Demək olar ki, hər gün hansısa avtobuslarda gediş haqqının "BakıKart”a inteqrasiya edilməsi xəbərlərini oxuyuruq. Bunlar bizi sevindirir. Çünki avtobuslardakı gediş haqqı davaları, narazılıqları, ödəniş etməyənlərlə bağlı müzakirələr nağdsız ödənişlər vasitəsilə keçmişdə qalır.
Düzdür, bu bizim işimizi asanlaşdırır. Lakin indi də karta ödəniş edə bilməməklə bağlı narazılıqlarla üz-üzə qalırıq. Bu məsələ sərnişinləri ciddi şəkildə narahat edir. Cibində pulu olan nə avtobusa minə, nə də avtobus kartına pul yükləyə bilir. Çünki "BakıKart” balansını artırmaq üçün terminallar avtobuslar qədər əlçatan deyil. Bu səbəbdən ictimai nəqliyyatdan istifadə edənlərin "BakıKart”a pul yükləməklə bağlı vaxtaşırı şikayətləri səslənir. Bəzi dayanacaqlarda ya ümumiyyətlə terminal yoxdur, ya da var, amma işləmir.
Qeyd edək ki, paytaxtda bir çox avtobus dayanacaqlarında "BakıKart" terminalları yığışdırılıb. Dayanacaqların əksəriyyətində nə " BakıKart ", nə də digər ödəmə terminalını tapmaq olur.
Dayanacaqlarda sözügedən ödəmə aparatları olmadığına görə sərnişinlər ya başqa bir sərnişinə 30 qəpik verib avtobusdan istifadə etməli, ya da kartın balansını artırmaq üçün " BakıKart " ödəmə terminalı axtarmalı olurlar.
“Ödənişin müasir üsullarını tətbiq etmək lazımdır, sərnişinlər əziyyət çəkir”
Sosial sahə üzrə ekspert Elxan Əliyev qeyd etdi ki, kartlardan ümumiyyətlə imtina edilməlidir: "Dünyanın bir çox ölkəsində kart ümumiyyətlə yığışdırılır. İnsanlar mobil telefonları ilə pul ödəyir. Ödənişin müasir üsullarını tətbiq etmək lazımdır. Sərnişinlər əziyyət çəkir. Ehtiyac olan yerlərə terminallar quraşdırılmalıdır. Həmçinin, sərnişinlər də işlərini ehtiyatlı tutsunlar. Karta heç olmasa 10-15 gedişlik pul yükləməlidirlər”.
Ekspert onu da əlavə etdi ki, son vaxtlar mövcud terminalların da işləməməsi ilə də bağlı şikayətlərin sayı artıb. Əlbəttə, bu ciddi bir qüsurdur: “Məsələnin digər həll yolu “BakıKart”lara onlayn hesab artırma funksiyasının gətirilməsidir. Yəni fiziki cəhətdən hər dayanacağa terminalın qoyulması ümumən problemin yeganə həlli deyil və çeşidli ödəniş üsulları ilə vətəndaş narazılığını aradan qaldırmaq olar”.
Günel CƏLİLOVA
