"Azərbaycan Dəmir Yolları" Qapalı Səhmdar Cəmiyyətinin bir qrup işçisi bu günlərdə aksiya keçirib. Azərbaycanın quru sərhədləri koronavirus pandemiyasına görə iki ildən çoxdur bağlıdır, beynəlxalq sərnişin daşımaları dayanıb və buna görə də dəmiryolçular faktiki fəaliyyətsiz qalıb.
Onların sözlərinə görə, rəhbərlik bunu əsas gətirərək onlara aylıq maaşlarının 370 manatdan 250 manata salınacağını deyib. Dəmiryolçuların sözlərinə görə, onlar quru sərhədlərin açılmasını və öz işlərinə qayıtmaqlarını istəyirlər və deyirlər ki, fəaliyyətsiz qalmaqlarının səbəbkarı onlar deyillər.
Aksiya iştirakçısı - Təranə Hümbətova: “İki aydır maaşımızı artırıb 372 manat ediblər, sonra da çağırıb deyirlər ki, məbləğin üçdə ikisini alacaqsınız…”
Aksiya iştirakçısı Təranə Hümbətova bildirir ki, 32 ildir bələdçi vəzifəsində çalışır: “Pandemiya olan vaxtı bizi işdən çıxardılar və 329 manat maaş verirdilər. Bu iki il ərzində hamının maaşı artdı, bizimki artmadı. İki aydır maaşımızı artırıb 372 manat ediblər, sonra da çağırıb deyirlər ki, məbləğin üçdə ikisini alacaqsınız. Məcburi qol çəkdirdilər. İndi 200-250 manata yaşayan var? Burada toplaşanların hamısının uşaqları var, kreditləri var, kirayədə qalanı var".
“Azərbaycan Dəmir Yolları” QSC: “Fəaliyyətsiz qalmış əməkdaşların yeni quruma keçidi zamanı boşdayanma zamanı alacaqları əmək haqqının ödənilməsi təmin ediləcək”
Məsələ ilə bağlı Azərbaycan Dəmir Yollarından (ADY) bildirildi ki, ölkəmizdə pandemiyanın təsirləri “Azərbaycan Dəmir Yolları” Qapalı Səhmdar Cəmiyyətinin (ADY) digər sahələri ilə yanaşı, Sərnişin daşımaları departamentinin əsas fəaliyyət istiqaməti olan dəmir yolu nəqliyyatı ilə sərnişindaşıma xidmətlərinin həyata keçirilməsinə təsirlər formalaşdırıb, eləcə də ölkədaxili və beynəlxalq sərnişin daşımalarında müəyyən məhdudiyyətlərin tətbiq olunmasına səbəb olub: “Həmin təsirlər fonunda iş həcminin və əməyin intensivliyinin azalması bir sıra işçilərin fəaliyyətsiz qalmasına, uzunmüddətli boşdayanma hallarının baş verməsinə gətirib çıxarıb. Buna baxmayaraq, aidiyyəti dövlət qurumlarının tövsiyələri nəzərə alınaraq pandemiya dövründə həmin işçilərə qarşılıqsız olaraq tam əmək haqlarının ödənilməsi təmin edilib. “Azərbaycan Dəmir Yolları” QSC-də 18 mindən çox işçi heyəti var. Pandemiya müddətində yalnız 2 000-ə (iki minə) yaxın işçi əmək fəaliyyətində olmayıb və həmin şəxslərə pandemiya başladığı tarixdən son dövrlərə kimi bütün aylar üzrə ümumilikdə 10 000 000 (on milyon) manatdan artıq vəsaiti əhatə edən əmək haqqı ödənilib. Bundan əlavə, yoluxmanın yüksək olduğu müxtəlif dövrlərdə istehsalatın fasiləsizliyi təmin edilməklə əməkdaşların növbəli şəkildə 30 % və ya 50 % işə cəlb edilməsi zamanı da bütün əməkdaşların əmək haqlarının tam məbləğdə ödənilməsi həyata keçirilib”.
ADY-nin açıqlamasında deyilir ki, hazırkı mühit yaranmış əvəzi ödənilməyən öhdəliklərin qarşısının alınmasını, ADY-də borcların restrukturizasiyasına təsirlərin minimallaşdırılmasını, müvafiq fəaliyyətinin daha optimal həcmdə resurs sərf etməklə həyata keçirilməsini, işçilərin sayının işin həcminə uyğunlaşdırılmasını və kadr potensialının buna mütənasib optimallaşdırılmasını zəruri edib: “Bununla bağlı Azərbaycan Respublikası Əmək Məcəlləsinin 169-cu maddəsinə uyğun olaraq fəaliyyətsiz qalmış işçilərin boşdayanma vaxtı həmin işçilər üçün müəyyən edilmiş dərəcənin tarif (vəzifə) maaşının üçdə iki hissəsi məbləğində ödənişin tətbiqinə başlanılmış və sözügedən bütün tədbirlərin əmək qanunvericiliyinin tələblərinə tam riayət olunmaqla həyata keçirilməsi təmin edilib. Fəaliyyətsiz qalmış və sərbəstləşmə riski olan əməkdaşların sonrakı məşğulluğunun təmin edilməsinə lazımi dəstəyin verilməsi məqsədilə aidiyyəti dövlət qurumları ilə danışıqlar aparılmış və bu əməkdaşların DOST İş Mərkəzi tərəfindən müvafiq işlərə cəlb edilməsinə dair razılıq əldə edilib. Fəaliyyətsiz qalmış əməkdaşların yeni quruma keçidi zamanı boşdayanma zamanı alacaqları əmək haqqıya (tarif (vəzifə) maaşının üçdə iki hissəsi məbləğində) yaxın və ya daha yuxarı əmək haqqının ödənilməsi təmin ediləcək. Eyni zamanda, sosial dayanıqlığın təmin edilməsi məqsədilə sözügedən əməkdaşların DOST İş Mərkəzinə keçidi zamanı onlara vəzifə (tarif) maaşlarının 5 misli miqdarında birdəfəlik müavinətin ödənilməsi nəzərdə tutulur”.
Günel CƏLİLOVA
