“…Özümü neftlə yandıracağam”
Tovuz rayonunun Yuxari Öysüzlu kənd sakini Hüseynov Nicat Mayil oğlu Azərbaycan Prezidenti İlham Əliyevə, Türkiyə Respublikasının prezidenti Rəcəb Tayyib Ərdoğana, Baş nazir Əli Əsədova, Əmək və əhalinin sosial müdafiəsi naziri Sahil Babayevə, millət vəkili Ülviyyə Ağayevaya Tovuz rayo İcra hakimiyyətinin başçısı M.Məmmədova müraciət ünvanlayıb.
N.Hüseynov sözügedən müraciətin bir nüsxəsini də elektron qaydada “Bakı-Xəbər”ə göndərib. N.Hüseynov müraciətində qeyd edir ki, xəstəliyinə görə 21 il pensiya alıb, lakin 8 aydır ki, pensiyası kəsilib. O, sözügedən müraciətində kəsilən pensiyasının bərpa edilməsinə yardım göstərilməsini xahiş edir.
“Xahiş edirəm ki, mənim əlilliyə görə pensiyamın bərpa edilməsinə köməklik göstərəsiniz. Mən 21 ildir ki, əlilliyə görə pensiya alırdım, amma 8 aydır, müddəti bitmiş pensiyamı bərpa edə bilmirəm. Tovuz Mərkəzi Xəstəxanasında, o cümlədən də Baki şəhərində yerləşən Respublika Endokrinoloji Mərkəzdə stasionar müayinə və müalicələr almışam. Səhhətimdə olan ağırlaşmalar və həkimlərimin yazdıqları epiqrizdə mənə əlillik təyinatının aparılmasının vacibiyi vurğulanır. Bunlara baxmayaraq, Əmək və Əhalinin Sosial Müdafiəsi Nazirliyinin Sosial Ekspertiza Komissiyası əsassız, qərəzli imtina cavabı göndərməklə, vətəndaşa, ya kimə xidmət etdiyini şübhə altına alaraq təxribatlar yaratmaqla insanları narazı kütləyə çevirir. Vətəndaşı dövlətlə üz-üzə qoyaraq məni - xalqına, dövlətinə, dövlətçilik ənənələrinə sadiq olan 31 yaşli bir gənci “sosial üsyana” hazırlayır. Çünki başqa çarəm yoxdur. Ümüd yerim, dolanışığım, kommunal ödənişlərim, iynə-dərman pulum, kommunal ödənislərim, iynə-dərman, çörək, kəfən pulum əlilliyə görə aldığım pensiyadan asılı vəziyyətdə idi. Çünki bədənimdə iş qüvvəm yoxdur ki, işləyəm. Ac-yalavac, aclıq-səfalət içində qalmışıq, ədalətsizliklə, süründürməçiliklə üzləşmişik. 8 aydır ki, döymədiyimiz məmur qapısı qalmayıb, daha dilənçi vəziyyətinə düşmüşük”.
N.Hüseynov şikayət məktubunda qeyd edir ki, İkinci Qarabağ müharibəsində Zəfər çalmiş bir ölkədə bu durumda yaşamağı heç cür qəbul edə bilmir və ac-yalavac, səfalət içində yaşamaqdan bezib. Vətəndaş yazır ki, Azərbaycan dünyanın bir çox ölkəsinə humanitar yardımlar göstərir: “ Amma öz vətəndaşı acliqdan özunü yandımağı düşunur. Sizlərdən xahiş edirəm ki, mənə pensiya təyinatının aparılması üçün köməklik edəsiniz”.
Vətəndaş yazır ki, hüquqları bərpa edilməyəcəksə, çox dəhşətli bir yol seçəcək: “Bu dediklərim həyata keçməyəcəyi halda özümü neftlə yandıracağam”.
Vətəndaşın müraciətinin araşdırılması və onun pensiyanın hansı səbəbdən kəsildiyini, pensiyasının bərpası istiqamətində nə kimi işlər görüləcəyini öyrənmək üçün Dövlət Tibbi Sosial Ekspertiza və Reabilitasiya Agentliyinə sorğu göndərdik. Agentlik sorğunun cavabını göndərdikdən sonra onu da təqdim edəcəyik.
Leyla QARAXANLI
