Azərbaycanda “saxta qazilər” - şəxsi mənafe, dövlət orqanlarının vurulmasının yeni üsulu...

Mübariz Göyüşlü: “Çirkin yollara əl atıb qazi adından sui-istifadə etməyə cəhd göstərirlər, bu yolverilməzdir”

img

Məlum olduğu kimi, Azərbaycan dövləti mütəmadi olaraq qazilərimizə, eləcə də şəhid ailələrinə böyük dəstək göstərir, onların sosial təminatının yaxşılaşdırılması üçün əməli addımlar atır. Ancaq çox təəssüflər olsun ki, cəmiyyətimizdə dövlətin qayğı siyasətini görməzdən gələnlər də olur, hətta bu nəcib işi ləkələməyə cəhd edənlər də tapılır.

Bu gün  qazi, şəhid ailəsi adından sui-istifadə edənlərin olması və onların qanunazidd əməlləri ilə rastlaşmağımız onu göstərir ki, bizim içimizdə də dövlətin dəstəyini, qayğı və diqqətini qaralamağa çalışanlar var. Bilirik ki, bəzi şəxslər özlərini qazi kimi təqdim edir və bu ad altında layiq olmadığı imtiyazlar əldə etməyə çalışır, buna nail olmadıqda isə  müxtəlif dövlət orqanlarını şantaj etməyə, müxtəlif səhnələr quraraq dövlət orqanlarını qınaq hədəfinə çevirməyə cəhdlər edirlər.

  • “Belələrinin həm özləri saxtakarlıq edir, həm qayda-qanunları pozurlar, haqsız tələblər irəli sürürlər, həm də qazi adına ləkə gətirirlər”

“Müasir İnkişaf” Birliyinin sədri Mübariz Göyüşlü bizimlə söhbətində bildirib ki, şəhid ailəsi və qazi adına ləkə gətirən belə hallar yolverilməzdir və ölkə ictimaiyyətinin belələrinə münasibəti çox mənfidir. M.Göyüşlü hesab edir ki, dövlət 44 günlük Vətən müharibəsində qəhrəmanlıq göstərib qazi adı qazananlara da, Birinci Qarabağ müharibəsi iştirakçılarına da lazımı diqqət və qayğını göstərir. “Vətən uğrunda döyüşüb sağlamlığından keçən əsl qazilər, qəhrəman insanlar onlara çatan haqqı bu və digər formada alırlar. Dövlət bütün hallarda torpaq uğrunda döyüşən qazilərə diqqət-qayğı göstərir və onlara şərait yaradır. Maraqlıdır ki, torpaq uğrunda həqiqətən vuruşan insanlar dövlətdən razılıq edir. Çox təəssüf ki, torpaqlarımızın azadlığı uğrunda mübarizədə iştirak etmədiyi halda özünü “qazi” adlandıranlar da tapılır. Yəni ömründə əlinə silah götürüb döyüşməyən adamlar var ki, özlərini “qazi” adlarıb dövlətdən haqları çatmayan imtiyazları tələb edirlər. Onlar çirkin yollara əl atıb qazi adından sui-istifadə  etməyə cəhd göstərirlər, bu yolverilməzdir. Belələrinin həm özləri saxtakarlıq edirlər, həm qayda - qanunları pozurlar, haqsız tələblər irəli sürürlər, həm də qazi adına ləkə gətirirlər. Vətən üçün əsl döyüşən fədakar vətən oğullarının əməyinə kölgə salmış olurlar. Ən pis tərəfi budur. Bu adamların bu cür saxtakarlıq hərəkətləri qazilər haqda bir növ cəmiyyətdə mənfi rəy yaratmış olur. Ona görə də hesab edirəm ki, belə şəxslər aşkarlanarkən onlara qarşı həm ictimai qınaq, həm də cəza tədbirləri görülməlidir. Bəlkə də bu cəzalar daha sərt olmalıdır. Onlar fərqinə varmırlar ki, hansı müqəddəs adı ləkələyir, kimlərin əməyini yerə vururlar”.

M.Göyüşlü vurğuladı ki, bəzi şəxslərin özlərini qazi kimi təqdim etməsinə adi yanaşmaq olmaz, çünki onlar bizim qəhrəman oğullarımızın əməyindən, fədakarlığından sui-istifadə edirlər. Ekspertin sözlərinə görə,  dövlət orqanları da, ictimaiyyət də belələrinə qarşı barışmaz olmalı və dövlətin qayğı siyasətinin qaralanmasına imkan verməməlidir. Son zamanlar bəzilərinin ucuz qazanc yolu kimi hay-küy salıb dövlətdən imtiyazlar əldə etməyi hədəflədiyini deyən M.Göyüşlü deyir ki, buna imkan verilməli deyil. O qeyd etdi ki, qəhrəman oğullarımızın müqəddəs adına ləkə gətirməyə və dövlətin qayğı siyasətini pisləməyə yönələn hər bir cəhdə qarşı barışmaz olmalıyıq.

İradə SARIYEVA

Peşə etikası

Son xəbərlər