DİM-in abituriyentlərlə bağlı cəza tədbiri qanunsuz hesab edildi - etirazlar var...

img

Məlumdur ki, bir neçə gün öncə II və III ixtisas qrupları üzrə qəbul imtahanı keçirilib. İmtahan prosesinin idarə olunması üçün DİM-də operativ qərargah fəaliyyət göstərib, müntəzəm olaraq imtahanın keçirildiyi binalarla əlaqə saxlanılıb və imtahanın gedişi nəzarətdə olub.

İmtahana gələn 6 nəfər üzərində mobil telefon aşkarlandığı üçün imtahandan xaric olunub. 1 nəfərdə isə “ağıllı” saat aşkarlanıb.

Qeyd edək ki, ali təhsil müəssisələrinə sənəd verən bəzi abiturientlərin imtahan binasına mobil telefon, “ağıllı” saat və digər qadağan olunmuş vasitələrlə keçməyə cəhd göstərdiklərinin, demək olar ki, hər il şahidi oluruq. Belə abituriyentlər imtahandan xaric edilsələr də, növbəti mərhələdə yenidən imtahan verə bilirdilər. Ancaq bundan sonra belə olmayacaq, yəni həmin abituriyentlər imtahanın növbəti cəhdinə buraxılmayacaqlar, üstəlik, verdiyi imtahan nəticəsi də ləğv olunur. Bu qərar abituriyentlər tərəfindən narazılıqla qarşılanır.

Qəbul qaydalarında qeyd olunur ki, (6.5.) abituriyentin bu Qaydaların 6.4-cü bəndində göstərilən hərəkətlərə yol verməsi halları Mərkəz tərəfindən aşkar edildikdə, onun müsabiqə (imtahan) nəticələri ləğv edilir, həmin şəxslər yenidən imtahan verə bilər. Ancaq bu il bunun əksi müşahidə olunur. Bu qərar nə dərəcədə ədalətlidir?

  • Etibar Əliyev: “Qəbul imtahanlarına əlavə vasitələrlə daxil olmaq istəyən abituriyentlərlə bağlı daha sərt qaydalar tətbiq edilməlidir”

Millət vəkili, Təhsil Nazirliyi yanında İctimai Şuranın üzvü Etibar Əliyev “Bakı-Xəbər”ə açıqlamasında qeyd etdi ki, qəbul imtahanının qaydası ilə bağlı dəfələrlə ictimaiyyətə məlumat verilib ki, imtahana gələn abituriyent kənar vasitələrdən istifadə etməməlidir. İmtahan zamanı köçürmə, müxtəlif vasitələrlə sui-istifadə hallarının qarşısı alınmalıdır: “İmtahana əlavə vasitələrlə daxil olmağın qarşısı alınmalıdır. Ümumiyyətlə, bu düşüncədə olmaq düzgün deyil. Savadın varsa imtahana gir, sualara cavab ver. Yoxsa telefon və ya digər vasitələrdən istifadə etmək düzgün deyil. Abituriyentin biliyi ali məktəbə qəbul olunacaq səviyyədə deyilsə, həmin şəxs peşə məktəbinə üz tutsun”.

Millət vəkili onu da əlavə etdi ki, bir çox xarici ölkələrdə köçürmə halları əxlaq məsələsi kimi dəyərləndirilir: “Testin hardansa oğurlanması, imtahan zamanı elektronik vasitələrdən istifadə qadağandır. Bu qayda bizdə də olmalıdır. Onu da əlavə edim ki, pandemiya zamanı distant təhsilə keçilmişdi. Distant təhsil zamanı xeyli sui-istifadə halı aşkar edildi.  Belə ki, ali məktəbdə tələbələrin 30 faizi əlaçı olurdu. Bu şübhə doğurur”.

E.Əliyev hesab edir ki, qəbul imtahanlarına əlavə vasitələrlə daxil olmaq istəyən abituriyentlərlə bağlı daha sərt qaydalar tətbiq edilməlidir.

  • Kamran Əsədov: “Başa çatmış və heç bir qayda qozuntusuna yol verilməmiş imtahanın nəticələrinin ləğv edilməsi qanuna ziddir”

Təhsil eksperti Kamran Əsədov isə hesab edir ki, başa çatmış və heç bir qayda qozuntusuna yol verilməmiş imtahanın nəticələrinin ləğv edilməsi qanuna ziddir. Bundan başqa, qanunda tələbənin növbəti imtahana buraxılmaması ilə bağlı da heç bir bənd yoxdur: “Dövlət İmtahan Mərkəzi abituriyentin yalnız qayda pozuntusuna yol verdiyi imtahanının nəticəsini ləğv edə bilər. Qayda pozduğuna görə növbəti şansını əlindən ala bilməz”.

Ekspert onu da əlavə etdi ki, abituriyent imtahan zamanı qayda pozubsa həmin imtahanın nəticəsi ləğv edilə bilər: “Nazirlər Kabineti tərəfindən təsdiq edilmiş ali məktəblərə qəbul qaydalarında, eyni zamanda, DİM tərəfindən çap edilərək abituriyentlərə verilən Yaddaş kitabçasında onun növbəti imtahana buraxılması ilə bağlı məhdudiyyət öz əksini tapmayıb. Bu isə o deməkdir ki, həmin şəxsin təhsil almaq hüququnu məhdudlaşdırırıq”.

Günel CƏLİLOVA

Peşə etikası

Son xəbərlər