Nəsimi rayonu 14 nömrəli tam orta məktəbin 6 “A” və 7 “A” sinif şagirdlərinin iştirakı ilə 28 may Müstəqillik Gününə həsr edilmiş “Bugünkü müstəqil Azərbaycan Azərbaycan Xalq Cumhuriyyətinin varsidir” adlı tədbir keçirildi. Tədbir Azərbaycanın dövlət himni ilə açıldı. Məktəbin 6 “A” sinfinin sinif rəhbəri Nüşabə Əhmədovanın və 7 “A” sinfinin rəhbəri Səadət Qasımovanın təşkilatçılığı ilə keçirilən tədbiri giriş sözü ilə S.Qasımova açdı. S.Qasımova bildirdi ki, müasir Azərbaycan dövləti Şərqdə ilk demokratik dövlət olan Azərbaycan Xalq Cumhuriyyətinin siyasi varisidir. “Bir kərə yüksələn bayraq bir daha enməz” ideyası ilə xalqımıza bayraq, torpaq sevgisini, müstəqillik, azdlıq eşqini dadızdıran Cumhuriyyət liderlərinin önündə gedən və Cumhuriyyətin qurucusu olan Məhəmməd Əmin Rəsulzadənin bu ideyasına Azərbaycan xalqı əbədi olaraq sadiq qaldı, bayrağı, torpağı uğurunda mübarizə aparıb XX əsrin sonlarına yaxın yenidən bu torpaq üstündə müstəqil Azərbaycan dövlətini bərpa etdi. S.Qasımova onu da vurğuladı ki, şagirdlər tariximizin ayrılmaz parçası olan Cumhuriyyətlə, bütövlükdə xalqımızın əzəmətli tarixi bağlı olduqca maraqlı tədbir hazırlayıb və çıxışının sonunda qonaqları tədbirə baxmağa dəvət etdi.
Əvvəlcə Məhəmməd Əmin Rəsulzadənin “Sən bizimsən, bizimsən, durduqca bədəndə can,
Yaşa, yaşa, çox yaşa, ey şanlı Azərbaycan!” haraylı, nidalı səsi zala yayıldı, sonra söz 6 “A” və 7 “A” sinif şagirdlərinə verildi. Şagirdlər kiçik məktəb səhnəsində böyük həyacanla, sevgi və həvəslə, tariximizə məhəbbətlə, sədaqətlə olduqca zəngin kompazisiya təqdim etdilər. Tədbirdə tariximizin demək olar ki, bütün dönəmləri barədə, xüsusən də Azərbaycanın ikiyə parçalanması faciəsi, bədnam Türkmənçay müqaviləsi, Borçalının, İrəvanın, Dərbəndin bizdən qoparılması, məruz qaldığımız deportasiyalar barədə şeirlər, mətnlər səsləndirildi. Tədbirdə həmçinin xalq qəhrəmanı Babəkin, başqa qəhrəmanlarımızın dövlətimizin müstəqilliyi, xalqımızın azadlığı uğurunda mübarizəsini əsk etdirən səhnələr də təqdim edildi. Cümhuriyyət qurucularının hər birinin fotoşəkillərinin və adlarının əks olunduğu maykalar geyən uşaqlar onlar haqda məlumat verdilər. Məhəmməd Əmin Rəsulzadə, Fətəli Xan Xoyski, Əhməd bəy Ağayev, Nəsib bəy Yusifbəyli, Səməd bəy Mehmandarov və başqa dahiş şəxsiyyətlərimiz barədə məlumat verən məktəblilər müstəqil Azərbaycanın memarı, xalqımızı, dövlətimizi parçalanmaqdan, bölünməkdən xilas edən, Cumhuriyyət tarixinə, Cumhuriyyət qurucularının irsinə ən böyük qiyməti verən Heydər Əliyev, onun davamçısı, Müzəffər Ali Baş Komandan İlham Əliyev, həmçinin də qardaş Türkliyə Cumhuriyyətinin Prezidenti Rəcəb Tayyib Ərdoğan barədə də şagirdlər maraqlı çıxışlar etdilər. Vətənpərvərlik mahnılarının, milli rəqslərimizin müşaiəti ilə keçirilən tədbirdə xalqımızın bütövlüyünü, dövlətə və dövlətçiliyə bağlılığını ifadə edən fikirlər səsləndirildi.
Sonda Nəsimi rayonu 14 nömrəli tam orta məktəbin direktoru Rəfael Hüseynov çıxış edərək Azərbaycan Xalq Cumhuriyyətinin milli dövlətçilik tariximizdə oynadığı roldan danışdı. R.Hüseynov qeyd etdi ki, Azərbaycan Xalq Cümhuriyyəti cəmi 23 ay fəaliyyət göstərsə də, 1920-ci ildə bolşeviklərin hərbi müdaxiləsi ilə süquta uğradılsa da, xalqımızın azadlıq və istiqlal mücadiləsinin sönməyən mayakı kimi həmişə şüurlarda yaşayıb. 1991-ci ildə Azərbaycanın öz müstəqilliyini yenidən bərpa etdiyini qeyd edən R.Hüseynov bildirdi ki, xalqımız azadlıq və müstəqillik uğrunda çox qurbanlar verib.
Bu gün Azərbaycanın müstəqil dövlət kimi yaşamasında ulu öndər Heydər Əliyevin xüsusi rolunu qeyd edən R.Hüseynovun sözlərinə görə, xalqın tələbi ilə H.Əliyev hakimiyyətə gəlməsəydi biz bu gün qüdrətli və müstəqil Azərbaycan görə bilməzdik. Müzəffər Ali Baş Komandan İlham Əliyevin rəhbərliyi ilə 44 günlük müharibədə qazandığımız möhtəşəm qələbədən sonra ölkəmizin dünyada daha da gücləndiyini qeyd edən R.Hüseynov bildirdi ki, gələcəkdə Azərbaycan daha da güclənəcək. Şagirdlərin tariximizi dəqiq öyrənməli olduğunu, dostumuzu-düşmənimizi tanımalı olduğunu deyən məktəb direktoru bildirdi ki, onlar hər zaman Azərbaycanın müstəqilliyini qorumalı və bayrağımızı ucalara qaldırmalıdır.
İradə SARIYEVA
