“Bakı apteklərinə külli miqdarda saxta və qorxulu şprislər paylanıb” iddiası…

img

Son zamanlar bazarda keyfiyyətsiz şprislərin dövriyyədə olması barədə məlumatlar yayılmaqdadır. Yayılan məlumatlar cəmiyyətdə ciddi narahatlıq yaradıb və geniş müzakirələrə səbəb olub.

Məlumatlara görə, dövlət xəstəxanalarına, poliklinikalara və apteklərə külli miqdarda mənşəyi məlum olmayan, keyfiyyətsiz, hətta yararsız olduğu görünən şprislər paylanılıb. Bu şprislər ölümlərə səbəb ola bilər. Həmin şprisler qara porşenlidir və silindir üzərində bölgü şkalası yoxdur.

  • Eyyub Hüseynov: “Təhlükəli şprislərdən dövlət və özəl tibb müəssisələrində də geniş istifadə olunur”

Məsələ ilə bağlı “Azad İstehlakçılar Birliyi”nin sədri Eyyub Hüseynov bildirdi ki, 2022-ci ilin fevral ayından başlayaraq rəhbərlik etdiyi birliyin qaynar telefon xəttinə çoxsaylı istehlakçılar zəng vuraraq standartlara uyğun olmayan, qara porşenli və hətta silindir üzərindəki bölgü şkalası əllə toxunmaqla pozula bilən, bəzən iynələrinin sonluğu paslanmış şprislər barədə məlumatlar verilir. Nümunələr ofisə gətirilir: “AİB-ə daxil olan ardı kəsilməyən istehlakçı zəngləri səbəbilə apteklərdə kiçik bir monitorinq apardıq. 2019-cu ildən bu sahədə bugünə olan dəyişikliyə nəzər yetirək. Məlum oldu ki bazarın 80 faizindən çox yerlərdə (apteklərdə) ekspertizada standartlara uyğunsuzluğu 2019-cu ildə təsdiq olunmuş şprislər bu gün də satılır. Silindrin üzərindəki bölgü şkalası əllə toxunmaqla pozulan, silindiri çox bulanıq, demək olar ki, qara rəngdə olan, porşenin sonluğunda yağa bənzər maddə olan, iynəsinin sonluğunda pas görünən, dərman çəkmək istədikdə dayanma məhdudedicisi olmayan porşenlərlə təchiz olunmuş şprislər və s. satılır. “Səlahiyyətli Qurum” adlandırılan Azərbaycan Respublikası Səhiyyə Nazirliyi “Analitik Ekspertiza Mərkəzi”MMC-nin direktoru Murad Süleymanovun imzası ilə AİB-ə ünvanlanmış 15/13361 saylı cavab məktubunda yazılır: “...sizdəki şprislərin hansı mal partiyası ilə və kim tərəfindən gətirildiyini müəyyən etmək mümkün deyil. Əgər idxalına icazə verilməyibsə, bu məsələ inzibati və cinayət məsuliyyəti yaradır ki, bu da hüquq-mühafizə orqanlarının səlahiyyətləri daxilindədir”. O zaman müvafiq orqanlar bir-birinin üzərinə atsalar da, sonda medianın hesabına bu cür təhlükəli şprislər bir müddət apteklərdən yoxa çıxdı. Təəssüflər olsun ki, bu gün yenidən apteklərdə bu cür təhlükəli və mənşəyi bilinməyən şprislər satılır”.

Ekspert qeyd edib ki, apteklərdən standartın tələblərinə cavab verməyən şprislər alınıb və kassa çeki ilə birlikdə təşkilatın ofisində saxlanılır.

E.Hüseynovun sözlərinə görə, təhlükəli şprislərdən dövlət və özəl tibb müəssisələrində də geniş istifadə olunur. İstisna olunmur ki, bu təhlükəli şprislər tenderlərdə də təklif olunur: “Adıçəkilən təhlükəli şpris nümunələrinin təhlükəli olduğunu müəyyən edilməsi, onların keyfiyyətinin yoxlanılması və mənşəyinin müəyyən edilməsi üçün nümunələri və satış məkanlarını təqdim etməklə, Analitik Ekspertiza Mərkəzinə müraciət etmişik. Maraqlıdır, görəsən, 2 il öncə bu cür təhlükəli şprislərin idxalçısını və mənşəyini müəyyən edə bilməyən Analitik Ekspertiza Mərkəzi bu gün necə, müəyyən edə biləcəkmi?”.

  • Pərvanə Mustafayeva: “Keyfiyyətsiz şprislər orqanizm üçün real təhlükə mənbəyidir”

Həkim ekspert Pərvanə Mustafayeva bildirdi ki, bazarda keyfiyyətsiz şprislərin satılması barədə məlumatlar ciddi şəkildə araşdırılmalıdır: “Bu problem mövcuddur. Xeyli vaxtdır ki, biz də öz təcrübəmizdə şahidi oluruq. Məsələn, şprisdən ya vurulan məhlul axır, ya da şpris çat verir. Təbii ki, bu, məhsulun keyfiyyətsiz olmasının göstəricisidir. Mən xarici ölkələrdə şprislərdən istifadə etmişəm. Onların keyfiyyəti bizdə satılanlardan çox-çox fərqlənir. Hesab edirəm ki, digər bəzi məhsullar kimi bu məhsulun da ölkəmizə ən keyfiyyətsizi idxal olunur. Əslində şprisin hazırlandığı materiallar insan orqanizmi üçun zərərsiz olmalıdır. O baxımdan keyfiyyətsiz şprislər orqanizm üçün real təhlükə mənbəyidir. Həmin məhsullar əlavə problemlər yarada bilər. Tutaq ki, bəzi dərman maddələri ilə reaksiyaya girə bilər və s. Digər tərəfdən, şprislər adətən qamma şüalanma ilə sterilizə olunur. Amma belə keyfiyyətdə hazırlanan şprislərin adekvat sterilizasiyası da, təbii ki, şübhə doğurur”.

Günel CƏLİLOVA

Peşə etikası

Son xəbərlər