Çox təəssüflər olsun ki, son illər Azərbaycanda bəzi elm və təhsil, mədəniyyət ocaqlarının ətrafında qalmalallar yaşanır. Əsasən də daxildə yaşanan problemlər nəticəsində bəzən bu qalmaqallar məhkəmələrə qədər daşına bilir. Bakı Xoreoqrafiya Akademiyasında baş verənlər kimi.
Mətbuatda yayılan məlumatlara görə, Bakı Xoreoqrafiya Akademiyasında aşkar edilmiş qanun pozuntuları ilə bağlı araşdırma aparılıb.
Bununla bağlı akademiyanın əməkdaşları da ifadə verib. Baş Prokurorluğun mətbuat xidmətindən APA-ya bildirilib ki, Bakı Xoreoqrafiya Akademiyasında aşkar edilmiş hüquqpozmalarla əlaqədar fakta görə 01.04.2022-ci il tarixdə Cinayət Məcəlləsinin 313 və 308.1-ci maddələri ilə cinayət işi başlanıb.
Bakı Xoerqrafiya Akademiyasında nə baş verir?
Mətbuatda apardığımız araşdırma zamanı məlum oldu ki, bu akademiyada uzun müddətdir bir qrup əməkdaşla problem yaşanır. Belə ki, keçən il bir qrup əməkdaş Bakı Xoreoqrafiya Akademiyasının bədii rəhbəri, sonra isə rektor vəzifələrini müvəqqəti icra edən Əməkdar artist Nailə Məmmədzadə ilə bağlı mədəniyyət naziri Anar Kərimova şikayət xarakterli açıq məktub yazıb. Hələ 2021-ci ildə mədəniyyət naziri Anar Kərimov mətbuata açıqlamasında bildirmişdi ki, Nailə Məmmədzadə ilə bağlı şikayətlər araşdırılır. O qeyd eidrdi ki, araşdırmalar hələlik başa çatmayıb və bu səbəbdən nəticə barədə danışmaq tezdir: “Oradakı problemlər diqqət mərkəzindədir. Xoreoqrafiya bizim üçün çox vacib sahədir. Biz orada islahatlar aparılmasını istəyirik. Nöqsanlar aradan qaldırılmalıdır. Şikayətlərin anonim olması bizi narahat edir. Buna baxmayaraq, obyektivliyi qorumaq üçün şikayətlər araşdırılır. Nəticələri barədə məlumat veriləcək”.
“Araşdırma nəticəsində toplanmış müvafiq materiallar hüquqi qiymət verilməsi üçün...”
Qeyd edək ki, 2021-ci il fevralın 3-də Prezident İlham Əliyevin imzaladığı sərəncamla Bakı Xoreoqrafiya Akademiyasının rektoru Timuçin İlyas oğlu Əfəndiyev vəzifəsindən azad edilib.
Mədəniyyət naziri Anar Kərimovun müvafiq əmri ilə Əməkdar artist Əziz Yaşar oğlu Qarayusifli akademiyanın Tədris işləri üzrə prorektoru vəzifəsinə təyin olunub.
Bakı Xoreoqrafiya Akademiyasında nə baş verdiyini və burada hansı hüquqpozmalarla əlaqədar faktların qeydə alındığını araşdırmaq məqsədilə akademiyanın mətbuat xidməti ilə əlaqə saxladıq. Akademiyanın mətbuat xidmətindən sorğumuza cavab olaraq bunları bildiriblər: “Hazırda Azərbaycan Respublikasının Mədəniyyət Nazirliyi tərəfindən mədəniyyət müəssisələrinin fəaliyyətinin səmərəliliyinin artırılması, xidmət səviyyəsinin yüksəldilməsi, hüquqpozmaların qarşısının alınması məqsədilə monitorinqlər, xidməti araşdırmalar aparılır. Mədəniyyət Nazirliyinin müvafiq komissiyası tərəfindən 2022-ci ilin yanvar ayında Bakı Xoreoqrafiya Akademiyasında aparılmış xidməti araşdırma zamanı Akademiyanın müəyyən dövrü əhatə edən fəaliyyətində pozuntu halları aşkar edilmişdir. Araşdırma nəticəsində toplanmış müvafiq materiallar hüquqi qiymət verilməsi üçün Azərbaycan Respublikasının Baş Prokurorluğuna göndərilmişdir. Eyni zamanda qeyd edirik ki, Bakı Xoreoqrafiya Akademiyasının yeni rəhbərliyi tərəfindən sözügedən araşdırma zamanı aşkar olunmuş pozuntu hallarının, o cümlədən tədris prosesinin təşkilində olan problemlərin aradan qaldırılması, Akademiyada təhsilin keyfiyyətinin yüksəldilməsi, təhsilalanların qabiliyyətlərinin və ifaçılıq bacarıqlarının inkişaf etdirilməsi, onların yaradıcılıq potensialının reallaşdırılması və artırılması üçün əlverişli şəraitin yaradılması istiqamətində zəruri tədbirlər həyata keçirilir”.
İradə SARIYEVA
