“Təhsil sistemi ilə basketbolun vəhdətini təşkil etmək mənim üçün vacib məsələdir”. Bu sözləri Azərbaycan Basketbol Federasiyasının prezidenti, təhsil naziri Emin Əmrullayev federasiyanın ötən konfransında deyib.
O qeyd edib ki, basketbolla məşğul olan uşaqların valideynləri gələcəkdə çətin seçim qarşısında qalır. Çünki özünü ya peşəkar idmana, ya da hazırlığa sərf etməlidir. Bu kifayət qədər məsuliyyətli seçimdir. İnandığım odur ki, biz bu çətinliyi həll edə bilərik: “Müasir idman təkcə fiziki gücdən asılı deyil. Belə bir stereotip var ki, Azərbaycanda uzunboylu insan azdır. Buna görə deyirlər ki, bizdə heç vaxt basketbol olmayacaq. Amma aparılan seleksiya işləri nəticəsində 779 nəfər basketbola marağı olan uzunboylu adam seçilib. Onlardan 420-si qız, 359-u oğlandır”.
Qeyd edək ki, təhsil naziri Emin Əmrullayev dekabrdan etibarən Basketbol Federasiyasının prezidentidir.
Maraqlıdır, təhsil sistemi ilə peşəkar idmanın nə kimi əlaqəsi var? Bunun təhsilə nə kimi faydası olacaq?
Elşən Qafarov: “İdmanın təhsillə heç bir əlaqəsi yoxdur”
Təhsil eksperti Elşən Qafarov “Bakı-Xəbər”ə açıqlamasında qeyd etdi ki, idmanın təhsillə heç bir əlaqəsi yoxdur: “Cənab nazirin basketbola olan həvəsi alqışlanmalıdır. Ancaq təhsilin birbaşa təhsillə əlaqəsi olmalıdır. Məlumdur ki, Azərbaycan Basketbol Federasiyasının prezidenti Emin Əmrullayevdur. Gələcəkdə nazir velosiped federasiyasında təmsil olunarsa, onda belə çıxır ki, təhsil velosipedlə əlaqələndirəcək?”.
Ekspert qeyd etdi ki, təhsil ciddi məsələdir, bununla bağlı ciddi fikirlər, doğru addımlar atılmalıdır: “Ümumiyyətlə, hər bir idman növünün inkişafı yaxşı haldır. Ancaq bunun birbaşa təhsillə əlaqələndirilməsi düzgün deyil”.
Elçin Əfəndi: “Basketbolla təhsillin vəhdəti qəribə səslənir”
Təhsil eksperti Elçin Əfəndi qəzetimizə açıqlamasında qeyd etdi ki, Təhsil Nazirliyi tərəfindən müxtəlif idman yarışlarının, müsabiqələrin keçirilməsi ümumi şagirdlər üçün fiziki baxımdan yaxşıdır. Ancaq bu yarışlar idman növüdür və bunun təhsillə əlaqəsi yoxdur: “Bəllidir, təhsil naziri Azərbaycan Basketbol Federasiyasının prezidentidir. Tək bir idman növü üzrə deyil, şagirdlərin müxtəlif idman sahələri üzrə məşğul olması daha məqsədəuyğun olar. Basketbolla təhsillin vəhdəti qəribə səslənir. Məlumdur ki, basketbolda daha çox hündürboylulara üstünlük verilir”.
Həmsöhbətimiz onu da əlavə etdi ki, hazırda orta ümümtəhsil məktəblərində 1 milyon 900 min şagird təhsil alır. Onlar arasında idman sahəsi üzrə fərqlənən şagirdlər var: “Futbol, şahmat, cudo, sambo, güləş və digər idman yarışlarında qalibiyyət qazanan şagirdlər az deyil. Şagirdlərin peşəkar idmanla məşğul olması üçün məktəblərarası müsabiqələr təşkil etmək olar”.
Günel CƏLİLOVA
