“Suvarma mövsümü gəlib çatıb, yenə ağaclarımıza baxa-baxa qalmışıq. Gözümüzün önündə hər gün bir neçə ağac quruyur, çıxarıb atırıq. Şəxsən mənim bağda 100-dən çox ağacım vardı. Bağdan hər il azı 3500-4000 manat mənfəət götürürdüm.
İndi vur-tut 30 ağac qalıb, onları da suvara bilmirəm, çoxu quruyub”. Bu sözləri “Bakı-xəbər”ə Lənkəranın Aşağı Təngivan kənd sakini Ziyafət Əliyev deyir.
Kənd sakini Ziyafət Əliyev: “İllərlə bağ saxlayırsız, o bağ sizin yeganə dolanışıq yerinizdir, yeganə təsərrüfatınızdır və bir gün kimsə gəlib hər-şeyi alt-üst edir”
O qeyd edir ki, 30 ildən çoxdur ki, meyvəçiliklə məşğul olur: “Ancaq son illər Yuxarı və Aşağı Təngivan kəndindəki xeyli ailə feyxoa bağlarından əlini üzüb. Əvvəllər bağlar kustar yolla qazılmış su quyusundan su çəkməklə bağları suvarılırdı. Sonralar birləşib su mühərriki aldıq, mühərrik vasitəsilə bağlara su vurmağa başladıq. Aşağı və Yuxarı təngivanlılar öz bağlarını beləcə, növbəli şəkildə suvarır, mövsümdə meyvələri yığıb satmaqla normal yaşayırdıq. Bir neçə il əvvəl “Kaspi Yıldız” MMC tərəfindən qum-çınqıl hasilatı məqsədilə yaxınlıqdakı çayın dibi və sahili qazıldı, sonralar bu qazıntının sonralar bağlara tərəf uzanmağa davam etməsi səbəbindən meyvə təsərrüfatları da məhv olmağa başladı. Təsəvvür edin ki, illərlə bağ saxlayırsız, o bağ sizin yeganə dolanışıq yerinizdir, yeganə təsərrüfatınızdır və bir gün kimsə gəlib hər-şeyi alt-üst edir. Və söhbət bir nəfərin yox, onlarla kəndlinin təsərrüfatından gedir. Təngivanda yaşamaq üçün səbəb qalmayıb”.
Məlumat üçün bildirək ki, Ekologiya və Təbii Sərvətlər Nazirliyi “Kaspi Yıldız” MMC-ni qanunsuz qum-çınqıl hasilatına və ekologiyanı çirkləndirdiyinə görə dəfələrlə məhkəməyə verib. Məhkəmə MMC-ni bir neçə dəfə cərimələsə də, şirkət öz fəaliyyətindədir.
Kamran Məmmədli: “Feyxoa bağlarının məhv olması nə deməkdir, əgər bu işdə doğrudanda…”
İqtisadçı Kamran Məmmədli qeyd etdi ki, kəndlilərin əsas məşğuliyyəti əkinçilik və heyvandarlıqdan ibarətdir. Ancaq qazıntılar, əkin sahələrinə suyun verilməməsi kimi problem kəndliləri kənd təsərrüfatı ilə məşğul olmaqdan məhrum edib: “Kəndlilər məlum hadisə ilə aidiyyatı qurumlara müraciət etməlidir. Feyxoa bağlarının məhv olması nə deməkdir? Əgər bu işdə doğrudanda “Kaspi Yıldız” MMC-nin rolu varsa, sakinlər bu şirkəti məhkəməyə verə bilər. Məhkəmə vasitəsilə həm təbiətə dəyən ziyan, həm də maddi zərərə görə şirkət cəzalandırıla bilər”.
Günel CƏLİLOVA
