Bunun adı yoxdur. Ondansa aztəminatlı ailələrə kömək etsinlər. Əgər Həccə getmək istəyən şəxsin 10 min manat pul xərcləməyə imkanı çatırsa evsiz gənc ailəyə mənzil almaqda köməklik etsin. O qədər ehtiyacı olan ailələr var ki. Həmin insanlara kömək etmək ziyarətə getməkdən qat-qat üstündür”.
Günel CƏLİLOVA
