Keşlədə Şəhidlər Xiyabanı yanında gecə klubu - narazılıq sakinlərdən, cavab İcradan...

img

Bir neçə gün əvvəl Bakının Keşlə qəsəbəsində yerləşən Şəhidlər Xiyabanı yaxınlığında gecə klubu açılıb. Həmin ərazidə yaşayan sakinlər gecə klubunun açılmasına etiraz ediblər. Hətta ərazidə sakinlərlə klub rəhbərliyi arasında anlaşılmazlıq yaranıb, işə polis qarışıb.

Şəhidlər Xiyabanın yaxınlığında gecə klubunun açılması ölkə ictimaiyyəti tərəfindən narazılıqla qarşılanır. 

  • Elçin Bayramlı: “Əyləncə mərkəzinin, biabırçı bir obyektin müqəddəs məkanın yanında olması etik baxımdan düzgün deyil”

“Altay” Sosial İqtisadi Araşdırmalar Mərkəzinin rəhbəri, sosioloq Elçin Bayramlı bildirdi ki, Şəhidlər Xiyabanı ölkənin ən müqəddəs məkanlarından biridir. Əyləncə mərkəzinin, biabırçı bir obyektin müqəddəs məkanın yanında olması etik baxımdan düzgün deyil. Bu ancaq mənəvi  terrordur: “Oğlanlarımız ona görə şəhid olmadılar ki, onlara dırnaqarası hörmət qoyulsun. Bu səbəbdən də Şəhidlər Xiyabanının yanında gecə klubuna fəaliyyət göstərməsinə dövlət qurumları və hər bir Azərbaycan vətəndaşı sərt reaksiya verməlidir”.

Həmsöhbətimiz onu da əlavə etdi ki, son illər mənəvi dəyərlərin deqradasiyası müşahidə olunur. Bu cür xoşagəlməz halların sayı çoxaldıqca, gənclərdə yanaşı duran iki yerdən birinə maraq artır: “Yaxşı olar ki, əyləncə mərkəzlərini açan şəxslər həmin obyekti başqa ərazilərdə açsın. Ümumiyyətlə, ölkəmizdə gecə klublarının olmaması daha yaxşı olar. Olursa da, əhalini qıcıqlandıracaq yerlərdə olmasın”.

Sosioloqun sözlərinə görə, ölkəmizdə mənəvi dəyərlər öndə olmalıdır. Bunun üçün insanlar ilk növbədə adət-ənənələrinə hörmət etməlidir: “Elə məsələlər var ki, onlar əsrlərdir insanların yaddaşına oturub, bu da xalqımızın mənəvi zəngin olmasına kömək edir. Nəzərə almaq lazımdır ki, dövlət başçısı mənəvi dəyərlərimizin mühafizəçisi olduğu halda, bu cür biabırçılığa icazə verənlər həm mənəvi, həm də hüquqi baxımdan məsuliyyət daşıyırlar. Çünki o şəxslərin bu əməli ölkə rəhbərinin apardığı işlərə qarşı böyük bir təxribatdır”.

  • Nizami RİH: “Gecə klubu artıq bağlanıb”

Nizami Rayon İcra Hakimiyyətindən “Bakı-Xəbər”ə bildirildi ki, adıçəkilən ərazidə olan gecə klubu artıq bağlanıb: “Klubun açılmasına və ya bağlanmasına rəyi icra hakimiyyəti deyil, aidiyyəti qurumlar verir. Həmin məkan sahibkarlıq subyektidir. O cür məkanlarla aidiyyəti qurumlar məşğul olur”.

Günel CƏLİLOVA

Peşə etikası

Son xəbərlər