Məlum olduğu kimi, Azərbaycanda koronavirus pandemiyası ilə əlaqədar bir sıra məhdudiyyətlər aradan qaldırılıb. Lakin penitensiar müəssisələrə hələ də PCR testlə giriş qaydası qüvvədədir. Həmin qadağa bir sıra vəkillər arasında narazılığa səbəb olub və onlar sosial şəbəkələrdə məhdudiyyətin ləğv edilməsinə dair fikirlər səsləndiriblər. Hüquq müdafiəçiləri ölkəyə girişdə ləğv edilən bu test tələbinin penitensiar müəssisələrə girişdə saxlanılmasını lüzumsuz hesab edirlər.
Xatırladaq ki, bu ilin əvvəlində Ədliyyə Nazirliyi penitensiar müəssisələrdə daxil olmaq üçün vəkillərə, müstəntiqlərə və s. şəxslərə pulsuz PCR testi verilməsi imkanı yaradıldığını açıqlamışdı. Alternativ olaraq hər bir penitensiar müəssisədə ekspress test verilməsinin də mümkün olduğu bildirilib.
Qeyd edək ki, Penitensiar müəssisələrdə PCR test tələbi Nazirlər Kabinetinin yox, Ədliyyə Nazirliyinin daxili qaydada tətbiq etdiyi məhdudiyyətdir.
Əziz Qənbərov: “Bu məsələ vəkillərin kefiyyətli hüquqi yardım göstərməsinə, müştərilərin isə kefiyyətli hüquqi yardım almasına böyük maneədir”
Vəkil Əziz Qənbərov bildirdi ki, bu məsələ vəkillərin kefiyyətli hüquqi yarım göstərməsinə, müştərilərin isə kefiyyətli hüquqi yardım almasına böyük maneədir: “İnzibati maneədən başqa bir şey deyil. Hətta mən bu problemə görə cinayət işləri üzrə müqavilə bağlamamağa üstünlük verirəm. Bu da insanların öz istədiyi vəkillərlə müqavilə bağlanmasına ciddi maneədir ki, istintaq orqanının da ürəyincə olan bir haldır”.
Ədliyyə Nazirliyi: “PCR testi tələbi infeksiyanın yayılma risqinin azaldılması məqsədilə ləğv edilməyib”
Məsələ ilə bağlı Ədliyyə Nazirliyinin Mətbuat Xidmətindən bildirildi ki, PCR testi tələbi infeksiyanın yayılma risqinin azaldılması məqsədilə ləğv edilməyib: “Son günlər penitensiar müəssisələrdə saxlanılan şəxslərlə görüşə gələnlər arasında, o, cümlədən vəkillər arasında tək-tək də olsa COVİD-19 infeksiyasına görə götürülmüş PCR yaxma nümunələrinin müayinə nəticələrində “pozitiv” hallar müşahidə edilib. Buna görə də kompakt saxlanılan məhkum və həbs edilmiş şəxslər arasında infeksiyanın yayılma risqinin azaldılması məqsədilə analizlərin aparılmasının davam etdirilməsi Nazirliyin tibb xidməti tərəfindən məqsədəmüvafiq hesab edilir”.
Günel CƏLİLOVA
