Dünya İqtisadi Forumu (WEF) Səyahət və Turizmin İnkişafı İndeksini açıqlayıb. İndeksində Azərbaycan 117 ölkə içində 63-cü yerdədir.
Bu indeks Davosda Dünya İqtisadi Forumunun keçirildiyi vaxtda açıqlanır. Dünyanın bir sıra yerlərində turizm sektoru COVID-19 pandemiyasının vurduğu zərbədən dirçəlməkdədir. Reytinqdə ilk beşliyi Yaponiya, Birləşmiş Ştatlar, İspaniya, Fransa və Almaniya tutub. İndeks 117 iqtisadiyyatı səyahət və turizm sənayesinin inkişafı, davamlılığı və möhkəmliyinə təsir göstərən faktorlar üzrə dəyərləndirir. Bu sənaye öz növbəsində iqtisadi və sosial inkişafa töhfə verir. Hesabatda deyilir ki, Ukraynada gedən müharibə, işğalın Rusiyaya sanksiyalara və səyahət qadağalarına səbəb olması turizm sektorunun dirçəlməsinə təzyiqi artırıb. Dünyanın bir sıra aviaşirkətləri əməliyyatlarının marşrutlarını dəyişiblər ki, bu da səyahətin vaxtını və xərcini artırıb. Ümumilikdə Rusiya və Ukrayna beynəlxalq turizm xərcləmələrinin 3 faizini təşkil edir. Rusiyalı turistlər əsasən Azərbaycana, Gürcüstana, Türkiyəyə, İsrailə, BƏƏ-yə və Tailanda gedir. Ümumilikdə, 2021-ci ilin yanvarıyla bu ilin yanvarı üzrə beynəlxalq turist səyahətlərinin fərqi 2021-ci il üzrə ümumi artımdan böyük olub.
İndeksdə diqqəti çəkən məqam odur ki, Azərbaycan Cənubi Qafqazın digər iki ölkəsindən geridə qalır. Belə ki, qonşulardan Ermənistan 61, Gürcüstan 44-cü yerdə olduğu halda, Azərbaycan 63-cü yerdədir. Gürcüstanda turizmin yetərincə yaxşı inkişaf etməsi məlumdur. Ancaq turizm indeksi üzrə Azərbaycanın Ermənistandan belə geridə qalması təəccüblü görünür. O üzdən, bütün bunları ekspertlər necə dəyərləndirir?
“Turizmin inkişafı ilə bağlı dövlətin təşviq siyasəti genişlənməlidir”
Məsələyə münasibət buldirən Azərbaycan Sağlamlıq və Termal Turizmə Dəstək Assosiasiyasının sədri, turizm eksperti Ruslan Quliyev bununla bağlı bir sıra məqamlara toxundu: “Ümumiyyətlə, Dünya İqtisadi Forumunun turizm indeksi ilə bağlı açıqlaması göz önündədir. Əslində digər sahələr üzrə müxtəlif indekslərə görə Azərbaycan öndədir. Elə sahələr var ki, biz geridəyik. Əminliklə deyə bilərik ki, istər Dünya Bankının indikatorları, istərsə də digər parametrlərə görə Azərbaycanda çoxvektorlu islahatlar aparılır. O üzdən, bizim 63-cü yerdə olmağımız hansısa problem yaratmır və bu elə bir önəm kəsb etmir. Əsas odur ki, Azərbaycan 117 ölkə arasında turizmlə bağlı mövqeyini getdikcə yaxşılaşdırır. Bu da islahatlar nəticəsində mümkün olub. Burda dövlətin ən böyük rolu, bölgələr də daxil olmaqla, infrastruktur layihələrini həyata keçirməsidir. Bu, turizmin inkişafını şərtləndirən birbaşa amillər içərisindədir. Ancaq buna baxmayaraq, turizmin inkişafı ilə bağlı dövlətin təşviq siyasəti genişlənməlidir”.
Ekspert onu da qeyd etdi ki, logistika dəhlizlərinin açılması Azərbaycanın indeksinin yaxşılaşmasına birbaşa təsir edəcək.
Vidadi ORDAHALLI
