Bolt sürücüləri ciddi tələblərlə şirkətin boykotuna başlayır - Şirkətdən reaksiya…
“Bolt” şirkətində çalışan sürücülər etiraz aksiyası keçirməyə hazırlaşır. Bu barədə həmin sürücülərdən biri, eyni zamanda aksiyanın təşkilatçısı Nicat Məmmədov “Bakı-Xəbər”ə açıqlamasında qeyd edib ki, 27 may, axşam saat 5-7 arası bütün Bolt sürücüləri hamı birdən proqramı bağlayıb Boltu boykot edəcək: “Bu 2 saat ərzində kim ki, gündəlik arenda verir, başqa şirkətin programı ilə işləyə bilər, təki Bolt bağlı olsun”.
O bildirib ki, eyni zamanda boykot ərzində hər kəs öz müştəri programından girib mərkəz (Sahil, 28 may, İşərişəhər) ərazilərə “Bolt”dan sifariş verəcək. “Yəni olduğumuz yeri, məsələn, 28 Mall, Hökümət Evi, Sahil metrosu, Qız Qalası və s. göstərərək, həmin yerlərə taksi çağıracağıq. Sifarişi qəbul edən sürücüyə məlumat verəcəyik ki, saat 5-dən 7-yə kimi hamı proqramı bağlayıb, sən də bağla. Beləcə boykotdan məlumatı olmayan şəxsləri də boykota dəvət edəcəyik”.
- Aksiyanın təşkilatçısı Nicat Məmmədov: “Bu, boykotun 1-ci mərhələsidir: “2 saat aralığında vaxtı ona görə qoymuşuq…”
Aksiya iştirakçısı onu da qeyd edib ki, bu, boykotun 1-ci mərhələsidir: “2 saat aralığında vaxtı ona görə qoymuşuq ki, bütün gücümüzü 2 saat vaxta sərf edib daha çox effektiv olaq. Bu saat aralığı növbəti günlərdə daha da çoxaldılacaq. Ta o vaxta kimi ki, “Bolt” məcbur qalıb bizim tələbləri yerinə yetirəcək. Əsas tələbimiz komissiya haqqının 20%-dən 10%-ə endirilməsi, minimal gediş haqqının 2.40 AZN-dən başlaması, gedilən ünvanın, qiymətin, ödəniş üsulunun sürücüyə göstərilməsidir. Bununla yanaşı, tələb edirik ki, kartla olan sifarişləri nağdlaşdırmaqda sürücülərə çətinlik yaradılmasın. Pul 1-2 gün ərzində avtomatik sürücünün hesabına köçürülsün və ya gündəlik benzin talonu verilsin. Gözləmə vaxtına görə hər dəqiqə ən azı 10 qəpikdən hesablansın. Hazırda gözləməyə görə hər dəqiqənin qiyməti 2 qəpikdir. Müştəri sifariş verdiyi ünvandan artıq məsafə qət edibsə, onun ödənişi proqramda avtomatik hesablansın. Sürücülər səbəbsiz yerə bloklanmasın, nəsə problem varsa, ədalətli şəkildə araşdırılsın. Sürücülərə verilən sifarişlər hava məsafəsilə hesablanmasın. Məsafəyə görə hesablanan məbləğlər düzgün hesablansın. Bəzən yol olmayan yerlərdən məsafə hesablanır. Bu, əsasən mərkəzdən kənar yerlərdə olur. Sürücülərin pulunu verməyib qaçan müştərilərin ödənişi "Bolt” tərəfindən tam olaraq kompensasiya olunsun. Ləğv edilən sifarişlərə görə sürücülərə kompensasiya ödənilsin”.
- “Bolt”: “Ümidvarıq ki, platformamızın davamlı inkişafını sürücü şərtlərilə razı olan sürücülərlə davam etdirəcəyik”
“Bolt” sürücülərinin aksiya keçirməsi və onların tələbləri barədə “Bolt”-un Bakı ofisindən bildirildi ki, sürücülərin tələbləri ilə yaxından tanış olublar: “Müraciət edilən hər bir sürücü sorğusuna şirkətimizin Dəstək komandası tərəfindən cavab verilib. Sürücülər platformamızdan qeydiyyatdan keçərkən minimal gediş haqları, komissiya şərtləri və istifadəçi qaydaları ilə yaxından tanış olurlar. Hər bir sürücü ilə platformamızın istifadə qaydalarına aid zəngli təlimatlandırılma aparılmaqdadır. Onların əsas missiyası müştəri və sürücü-partnyorlar arasında vasitəçi kimi hər tərəfə uyğun təkliflərlə gediş təqdim etməkdir. Hər bir sürücü bizim üçün vacibdir və ümidvarıq ki, platformamızın davamlı inkişafını sürücü şərtlərilə razı olan sürücülərlə davam etdirəcəyik”.
- Eldəniz Cəfərov: “Bu gün taksi operator şirkətlərinin sürücülərdən aldığı komissiya haqqı yüksəkdir, bu mütləq aşağı salınmalıdır”
Nəqliyyat məsələləri üzrə ekspert Eldəniz Cəfərov bildirdi ki, əsas problem sürücülərin maddi rifahı ilə bağlıdır: “Mən taksi sürücülərinin hüquqlarının beynəlxalq taksi operatorları tərəfindən pozulmasının əleyhinəyəm. Buna son qoyulmalıdır. Bu gün taksi operator şirkətlərinin sürücülərdən aldığı komissiya haqqı yüksəkdir. Bu mütləq aşağı salınmalıdır. Hazırda operator şirkətləri 15-20% civarında komissiya haqqı tutur. Bu rəqəm 10%-i ötməməlidir. Belə olan halda taksi qiymətləri də yüksəlməz”.
Ekspert onu da əlavə etdi ki, taksi şirkətləri və fərdi şəxslərin fəaliyyətləri Nazirlər Kabinetinin 4 mart 2019-cu il reqlamenti ilə tənzimlənir.
Günel CƏLİLOVA
